Ⅰ A Pɛ̃nfʊ Bɩbir na wa baar, ka a na ɩ a Pɛ̃nfʊ divɩɛ bio daar a wɛr na wa chaara wa la la la, Mɛɛr na yi a Magdala nɩ a Mɛɛr ãsʊɔ yin chen ɩka ba tɩ kaa a yaa.

Ⅱ Be lɛ ka a tẽe dãm kpɛ̃ɔ jaa, ka a ɩ Nãaŋmɩn malaka lɛ yi a saaju suu wa bil a kʊsɩr bar a yaa nɛɛ tɩ do jãnɛ. Ⅲ A wʊ nie nyɩlɛ saa nyɩɩrfʊ kaar, ka a wʊ bʊ̃sursɩ pɛl jaa pɩlpɩl. Ⅳ Dãbãɛ kpɛ̃n a bala na ara kaara, ka ba gĩem ara kũn kaar.

Ⅴ A malaka 'yɛr kʊ a pɔbɔ, “Yɩ ta joro dãbãɛ ɛ, n bɔ̃ɔn naa ɩka a Yesu 'lɔ ban kpa a daa ju lɛ yɩ bʊɔrɔ. Ⅵ Waa be ka ɛ. Wʊ ir naa ɩ vʊr nɩtãa a lɛ wʊn dɔ̃ɔ 'yɛr. Yɩ wa muul kaa a jie wʊn gã. Ⅶ Yɩ chen fɔɔ jaa na yɩ tɩ 'yɛr kʊ a wʊ poturbo, ‘Wʊ lɩɛb ir a kũu pɔ, na wʊ de yɩ nie chiine a Galilee. Be lɛ yɩn tɩ nyɛ wʊ.’ N pãa 'yɛr kʊ yɩ.”

Ⅷ A pɔbɔ banyãna yin a yaa par nɩ dãbãɛ jo fɔɔ jaa nɩ pʊpɛl chen ɩka ba tɩ 'yɛr kʊ a wʊ poturbo. Ⅸ Be lɛ ka ajienaa, ka a ɩ Yesu lɛ tuor puor ba, ka ba lo kpa a wʊ niem nyɔɔ a wʊ gbɛɛ puor wʊ. Ⅹ Be lɛ a Yesu 'yɛr kʊ ba, yɩ ta joro dãbãɛ ɛ, “Yɩ tɩ 'yɛr kʊ a n yɛɛr ɩka ba chen a Galilee, be lɛ ban tɩ nyɛ ma.”

Ⅺ A pɔbɔ na wa chiine, a sojasɩ bamɩne na dɔ̃ɔ guro a yaa kpɛ̃n a tẽkpɛ̃ɛ pɔ, tɩ 'yɛr kʊ a Juu nɩbɛ bɔɔrlo nɩbɛrɛ a lɛ jaa na ɩ. Ⅻ A bɔɔrlo nãa nɩ a wʊ nɩbɛrɛ na wa lɔ̃ɔ taa, ba guor taa de libiyɔɔ kʊ a sojasɩ ⅩⅢ tɩ na ba 'yɛr kʊ ba, “Yɩ 'yɛr ɩka, ‘A wʊ poturbo lɛ wa ju a wʊ ãgãn a sɔ̃ɔ 'lɔ sɩn chɛnɛ gã guro.’ ⅩⅣ Ala ɩ a 'yɛr nyã wa lon a Nãa Pilate toor pɔ, sɩn maal wʊ naa ka a wʊ pʊɔ pɛl a sɩ ir yɩ yin wõm pɔ.” ⅩⅤ A sojasɩ den a libie tɩ na ba ɩ a lɛ ban 'yɛr ɩka ba ɩ. A Juu nɩbɛ ma chɛnɛ na 'yɛr a yele nyãna a dɩna.

ⅩⅥ A poturbo pie nɩ bʊ̃'yen chen a Galilee a tɔ̃ɔ 'lɔ ju a Yesu na wiil ba ɩka ba do. ⅩⅦ Ban wa nyɛ wʊ, ba gbur dumo na ba puor wʊ tɩchɛ ka bamɩne chɛnɛ baala. ⅩⅧ Ka a Yesu wa 'yɛr kʊ ba, “A n Sãa den a kpãɛn ala a jaa na be a saaju, nɩ a kpãɛn ala a jaa na be a wɛr pɔ kʊ ma. ⅩⅨ A lɛ jũu, yɩ yɔ a wɛr wʊ jaa na yɩ tɩ 'yɔ̃ɔ paalsɩ ka ba wa turo ma, na yɩ suoro ba a Nãaŋmɩn kʊ̃ɔ, a Sãa yuor, nɩ a Bie yuor, nɩ a Nãaŋmɩn Sɩɛ yuor 'yɔ̃ɔ, ⅩⅩ tɩ na yɩ wile ba ka ba sɔɔ de, tɩ turo bon jaa ɩn 'yɛr kʊ yɩ. Yɩ bɔ̃ɔn ɩka ɩn ma ben a yɩ sɛ̃ sɔ̃ɔ jaa, tɩ tãn a wɛr baarfʊ daar.”