9
Yuda maqannaasa narí maqannaasa mandaikamma nimaqaqau.
Mikari Adara uqoona 13 faasaana aniroofanoo indaaaruqaa kinna fannoo qinau, mi faasaanna kai namuqaauqa Yuda maqannaasa mandaikamma nimaqasee naru taikeefaranoo. Miqi qufaqa Yuda maqannaasa findifufaqa misa rafaaqafusee aiqama naru taikaqau. Yuda maqannaasa kinna fannoo rakisi maru maqusausakiaqa faqa maqa maaqanaki marusa misa namuqaauqa misa faqa rakirara anufaqa rakirara deedaqiqau. Aiqama fasiqa anaasee aiqama tinaindaraasa Yuda maqannaasara rufiasee misaki sia moo ainaina auqeefaranoo. Aiqama maqa maaqakinaa kiapausa faqa kaammannaauqa faqa aiqama kinna ainainasaa rakisi marusa faqa Yuda maqannaasa dadaaqiqau. Misa Moodeekainara rufiasee miqiqau. Aiqama fasiqauqa kinna rakisimaru maqa maaqanakinaasa irufanoo kinna fannoo firaa afeeka faqa uriqarara auqu faqa Moodeekaina aminau. Amisoofanoo mina afeeka aiqama kari uriqaranoo uqanna marinau.
Marufaqa Yuda maqannaasa nári namuqaauqa nariqau. Misa kisaaqa paipanannai rakidaqa nariqa namuqaauqa naru taikaqau. Susa firaa maqusaki Yuda maqannaasa 500 fasiqa kuqa nariqau. 7-10 Amannana faiqi namu qisaukuqara taikasee 10 mariqau. Yuda maqannaasa namuqaauqa nuqu maaqimminoo maridanoo. Parasadataafa faqa Darfoonafa faqa Asbatannafa faqa Pooratanafa faqa Adarianafa faqa Aridatanafa faqa Parmastanafa faqa Arisainafa faqa Aridainafa faqa Uaisataanafa faqa minamusa ainaina kai Yuda maqannaasa sia maraqau.
11 Mi faasaana kai Yuda maqannaasa naqumma fasiqa Susa maqusaki narunara kinna qimamiqau. 12 Marikinoo kinna fannoo kuinna Estaa nammarina qimaminau. Yuda maqannaasa 500 fasiqa Susa maqusakinaasa kuqa nariaafoo qinau. Misa Amannana faiqi namu qisaukuqara 10 faqa kuqa nariqau. Qinee iruna misa akaqa maqa maaqaki moomoo fasiqa faqa kuqa naria. Anee maqee nana ainainee akaqa ainaina mararee qinaqa, qinee amana ani amianauranoo. Esta anee nana ainainaree aidinna ainaina kaqi maraa.
13 Estaa nammarifa kaifaa kinna qimaminoo qinau. Rakisirafa ani aidinana duna Susa maqusaindaraa Yuda maqannaasara qinaqa namuqaauqaki duna faqa maqee iandee kai iaqa. Misa Amannana faiqi namu qisaukuqara taikasee 10 mariasa mi faakannanasaa diriaqa.
14 Doo kinna fannoo misara miqiaqee qimaseenoo mifa mi ufana Susaa maqusaindaraa fasiqauqa unnai afeeqoofanoo fufaqa misa Amannana faiqi namu qisaukuqara taikasee 10 marusa faakana rakiaqoonasa dirimarufaqa aiqama fasiqauqa qafaqau. 15 Adara uqoona 14 faasaanasaa Susa maqusai maru Yuda maqannaasa kaifaa ruqaumma fufaqa 300 fasiqa mi maqusanaki kuqa nariqau, narusee sia misa ainainauqa maraqau.
16 Yuda maqannaasa akaqa maqa maaqaki marusa misa faqa moodaanakika mafiqa afeekaika masee misa narusee misa amiqimmasee marifaranoo. Misara nikooqee maru namuqaasa 75,000 fasiqa anaasee kuqa nariqau. Narusee sia misa ainaina maraqau. 17 Mi rakirafa maqa maaqaki 13 faasaana Adara uqoonaki kambiqanau. Kafa 14 faasaana misa sia nári namuqaa nariqau. Mi faasaana misa idooaidaqa firaa qoomaqa sakasee naidaqa firaaqoo asasi mariqau.
18 Misa miqi marufaqa Yuda maqannaasa Susaa maqusaki marusa misa 15 faasaanara idooaidaqa asasira faasaanee qimasee utaaqaqau. Misa namuqaauqa 13 faasaana faqa 14 faasaana faqa narusee 15 faasaana misa sia rakiqau.
19 Minara kai Yuda maqannaasa kaqikaa maqusauqa uqusa sia auqiranakiaqa mariusa misa Adara uqoona 14 faasaana firaa oomaqa naidaqa ainaina narami naramira faasaanee qimasee utaaqaqau.
Misa firaa oomaqa auqureeqa Purimma oomaqa fee qimariqau.
20 Moodeekaifa mi faasaanna aiqama ainaina auqoo ainaina akara rumaseenoo Yuda maqannaasa nianai marusa faqa adeedi marusa faqa kinna Serkisisafa rakisi nimaqee maru maqa maaqanakinai marusa nimaqanau. 21 Misa Adara uqoonaki 14 faasaana faqa 15 faasaana faqa aiqama aukuanaki asasira faasaana utaaqaaqee qimaseenoo qimanniminau. 22 Mi qaara faasaanna Yuda maqannaasa nári maqannaasa niiaqau. Mi uqoonnanaki kai misa naundura ummaara reereeufa faqa aiaaee qiqiufa faqa taikoofaqa Yuda maqannaasa nimuqusa amiqinau. Miqufanoo Moodeekaifa mi qaara faasaanara firaa oomaqa sakasee aqoondiuqa faqa kudi fasiqauqa nimiaqeera qimanniminau.
23 Miqi qimasoofaqa Yuda maqannaasa Moodeekaina ufa afaqeeqa aiqama aukuanaki mi oosannana auqaidaqa asasi mariqau. 24 Ooqai Amannafa Ameedatana amaaku Akaakana faiqi anaiqi maridanoo mifa Yuda maqannaasa namuqaakamma nimaqaseenoo mifa misa aiqama kuqa nariraree qimaseenoo satu sararidanoo misa narira faasaanara randee marinau. Misa Heeburu maqannaasa ufakiqari satura rarisaidanoo fee qimasee auqu ree mariqau. Amannafa aiqama Yuda maqannaasa naru taikaani qimasee ufa rumbee marinau. 25 Ufa rumbee marufanoo Estaa nammarifa kinna unnai oonuroofanoo kinna fannoo maaqi qimasee papiqa akara rinau. Ooqai Amannafa Yuda maqannaasa kuqa nariraree qinau, maqee nári kuqa aruaqa qufaqa misa mina diriseeqa inaaqianna mina faiqi namu faqa misa mi poosanasaa kai diriqau. 26 Mi oosannara kai misa mi idooqara faasaana qandara maaqi qimasee auqu raqau. Purimma faasaanee qiqau. Misa purimma fee qimaru auquna oosana satu maridanoo. Misa mi oosanna auqaidaqa mi ainainausa misaki kambiqoonara oonu mafi irimariqau. Irimarufanoo Moodeekaifa misa unnai papiqa afeeqaseenoo misa mi faasaana idooaaqeera qimanniminau. 27 Yuda maqannasa mina mareeqee narí faqa misa ninaiqi mara inaaqianna kambiqainausa faqa aiqama fasiqa minaki ani keeqainausa faqa sandufaika maqoofanoo marinau. Aiqama aukuana misa mi qaara faasaanafa aniroofaqa misa Moodeekaifa qufanoo mi ainainafa kambiqoonara oonu mafi irimariqau. 28 Misa maaqi qiqau aiqama Yuda maqannaasa moodaa moodaa oosana kasooaqee inaaqianna kambiqainausa faqa aiqama maqa maaqaki faqa aiqama maqusaki faqa maru fasiqa anaaseesa misa mi firaa masisa aqira faasaanara oonu mafi irisaidaqa aiqama aukuanaki miqoo kai idooaidaqa asasiaqa.
29 Kuinna Estaa nammarifa Abiaina araamuna Moodeekaisandiri miqanda Yuda maqannaa qanda miqanda moo papiqa mi qaara faasaana masisa sararu ufana akara riqau mi oosannanannai kuinna fanno indaaruqaa papiqa Moodeekaifa nariara akara rumaqoona afeekaikinau. 30 Miqanda mi papiqana uqasoofanoo Peereesiaa maqa maaqaki 127 (provinsaki) Yuda maqannaasa marunakinai papiqa maaqi qimasee akara rumasoofanoo fifaininau. Inni nimuqusa ireeda marinaqa innee amiqira ooqu marirana maraaqa sia rakirafa maridanoo. 31 Innee faqa inni ninaiqi mara kasooaqee kambiqainausa faqa innee afeekaikammasee inneeqa mariaqoo mi firaa masisa sararira faasaannana umaraaqa. Innee narana aurarana faqa nimuqusa ummaarara oosana afaqararana faqa iki raqarana faqa mi sandufana uaqeeufaqa qinee Moodeekaisa kuinna Estaa nammarisandiri maaqanda maa sandufana inni nimiqa. 32 Estaa nammarina mi sandufana masisa sararira sandufauqa afeekaika masoofaqa misa moo papiqasaa akara rumasee uqaqoofanoo marinau.