78
Ki jiin Yennu nan u niib po
1 N niib, gbiintir n wannu maŋ,
kii tee soon nna ki gbat maa yaa man beti linba.
2 N saa pakii barjokite,
ki fiit bunbɔr bona nba bo be sianyoowa na,
3 linba ki ti gbat ki bia mi, linba ki ti baanba din betit na.
4 Ti kan bɔr ti waas maan maŋi,
ti bia saa wann maaru nba waa ki jiin bakitnauŋ toona
nba ki Yennu tun, nan u paŋ na po.
5 Ki u tur Jakɔb maaru nba tee Israel teeb na sennu,
ki bia turib wannu,
ki kpaan ti yeejamm a bin wann bi waas sennu maŋ,
6 a lin te maaru nba waa n tumii, ki mun wann bi waas.
7 Ki bi-i tun nna, li saa te bin teen Yennu yada,
ki kan tamm toona nba ki u tun na po,
ŋaan sii mɔk mɔsaku nan u sennu.
8 Bi kii tee nan bi yeejamm nba din tee tubkangbata
nan mɔyêtdamm na kaa;
ŋamm yaa yada din ki gbee nan Yennu,
ki bi bia din ki waa Yennu fanu.
9 Efraim jab lek din bar loa nan tɔrbana,
ŋaan bi din tan chiar tɔb daara.
10 Bi din ki dia bi mɔlor nan Yennu,
ki yêt bin gaar u sennu na.
11 Bi din tamm waa tun linba ki turib nawa,
li bakitnauŋ toona nba ki u din tun ki bi la na.
12 Bi yeejamm din goriie ki Yennu tun bakitnauŋ
toona maŋ, Soann paanu nba be Ijipt tiŋ ni na.
13 Yennu din bɔkit mɔkgbeŋir ki te ki bi somm gar li ni,
ki te nyunpana set nan joona na.
14 U din liin sanpagbouŋo, ki li ŋmakitirib yonnu ni,
ki u bia ŋmakitirib nyiɔk nan muu yentu.
15 U din yee tangbeŋa, kunkoouk na paak,
ki teemm nyun, ki li yab nan mɔka ni nyun na.
16 U din te ki nyun nyi tanpiiuk ni ki puub nan mɔkir na.
17 Bi bia lek din tuun yanbɔmm ki biir Yennu,
ki mɔk mɔyêtuk nan Yabint Yennu, kunkoouk na paak.
18 Bi lek din miewa ŋaan bikin Yennu,
ki boi jeet nba ki bi nian po.
19 Bi din pak ki biir Yennu ki yet a,
“Yennu saa fit turit jeet kunkoouk na paaka-a?
20 Li tee mɔniie nan u faa tanpiiuk, ki nyun nyii
ki puub bonchiann, ŋaan u saa fit turit jeeta-a?
U saa fit tur u niib nanta-a?”
21 Li paak, ki Yennu wutoor ji doo yoo nba ki u gbat
bi pinpakit maŋ, ki din lekib nan muu.
U wutoor din doo Israel teeb na paak bonchiann,
22 kimaan bi din ki teenɔ yada,
ki bia ki mɔk yada nan u saa fit tinnibi.
23 U lek din pak nan sanpagbouŋ,
ki te ki li takorbona loot,
24 ki te jeet nyii sanpagbant ni ki sik,
ki tee mana ki bi dii.
25 Yennu din turib linba kur ki bi loon,
ki bi dii malakanba jeet.
26 U din te ki wouŋ daa ki nyii yondo po,
ki bia jii u paŋ ki te ki wouŋ nyii niigaŋ po ki daa,
27 ki nyinn pinpara, ki bi yab nan tanbiinii na, ki tur u niib.
28 Pinpara na din baa kaaŋ na sinsuuk ni,
nan lanbont na kur po.
29 Niib na din ŋman ki tan gboo,
kimaan u din turib baa nian linbawa.
30 Bi bia lek din ki fit nyinn bi niɔŋ,
ŋaan bia daa ŋman,
31 li yooe ki Yennu wutoor doo bi paak;
ki u kpii bi nipaarit, binba tee Israel naasinchinchiba na.
32 Linba na kur, ŋaan niib na bia lek din tuun yanbɔmm.
Yennu bakitnauŋ toona nba ki u tuun na kur lek,
bi din ki teenɔ yada.
33 Li paak ki u din jiŋ bi daa ki li tee nan foon na,
ki bia jii biak ki jiŋ bi manfoa.
34 Yoo nba kur ki u kpii bi siabi,
leeb nba biar na tuu mɔ kɔɔbiae,
ki lebit bi binbeŋ ki miar ŋɔɔ Yennu nan ninbinmɔnii.
35 Bi tuu tiar nan Yennu-e tee bi guutɔɔ,
ki tee Yabint daanɔ nba baar ki sommitib.
36 Ŋaan bi mɔbona kur din tee faie;
bi din ki piak siar ki li tee barmɔnii.
37 Bi para din ki yeen nanɔ,
bi din ki dia bi mɔlor fanu nanɔ.
38 Ŋaan Yennu lek bia din mɔk ninbatinu nan u niib na,
ki nyik chab bi yanbɔmm, ki din ki biiribi.
Yoo n tuu yoo u din tuu gɔɔr u wutoore, ki ki fiint u jati.
39 U din mi nan bi tee nisaariie,
ki tee nan wamaasin nba tuu gar ki ji ki jent na.
40 Bi din tuu baar nan kpikpiruko ki biirɔ yoo kur
kunkoouk na paak, ki teenɔ parbiir, muuk na ni.
41 Bi din bikii Yennu-e yoo kur,
ki dont Israel teeb Kasii Daanɔ maŋ wutoor.
42 Bi din tamm u yabint paŋ
nan daar nba ki u din fatib bi datai boor nae,
43 ki din tun u bakitnauŋ nan yaarlituk toona,
Soann paanu nba be Ijipt tiŋ ni na.
44 U din te ki mɔka nyun kpant sɔn,
ki Ijipt teeb kɔŋ nyun nan nyunu.
45 U din te kpajui baa bi ni, ki daamiib,
ki te pɔnta yabit ki biir bi tiŋ.
46 U din tun naasuut, ki bi baar ŋman bi bonbuburit,
ki bia biir bi kpaant kur.
47 U din tun sakaana, ki li biir bi tilontii,
ki te sakaana baa bi kinkanii paak, ki li kpo.
48 U din te sakaana nan sanyikintii kpii bi bonkobit.
49 U din kpaar u wutoor ki paan bi paak,
ki li tee kuun malakae baar bi paak,
ki bi be parbiir ni.
50 U din ki gɔɔr u wutoor koo ki tinn bi manfoa,
ŋaan kpiib nan yiarbiit.
51 U din kpii Ijipt nirɔ kur bija sinsinn.
52 U din gare ki u niib na waa nan pekpaarik nba tuu gar
ki u pei waa na, ki ŋmakitirib kunkoouk na paak.
53 U din ŋmakitirib nan laafia, ki bi ki mɔk jaŋmaanii,
ŋaan ki u te ki mɔkgbeŋir mubin bi datai na paak,
54 ki din diab ki baar namm u kasii tiŋ kpaar boor,
ki li tee kunkona tiŋ nba ki u kɔn ki nyann na ni.
55 U din ber niib nba kɔɔ leŋ na ki nyinnib,
yoo nba ki u nigannkab Israel teeb baat na,
ki biit tiŋ na ki tur bi booru kur,
ki kɔɔmm niib nba din kɔɔ leŋ na ŋei ni.
56 Ŋaan Israel teeb na lek din mɔk mɔyêtuk
ki biir Yabint Yennu, ki bia bikiiɔ, ki ki saak u sennu na.
57 Bi din tee mɔyêtdamme, ki ki mɔk mɔsaku,
nan bi baanba nba din ki mɔk na.
Bi din tee nan tɔrbanŋmarima nae.
58 Bi din dont Yennu wutoor nan bi tingbanjiant boa,
ki gbit u kpak nan bi pata.
59 Yennu din donn wutoor nan waa la nna na,
li paak, ki u yêt u niib fas fas.
60 U din yaan u kasii boor nba be Siilo na,
ki li tee u lanbouŋ nba ki u tuu kɔɔ nant na,
61 ki din te ki ti datai fat mɔlor lakir nba tee nyinn
ki want u paŋ nan baakir na.
62 U din donn wutoor nan u tiɔŋ niib,
ki te ki bi datai kpiib.
63 Bi din kpii naasimm tɔbii ni,
ki sapaamm kɔŋ jab nan bin kumm.
64 Bi mannteeb din kpo tɔbii ni,
ki bi datai na ki saak ki pakɔi na fabinii.
65 Li joontik, ki Yennu fiir ki tee nan u bo gɔɔnte na,
ki tee nan nipaaruk nba tuu nyu daan ki ŋamm la paŋ na,
66 ki ber u datai ki nyinnib, ki bi dii fei nba kaa paak.
67 U din yêt Joosef maaru; u din ki gann Efraim booru,
68 ŋaan gann Juda booru
nan Sayɔnn kunkonn nba ki u mantik loon na.
69 Leŋe ki u maa u ŋasaakak,
ki li fɔk nan sanpaak na,
ki te ki li yoo be nan tingbouŋ nba yoo be na.
70 U din gann Defid, ki u tee u toontunnɔ,
ki u nyinnɔ bonkob-look ni,
71 waa sii kpaar pei na, ki u jiiu ki teenɔ kpanbar,
ki u sii gorii u niib Israel teeb, binba tee ŋɔɔ Yennu faar na.
72 Ki Defid jii u par kur ki diab nan barmɔnii,
ki soorib fanu, ki ŋmakitirib.