3
Nimaarusiranara faqa Yisunasaa rusiranara faqa Pauroofa mi ufa qandara qidanoo.
1-2 Oo Karatia maqannasa innee furufari mariasa yafee inni mandirirana naakunimaqeenoo fee Yisunasaa rusirana afainoo fee. Qinee Pauroosa inni Karatia maqannaasa nifusaa asauku mundirafa aunirira saqarisaa kuqunara amiqimasee kooroomasee inni nifusaa qimannimiafanaqa inni nifusaa kuqinoora fooqaana innee amiqimasee irimariafanoo, doo maa moodaa ainainara kai irammirianaqa qimaqimiaqa, innee Mooseena sandufa maraqa nuana minannai fee Anutuna maraquna maraaqee iqau, Yisuna amiqira fasaasa ufa irisee irirana minasaa rusiranannai fee Anutuna maraquna maraaqee iqau, minasaa irirana rusiranannai kai maraqau.
Innee naqiaqooqari fee firaa furufariranaki fi fee, innee Anutuna maraquna naakusee minannai oosana arasee andeeqasee fidaqa kafaa maqee mariaqooqari nanaree innee mina afaimma quqasee faiqí faiqi iriranamau maqee maaqooqari fidee.
Indaaru Anutuna maraquna inni naakufufaqa amiqira oosana inniki kambiqafinau doo maqee innee minara fifau ainainee fee qidaqee. Sia fee innee minara iriafanoo nimuqusidanoo fee. Anutufa narí maraquna afaaramasee inni maqee maqee nimidanoo faiqí sia auquaqaa ira ainaina auqimarifaqa innee qafee mariafanoo. Innee Mooseena sandufamau fimarianara Anutufa narí maraquna inni nimidanoo fee amiqira fasaasa ufa iriqa irirana minasaa rusimarianara Anutufa narí maraquna inni nimidanoo fee. Minannai kai narí maraquna inni nimidanoo.
Oosana aroo ufafa irirana rusimarianara maaqi qidanoo Abarahaamana auqu ramasee mina kikiqusinoo maaqi qidanoo. Ooqai Anutufa Abarahaamana nauraiqi marufanoo qimaminau.
Abarahaama anee faiqi siaifa mariananoo anee moomoo maqusanaasa nikoofa marinnaranoo.
Abarahaamafa mina iriseenoo oo kuqaa kambiqaannoo qimaseenoo narí irirana Anutuna ufasaa rusisee afaaqa quqasee marinau. Anutufa Abarahaamafa narí irirana Anutunasaa rusisoona qafamaseenoo minara maaqi qinau. Oo doo Abarahaamafa qini Anutufa innaarunai firana amana kai mari fasiqafa maridanoofee qinau. Qinee Pauroosa minara maaqi qidaqa innee Karatia maqannaasa amiqimandee maana iriaqa. Kuqaa Yuda maqannaasa Abarahaamana maqasaaqaraa ati mina moodaa maqannaasa mariafanoo Anutufa Abarahaamana atiara moosee qidanoo maaqi qidanoo. Abarahaamana aanna reemariasa Anutuna ufasaa irirana rusimariasa misa kai Abarahaamana aiku asauku anoona uqanna maridaqa. Anutufa ooqai indaaru aanaamuru maqannaara nári irirana Anutunasaa rusinausa Anutuna innaarunai firana amana keeqeefandiafoo qimasee akara rumaqoofa maaqi qinau.
Anutufa ani Abarahaamanasaaqari aruruki akinanoo aiqama maa maqa maaqana afaaqasasa mariasa amiqi amiqimma nimaqaannoo fee qimaqoofa maridanoo.
Anutufa qufanoo Abarahaamafa mi ufana nariara irisee doo kuqaa fee qunara Anutufa Abarahaamana amiqi amiqinau. Doo maqee aukuana miqi kai iqa aiqama irirana Anutunasaa rusimariasa Abarahaamanasaaqaraa amiqi amiqirana Anutufa raina nimidanoo.
10 Aiqama maqannaasa Mooseena sandufamau fidaqa minannai Anutuna innaarunai firana amanaikidaqa keeqaanauree qimariasa aaqamaki Anutuna niqurararufa nimaarusirufa ameemaanai maridaqa. 11 Tamummaqara fasiqauqa akara minara maaqi qinoo maridanoo,
Anutunasaa irirana rusimarianannai Anutuna innaarunai firana amanaikiranaki keeqeemariasa misa kai maqee oosana arasee naaru marirana mareefaranoo.
Maasa mina irisee maa ufanara kooroo ifoo qidaqa sia faiqí moo fannoo Mooseena sandufa mararanannai Anutuna innaarunai amanaikiranaki keeqaannoo. 12 Mooseena sandufa sia Anutuna saqarikirafa minasaa mundinoo maridanoo. Mooseena sandufa fannoo faiqí minasaa kaaqa andeeqasee firafa minasaa mundinoo maridanoo. Tamummaqarausa akara minara maaqi qidanoo,
Mooseena sandufamau kaaqa andeeqasee fimarifa kai naaru mariranaki keeqaannoo fee qimasoofaqa maasa sia amanaikidaqa sia keeqaanaura.
13 Asauku mundirafa Mooseena sandufamau fimariasa Anutuna niqurararufa ameemaanai rumbaqa marunara iriseenoo asauku mundirafa narí kai Anutuna niqurara ufaikamambinoo maasa daaqa qumureenoo minaki rumbaqa marusa idukuqisanau. Tamummaqara fasiqauqa akara minara maaqimminoo maridanoo.
Saqarisaa dirifi kuqimariasa aiqamausa Anutuna niqurararufa ameemaanai mariasa maridaqee qidanoo.
14 Asauku mundirafa saqarisaa dirifi kuqinau. Anutufa ooqai Abarahaamanasaaqaraa amiqi amiqirana aanaamuru mariasa nimianifee qimasoofanoo asauku mundirafa saqarisaa dirifi kuqinau. Asauku mundirana Yisunannai aanaamuru mariasa Anutufa Abarahaamanasaa qima afeekaikira amiqi amiqirana misa faqa raina mareefaranoo. Maasa faqa qeeqa Yisuna saqarikiranannai Anutufa narí maraquna nimiraree quna faqa maraanaura.
Nimaarusira ufara faqa qima afeekaikira ufara faqa Pauroofa qidanoo.
15 Oo qini qikaqaafasaauqa maasaki mari ainaina kikiqususee qianauranoo. Faiqí qaaraqanda moo ainainara qimasee qima afeekaikamasee mi ainainna papiqasaa akara rumasee nariqara nuqu minasaa akara rumasee sia amana mi ufana minniseefara, mi mau kai fifaranoo.
16 Miqi kaimmasee Anutufa narí qima afeekaikira ufa Abarahaamanasaa faqa mina atisaa faqa quqaseenoo akara rinau. Ooqeenaa akara fannoo sia narí atiuqa moomoo fasiqa anaaseera qidanoo. Mifa maaqi qidanoo, ani ati kaimma qima afeekaikirana amianauree qidanoo asauku mundiranara moodaara qinau. 17 Qinee Pauroosa minara maaqi qidaqa Anutufa Abarahaamana narufa amiseenoo doo qinee mi mau kai fuanaureeqimasee qimafeekaikinau. Miqooqari (430 aukuana) aukuana moomoo uqanna aiqara mafufanoo Mooseena sandufa fannoo kasooqaqee innaaqiana kambiqafinoo sia amana Abarahaamana qimamu ufana rafaaqafuannoo kaqi mariannoo. 18 Anutufa Abarahaamanara Kannaa maqa maaqakinaa saqama namufaqa faiqi namufaqa aiku asauku namufaqa amiraree qimasee Anutufa mi maqa maaqa saqamana Abarahaamafa narí sandufamau funara sia irirai ooqai narí qima afeekaikammaqoo iriranasaa narí afaarinoo aminau.
19 Maasa minara irisee Anutufa naqiraree sandufa Mooseena aminoo fee inau. Mooseenakiqari fifiufanoo Anutufa qima afeekaikira ufa qimamufa Abarahaamana ati anoona uqanna kambiqaaninanaki Mooseena sandufa taikaannoo. Mi qambaana kamusaqanna aaqarana kooroomma nimaqaanifeera Anutufa mi sandufana quqanau. Anutuna qangiroouqa mina sandufa Mooseena amufanoo Mooseefa Anutuna faqa maqasaa fasiqa faqa aanaiqikinoo maridanoo maqasaa narí aqoonausa niminau. 20 Anutufa sandufa quqeemarufa faqa faiqí anaasee mi ufamau fimariasa faqa marianara aanaiqikirafa Mooseefa mina qambaana maridanoo. Abarahaamana qima afeekaikirana amuaukuanafa sia miqinoo maridanoo. Abarahaamafa sandufamau firafa sia marunara aanaiqikirafa faqa sia marinau. Anutufa naríara qima afeekaikira ufannoo Abarahaamana qimaminau. Maasa minara uriqarara oosanee qidaqa.
Nimaarusira ufa oosanara kooroo idanoo.
21 Maasa minara iridaqa Mooseena sandufa fannoo Anutuna ufara qima afeekaikirufa Abarahaamana amunafa rafaaqafidanoo fee qianauree. Sia amana rafaaqa fuannoo. Mooseena sandufa oosana maaqimminoo maridanoo. Faiqí anaasee Mooseena sandufamau fidaqa mina akiaqara sia amana naaru marirana mareefara. Miqira sandufa Anutufa sia niminau. Niminaqau mi sandufana mareefau innaarunai fini. 22 Ooqeenaa akara fannoo aiqama maqannaasara nári mandoosana afeeka ameemaanai kuridiranaki maridaqee qidanoo. Qinee Pauroosa minara maaqi qidaqa Yisunasaa irirana rusimariasa Anutufa narí qima afeekaikamandee maqee oosana arasee naaru marirana nimiannoo fee qidaqa, mi nimirafa asauku mundirana Yisunasaa rusimarianasaa mundinoo maridanoo. Aiqama ainaina nári mandoosana afeeka ameemaanai marianara Yisunasaa irirana rusimarianannoo kai aikaquannoo.
23 Yisuna saqarikira aukuana sia maruqoo Mooseena sandufa fannoo mina afeesidanoo maasa karabusara foora rumbaseenoo maramareenoo Yisuna saqarikira aukuana kooroomambufanoo minaki quqaqisanau. 24 Asauku mundirafa qumuaninna aukuannasaa Mooseena sandufa fannoo maasa uqannifiqara fasiqara foora marinoo maasa Yisuna saqarikiranannai Anutuna finnai innaarunai firana amanaikiranaki keeqaaqeera maasa nifiqamaree asauku mundirana aaqa munu qisanau. 25 Doo maqee Yisunasaa rusirafa ani maridanoo ooqai uqaqifiqee marufa Mooseena sandufa sia maqee rakisi nimaqaidanoo.
26-27 Innee aiqama Yisuna saqarikiranannai asauku mundiranaki keeqafi marianara Anutuna amaaku kamambi marianara innee inneeqa nammari maroonannai innee asauku mundirana andeeqara marirana qamunnara foora akumaree minaki fuaqa. 28 Doo minakiqari sia Yuda maqannaasa faqa aanaamuru faqa naaduma moo kiqa maridaqa sia karabusa ainaini mariasa faqa idukirausa faqa moo kiqa mariafanoo sia faiqí faqa anaasee faqa mookiqa mariafanoo amana amana kai mariafanoo. Innee aiqama asauku mundirana Yisuna faqa moodaanaki maridaqa aiqamausa amana amana kai moodaa mariafanoo. 29 Innee asauku mundiranaindi marianara Abarahaamana ati mariafanoo. Abarahaamana atiuqa marianara Anutufa Abarahaamana amiqi amiqirana qima afeekaikuna mi amiqi amiqira ainainna kasooqaqee innaarunai inni faqa nimiannoo.