A Tinenge Deek ke
Matiu
A nit ne Atöngösen Deek idi xirip te paraa pii ulamunon a to ma minet ma tinaru kaa baling kö minet te Jisas. A narun ne Atöngösen Deek ke Matiu me Mak me Luk te eöt sik mon kö oleleng ne pii ulamun e Jisas. A oleleng ne pii nang te pere kölöme xö Matiu, tabo pere bölök kölöme xö Mak me Luk. Ma lamun a Atöngösen Deek ke Jon i xabise, ma dauleng ne pii ulamun e Jisas kölöme re Jon, takarabo pere kölöme re Matiu me Mak me Luk. Ma lamun Matiu me Mak me Luk, idiet te xabise aulik bölök. Matiu ixo geet a pii ulamun e Jisas sua gene idi abo Judeia. Matiu ixo mamaa rua osen öturunonin bere Jisas ine a “Mesaia” (nang toxo tengen bölök bara ine e Krais), ina tödi nang e God ixo xuxubus mesila bara irabo wanot ma irabo öro a marakörö re ine ma irabo kure idi xö axana bung möxö xakawam. Ma ina Atöngösen Deek ke Matiu i wöwö ma oleleng ne tinenge re God toxo geet mesila, bara abo Judeia tabo perexulen bere Jisas ixo pet eörin inabo tinenge, io niang, ine a Mesaia, ina king ewe nang abo Judeia toxobo xisixis xiset bara irabo ölanglanga rewe idi. Me Matiu ixo geet bölök a oleleng ne ausu re Jisas. I wawara bara pitnö ne ausu raxin kölöme re Matiu (pere Matiu 5-7; 10; 13; 18; 24-25), ma abo pii ulamun a to re Jisas i kis kö boxönö xabise.
1
Abo untubuno e Jisas
(Luk 3.23-38)
Ina na abo ese xöbo untubune Jisas nang a barok tubuno e Dewit, me Dewit ine a barok tubuno e Abaram.
Abaram ine a tamana e Aisak,
me Aisak ine a tamana e Jekop,
me Jekop ine a tamana e Juda arixe mabo tönö.
Juda ine a tamana e Peres me Sira, nago re idu iang e Tamar,
me Peres ine a tamana e Esron,
me Esron ine a tamana e Ram.
Ram ine a tamana e Aminadab,
me Aminadab ine a tamana e Nason,
me Nason ine a tamana e Salom.
Salom ine a tamana e Boas ma a nago re ine iang e Rap.
Boas ine ixo a tamana e Obet, ma nago re ine iang e Rut,
me Obet ine a tamana e Jesi.
Jesi ine a tamana e King Dewit.
Me Dewit ine a tamana e Solomon, me nago re Solomon ixo une bang ke Uria.
Solomon ine a tamana e Reobam,
me Reobam ine a tamana e Abiya,
me Abiya ine a tamana e Asa.
Asa ine a tamana e Josapat,
me Josapat ine a tamana e Jeoram,
me Jeoram ine a tamana e Usia.
Usia ine a tamana e Jotam,
me Jotam ine a tamana e Aas,
me Aas ine a tamana e Esekia.
10 Esekia ine a tamana e Manase,
me Manase ine a tamana e Amon,
me Amon ine a tamana e Josaia.
11 Me Josaia a tamana e Jekonia mabo tönö xö ina axana bung nang toxo lamus inabo Israel uruo Babilon bara idi tabo kis singan xarnang abo osee.
12 Melamu idi toxoro kis xarnang abo osee ro Babilon,
Jekonia ine ixo tamana e Salatiel,
me Salatiel ine a tamana e Serubabel.
13 Serubabel ine a tamana e Abiud,
me Abiud ine a tamana e Eliakim,
me Eliakim ine a tamana e Asor.
14 Asor ine a tamana e Sadok,
me Sadok ine a tamana e Akim,
me Akim ine a tamana e Eluid.
15 Eluid ine a tamana e Eleasor,
me Eleasor ine a tamana e Matan,
me Matan ine a tamana e Jekop.
16 Jekop ine a tamana e Josep, a tödi re Maria nang ixo kip e Jisas, nang toxobo rengrengen ine me Krais.
17 Io, a sangaun ma nit ne mexubu meringan te Abaram urungan te Dewit, ma a sangaun ma nit meringan te Dewit urungan kö bung toxo lamus a bung Israel urungan Babilon ma toxo kis ee xarnang abo osee. Ma sangaun ma nit bölök meringan urungan kö bung nang toxo kip a Mesaia.
Maria ixo kip e Jisas
(Luk 2.1-7)
18 A pii möxö bung nang toxo kip e Jisas Krais ixo urulo bira: A nago re ine e Maria toxoro tengen pi sik ine bara irabo ot tue Josep, ma lamun nang kaim bang idu ra kinis arixe, toxo pere bere ine ma tienen nang a Töxödös ne Tanono ixo isik ot e Jisas Krais kö balana e Maria. 19 Ma a tödi re ine e Josep, ine a tödi töxödös ma i koxobo maa bara irabo ömenge ine xö wawara xö marakörö bara irabo wan kalik ine. Io, ixo mamaa bara irabo pet ödödöin mon.
20 Ma nang e Josep ixo dödödöm lamun ina laa na, a önga angelo ixo ot te ine xö wöpönöbö ma ixo tengen, “Josep, a barok ke Dewit, u bele buut ta lamus lo im e Maria xarnang a usuom, möxösa, a barok niang i kip sik, ine i ot meriso xö Töxödös ne Tanono. 21 Ine irabo kip a bak suxuruno, ma örobo tengen a esene me Jisas, möxösa, irabo öro a nangadi re ine xalik a magingin saban te idi.”
22 Inabo laa xirip na ixo ot tua wewet eörin a lasanene nang a Orong ixoro tengen sik kö propet bira: 23  “A une nang kaim bang ine ra minaru arixe mere tödi irabo tienen ma irabo kip a önga barok ma tabo tengen ine me Imanuel.” A unine möxö ina tinenge niang bira, “God irabo kis arixe me ire.”
24 Io, nang e Josep ixo laran ixo pet eörin iat xarnang a angelo xö Orong ixo töngösen ine bie, ma ixo lamus lo im e Maria. 25 Ma lamun kaim idu ra minaru arixe ot nang e Maria ixo kip a bak suxuruno. Ma ixo tengen a esene me Jisas.