3
Jon ixo tagure a ngas
(Matiu 3.1-12; Mak 1.3-6)
1 Xö sangaun ma pitnö ne awat kö kinis ne warkurai re Tiberius, a king taxin mee Rom, nang e Pontias Pailat ixo sisila me Judeia, Erot ixobo kure sik e Galili me tönö re ine e Pilip ixobo kure sik e Iturea me Trakonitis, me Lisanias ixobo kure e Abilene.
2 Me Anas me Kaiapas idu toxo taxin ma toxobo sila sik köbo pris kabise. Ma a tinenge re God ixo ot pösöt e Jon, a barok ke Sekaraia, xö xönö tataun.
3 Ine ixo wan kö boxönö xirip lörörö xö Ari Jordan ma ixo etöngösen bara, “Mum moro kip lo a baptais sa osen bere mum moro dödöm puxus. Me God irabo döxömen taun abo magingin saban te mum.”
4 Ina na nang toxoro geet kölöme xö ginigeet köbo tinenge re propet Aisaia bira:
“A inöno öng i xukup kö xönö tataun,
‘Tagure a nuan möxö Orong,
ötöxödös a ngas sö ine.
5 Abo marasaa xirip tabo pömös,
ma abo puot ma kalala tabo pet eörin.
Abo ngas gege irabo töxödös,
mabo ngas gargaras irabo madalaan.
6 Ma a nangadi xirip tabo pere a ineöro mere God.’ ”
7 Jon ixo tengen kö marakörö nang toxo ot bara rö ine ra baptais idi, “Mum abo tene röxröxö! Ewe ixo panak e mum pa ulo rup kalik ina kinadik nang e God i lörörö ra isik?
8 Mum morobo mana pet abo lalaa nang irabo osen bara mum moxoro dödöm puxus. Me mum iat mum bele urulo rua döxömen bie: ‘Ire te ösöxö bara e Abaram i xarnang a tubuno ire.’ E tengen te mum bara God i öt sik ka öraru abo tubuno e Abaram meringan kinabo wat.
9 A matau tuar iang kö unine iaa, mabo iaa xirip nang tekara o abo pasuno deek, tabo tee ösu ma tabo tewe urungan kö könönö ia sösöt.”
10 Io, a marakörö toxo ose bara, “Mem marabo pet a sa?”
11 Jon ixo balu idi bira, “A tödi ma nine siot irabo erimine me we nang kawaim, ma ewe nang ma nien irabo pet bölök bie.”
12 Abo tene kip takis bölök toxo ot tua kip baptais me idi toxo eose, “Tene ausu, mem marabo pet a sa?”
13 Ma ixo tengen te idi, “I deek bara mum morobo kip eöt mon nang te kure bie, ma ganim a lexlexe inabo warkurai.”
14 Io, a dauleng ne umri toxo ose ine, “Ma a laa sanene nang mem marabo pet?”
Jon ixo balu idi bira, “Ganim a öparara lo a tuluwok kö nangadi ma ganim e mum pua wupuk a nangadi ma tinenge töxö, me mum morobo axanan lamun a xinixun te mum.”
15 Ma nangadi toxo xixiset lamun a inot kö Mesaia, ma toxo döxömen kö kat te idi bara e Jon gut ine ina Mesaia.
16 Jon ixo balu idi xirip, “E baptais e mum ma ari. Ma lamun önga tödi irabo wanot i taxin köba re e. E kobo töxödös eöt ta walwalas a kililöng kalik a nine sandel te ine. Ine irabo baptais e mum ma Töxödös ne Tanono ma ia sösöt bölök.
17 Me ine i tön sik a sawol te ine ra tewe öxaa abo irine wit kö xiki nang irabo paxat tewe abo lewene xalik abo irine. Lamun abo irine wit deek kölömene nang ixo tiip ma i subu, ine irabo iiögun arixin tingan kö öra ne nien te ine. Ma lamun ine irabo tewe rewe abo lewene irine wit urungan kölöme xö ia sösöt nang idi tekebeöt ta pus ömet.”
18 Ma arixe ma oleleng ne tinenge xabise, Jon ixo öxaxat a nangadi ma ixo palas tinenge ma tinenge deek urungan te idi.
19 Me Jon ixo köö e Erot a tödi raxin mee Galili ulamun e Erodias a une re tönö ine mabo lalaa saban kirip nang ine ixo pet.
20 Ma nang e Jon ixo pet bira, Erot ixo pet a laa saban tunon. Ixo baxut e Jon kö gunon ne aömokorot.
Jon ixo baptais e Jisas
(Matiu 3.13-17; Mak 1.9-11)
21 Nang Jon ixo baptais abo nangadi, Jisas ixo kip lo bölök a baptais. Ma nang ixo seseseng, a balana kubu ixo tamasawang
22 ma a Töxödös ne Tanono ixo wan su lömö re ine, ma ixo wawara bara ixo kip lo a aine xarnang a buno. Io, a inöno öng ixo ot meruso xö balana kubu ma ixo tenge bira, “Nöngön ano Barok ke e. E mamaa lamun me e axanan köba re nöngön.”
Abo untubuno e Jisas
(Matiu 1.1-17)
23 Me Jisas ine ixo öt ma narun ne sangaun ne awat nang ine ixo urulo a tinörön te ine. A dödöxömen kö marakörö bara ine a barok ke Josep,
a barok ke Eli,
24 a barok ke Matat,
a barok ke Lewi, a barok ke Melki,
a barok ke Janai, a barok ke Josep,
25 a barok ke Matatias, a barok ke Amos,
a barok ke Nahum, a barok ke Esli,
a barok ke Nagai,
26 a barok ke Maat,
a barok ke Matatias, a barok ke Semein,
a barok ke Josek, a barok ke Joda,
27 a barok ke Joanan, a barok ke Resa,
a barok ke Serubabel, a barok ke Sealtiel,
a barok ke Neri,
28 a barok ke Melki,
a barok ke Adi, a barok ke Kosam,
a barok ke Elmadam, a barok ke Er,
29 a barok ke Josua, a barok ke Elieser,
a barok ke Jorim, a barok ke Matat,
a barok ke Lewi,
30 a barok ke Simion,
a barok ke Juda, a barok ke Josep,
a barok ke Jonam, a barok ke Eliakim,
31 a barok ke Melea, a barok ke Mena,
a barok ke Matata, a barok ke Natan,
a barok ke Dewit,
32 a barok ke Jesi,
a barok ke Obet, a barok ke Boas,
a barok ke Salmon, a barok ke Nason,
33 a barok ke Aminadab, a barok ke Ram,
a barok ke Esron, a barok ke Peres,
a barok ke Juda,
34 a barok ke Jekop,
a barok ke Aisak, a barok ke Abaram,
a barok ke Tera, a barok ke Naor,
35 a barok ke Seruk, a barok ke Reu,
a barok ke Pelek, a barok ke Eber,
a barok ke Sela,
36 a barok ke Kainan,
a barok ke Arpaxat, a barok ke Sem,
a barok ke Noa, a barok ke Lamex,
37 a barok ke Metusela, a barok ke Enox,
a barok ke Jaret, a barok ke Maxalalel,
a barok ke Kenan,
38 a barok ke Enos,
a barok ke Set, a barok ke Adam,
a barok ke God.