Rokap na Fafas ulo Iesu Karisito
Jon
i siit u
Orek famu
Jon i neng lon nenge sangful ini u e kalalik na fafausum ke Iesu (par Metiu 4:21). I par ta foron tier ae Iesu i tel ta u ma ka ongen ta foron fafausum kia. I siit ta buk igii nami na ituul e buk igii, Metiu, Mak ke Luk. I ier le keren usum lo Iesu ke kerek unune lo, wara le lo Iesu sau, kerek kep liu fitliu (par Jon 20:31).
Nenge tier laumet ae Jon i ier le in fas kerer ini, i aragii: Iesu i e Kalalik ke God ma i tom e God. Na tanwaran buk igii, i famalal u le Iesu i e God ma aunbiing God biil biitom i fakiis ta piklinbat, ka kiis ta tura God. I fas kerer sabin ini foron rakrakai na fakileng ae Iesu i fatapiek ta u. Jon i foteng foron rakrakai na tier ae Iesu i fatapiek u, ini “fakileng”, wara le foron fakileng ae i fatekentu u le Iesu i e God.
Jon i fas kerer sabin le fanu fuun biil ri unune lo Iesu. Foron famfamu ken fan Iudaia sabin biil ri unune.
Buk ke Jon i aragii:
1:1-18 Orek ka tapiek kaltu
1:19-34 Jon Tom tel Bapitaiso
1:35-51 Berberat na fafausum ke Iesu
2:1—12:50 Foim ke Iesu
13:1—19:42 Farfarop na wik turan minet ke Iesu
20:1-31 Apaptifis ke Iesu
21:1-25 Iesu i tapiek sing berberat na fafausum kia
1
Iesu tom i e Orek
1 Na tanwaran fakfakiis, Orek ka kiis tah ma Orek i kiis ta tura God ma Orek tom i e God.
2 I kiis ta tura God na tanwara.
3 Na Orek sau, God ka fakiis foron tier tikii ma biil ti tier God i fakiis ta u na nenge sal keskes, biil. Na Orek tom.
4 Sing i tom e liu ma liu ae i e malal ken fanu.
5 Ma malal i popos una kubunor, isau le kubunor biil i to fasi in fapu u.
6 God i wuun ufu ta nenge kaltu, asa e Jon.
7 I la arae nenge tom fafas una famalal fanu ini malal ae, isi fanu tikii ae ri ongen u, rik unune.
8 I tom biil e malal, i la sau isi fafas ini malal.
9 Tekentu na malal ae i ta malal la usuf fanu tikii, ka tapiek mang aga na piklinbat.
10 I kiis ta na piklinbat. Taftawa le piklinbat i tapiek ta sing i tom, isau le fanu na piklinbat biil ri to iliim u.
11 I tapiek na maleh kia tom ma fanu kia tom biil ri to ier isi.
12 Isau le, fanu tikii ae ri ka somangat pes ta u ma ri ka unune ta na asa, ka somangat pes ri isi rin tapiek berberat ke God.
13 Biil ri tapiek berberat ke God wara ri pang namin mat, le namin wolwol ken kaltu, le na sinangun fakekel, biil. Lo God tom.
14 Orek ka tapiek kaltu ma ka liu na fatpoto kemem. Keme ka par ta u e memeh kia, i e memeh ke itikii sau e Kalalik ae i la tinbae sing Tama. I fuun ini famais ke tekentu.
15 Jon ka famalal fanu ini. I perek ma ka tarah, “Igii mang e ier ae ia use ta u le: I mi pes iau, isau le i laumet lo iau, wara le i liu famu ta tom lo iau.”
16 Ifuun ini famais ma tina famais kia, kere tikii kere ka kep fafakalok fafamih.
17 Lo Moses, God i ta ta foron nagogon usuf kerer, isau le lo Iesu Karisito ka ta famais ke tekentu.
18 Biil biitom tikas i par God, biil. Itikii sau e Kalalik ke God ae i tom i God, i kiis na baba Tama ke ka famalal u usuf kerer.
Jon Tom tel Bapitaiso i Famalal fafis u tom
Metiu 3:1-12; Mak 1:1-8; Luk 3:1-18
19 Jon i orek malal, aunbiing foron famfamu ken fan Iudaia tina Ierusalem ri wuun fale pris ke foron Liwai isi rin diik u le, “O seh?”
20 Biil i fun ti orek una kiliis ri. I use famalal u tom aragii, “Ia biil e Mesaia.”
21 Pesu, ri ka diik u le, “O seh? O Elaija?”
Ka kiliis ri aragii, “Ia biil e Elaija.”
Ke ri ka diik u sabin le, “Kol wo mang e Profet ae Buk na Gogoh i ororek ta isi?”
Ka kiliis ri aragii, “Biil.”
22 Namih, ri ka diik ta u la aragii, “Ma wo seh? On fas kemem ini ti orek isi kemek kep fafis u usuf fanu ae ri wuun ta kemem. O tara le wo se tom?”
23 Ke Jon ka kiliis ri ini orek ae na buk ke profet Aisaia, ae i tarah, “Ia kinen tikas i tautau na sunbiil aragii, ‘Fatortores sal sala Kumguui.’ ”
24 Foron Farasi ae ri wuun ta ri usuf Jon,
25 ri ka diik u aragii, “Le biil wo e Mesaia, le Elaija, le Profet, ke isi sa o ka baptais fanu?”
26 Jon ka kiliis ri aragii, “Ia baptais fanu ini dan, isau le awii na fatpoto gam e ier ae biil gam usum lo.
27 I mang e ier ae i mi pes iau ma biil ia tortores isi ifasi iak puk ufu finaun su kia.”
28 Foron tier tikii igii i tapiek na Beteni, na nenge baban dan na Ioridan, na falifu ae Jon i tel bapitaiso lo.
Iesu tom e Natun Sipsip ke God
29 Na biing namih, Jon ka par Iesu i la usuf i ke ka tarah, “Par u! Apiek e Natun Sipsip ke God ae in tel ufu sinang laulau ken fanu tikii na piklinbat.
30 Igii mang e ier ae ia use ta u le, ‘I mi pes iau, isau le i laumet lo iau, wara le i liu famu ta tom lo iau.’
31 Ia tom biil ia usum ta le i e seh, isau le wara ae ia ka baptais fanu ini dan, isi iak famalal u usuf fan Israel.”
32 Ke Jon ka ta orek an famalal kia aragii, “Ia par Tanwa Kalkaluu i filaupu arae nenge bun tinbae na kukulii ma ka kiis lo.
33 Biil ifasi ian usum ta lo, isau le, God tom ae i wuun ta iau isi baptais fanu ini dan, i fas ta iau le, ‘Kaltu sa on par Tanwa Kalkaluu in puh ma ka kiis lo, i sau e ier ae in baptais fanu ini Tanwa Kalkaluu.’
34 Ia ka par ta u ke ia ka famalal u le, i e Kalalik ke God.”
Berberat na Fafausum Famu ke Iesu
35 Na biing namih, Jon tinaiwa sabin turan iwu e kalalik na fafausum kia.
36 Aunbiing ka par Iesu i sobel rituul, ka tarah, “Par u! Ae kol e Natun Sipsip ke God.”
37 Aunbiing iun kalalik na fafausum ae ru ongen Jon i use ta u arae, ru apti sau ke ru ka mi lo Iesu.
38 Iesu ka giliim fis ma ka par ru mimi la lo, ke ka diik ru aragii, “Sani kamu ier isi?”
Ke ru ka kiliis u aragii, “Rabi, fia o kiis la wah?” (Rabi, kamtina le, tom fafausum.)
39 Iesu ka kiliis ru aragii, “Kamu la, isi kamuk par u.” Ru ka la ma ru ka par falifu ae Iesu i kiis la wah. Rituul ka tapiek na ifet e aunbiing ma ru ka melmel tura papang na aunbiing ka sup e pisiih.
40 Enru, tualik e Saimon Pita, i e neng lo ruh, ae ru ongen ta Jon i use u arae ma ru ka mi lo Iesu.
41 Tier famu ae Enru i tel u, i im isi Saimon Pita tualik ke ka fas u aragii, “Kama ka tafe ta Mesaia.” (Mesaia, na orek Grik le, Karisito.)
42 Ka lame u usuf Iesu, ke Iesu ka par u ma ka tarah, “Asam e Saimon, kalalik ke Jon. Rin foteng wo mang ini Sifas.” Sifas, na orek Grik le Pita, kamtinan as ae le, fat.
Iesu i Tawi Nataniel ru e Filip
43 Na biing namih, Iesu ka ier isi la una Galili. Ka tafe Filip ke ka fas u aragii, “Mi lo iau.”
44 Filip i tina maleh na Betsaida, na maleh sau ke Enru ru e Pita.
45 Filip ka tafe Nataniel ke ka fas u aragii, “Keme ka tafe ta kaltu ae Moses i use ta u na Buk na Nagogon, le in tapiek ma foron profet sabin ri ororek famu ta isi. I e Iesu tina Nasaret kalalik ke Josep.”
46 Nataniel ka tarah, “Tina Nasaret? Ifasi le ti tier rokap in tapiek na Nasaret?”
Filip ka kiliis u aragii, “La ugapiek, isi ok par u.”
47 Aunbiing Iesu ka par pes Nataniel i la usuf i, ka fas fanu aiwa tura le, “Igii mang kol e sikin Israel tekentu, ae biil i lem la.”
48 Nataniel ka diik Iesu aragii, “O usum lo iau arafah?” Ke Iesu ka kiliis u aragii, “Ia par ta wo tom awii na piklin au na fik, aunbiing Filip biil biitom i tawi pes o.”
49 Aunbiing Nataniel i ongen u arae, ka tarah, “Rabi! O Kalalik ke God ke o King ken fan Israel.”
50 Ke Iesu ka tara sing i aragii, “Arafah, o unune sau wara ia fas ta wo le, ia par o awii na piklin au na fik? Nami on par in fuun biitom e tier laumet na neng igii.”
51 Ke Iesu ka tara sabin aragii, “Tekentu kanaka ia fas gam, gamen par kukulii in sapeng ma foron angelo ke God rin fen ke rik pu lon Kalalik ken Kaltu.”