5
Pauroofa idukiranaki mariasara amiqimasee rakisi qumaraaqee qufa.
1 Asauku mundirafa Mooseena sandufakinaana idukueeqee narí idukiranaki quqaqaifaqa maasa minaki maridaqa, doo minara iriseeqa idukira fasiqara foora doo minaki mapukusee maridaqa sia kafaa sandufa oosana oosana rumbaranaki firaree qiaqa.
2 Innee maana iriaqa qinee Pauroosa qimannimidaqa, indaaru innee asauku mundirana saqarikiqau. Kafaa maqee moo fannoo inniara Yuda maqannaasa fainanduquseeqa Yisunasaa ookaamambiqa innaarunai fuaqee qinaqa innee miqifanoo Yisufa sia amana inni dadaaqiannoo fifau ainainara foora mifa maridanoo.
3 Qinee kafaa qimannimianaura afeekaikammasee qimannimianaura moo fannoo inniara Yuda maqannaasa fainanduquaqee qinaqa fainanduquseeqa Mooseena sandufa ameemaanai doo minaki oonuraafanoo sia Yisuna namufaqa fuaqa mi mau kai fuaqa.
4 Mooseena sandufannai Anutuna innarunai amanaikiranaki firaree qimariasa doo Yisunasaaqaraana doo inneeqa ateekaseeqa mariafanoo Anutuna kaqi afaarinoo nimiranasaaqaraana aqoosai mariafanoo.
5 Maasa sia miqidaqa sia sandufasaa ookaaidaqa, maasa irirafa Anutunasaa kai mundiqa maridaqa mifa narí kai maasa mareeqeenoo narí innaaruna amanaikiranaki quqaqiseenoo fee qimasee irirana minasaa kai rusisee maridaqa. Inniqasaimbaqa Yisuna saqariki marunanoo Anutuna maraquna fannoo minasaaqari maasa dadaaqifaqa maasa Anutuna innaarunai keeqaannanara asasamandee afeesidaqa.
6 Maasa asauku mundirana Yisuna faqa moodaanaki maridaqa Yuda maqannaasa fainanduqirana faqa sia fainanduqirana faqa miqanda fifau ainaina maridaqa. Anoona ainaina maaqimminoo maridanoo. Nariara nariara uriqarara ainainee qimasee nariara nariara amuqusirafa inni Yisunasaa rusirana akooroo imarifa mi ainainafa anoona uqanna maridanoo.
7 Oo Karatia maqa maaqaki mariasa innee amiqimasee mi mau fimarusa mariafanoo, nanaree innee maqee anoona ufa minnisee mandoosana maree fee.
8 Anutufa inni naarammeeqee Yisunaki quqee marifa mifau inni mareeqee kaqi runna quqeenoofau.
9 Faiqí moo fannoo adudu fooqaafa inni qambaanai moodaa mari ifa mifa kai aiqamausa radiqifinoo inni nifaaqai sukaqamannimaqaifaqa aiqamausa kaqirunna firaridaqa.
10 Qinee Pauroosa inni Karatia maqa maaqaki mariasara andeeqara aatata firanara iridaqa, maridaqa. Maasa inni faqa karaambaiqasaa atooaqa marirafa qini qifaaqa quqarana qimidanoo, inniara sia moo iriranamau fifaranoo fee qidaqa inni mara moo aatata ubeekee mari fasiqausara qinee sia iridaqa, Anutufa misa naruannoo fee qidaqa.
11 Oo qini qikaqaafasaauqa qeeqara qimannimianauranoo qinee Yuda maqannaasa fainanduqira ufa asauku mundiranasaa ookaammasee minannai innaarunai firaree qimariana mi ufana maqusa maqusa qinee qimannimi marianaqau misa sia maqee maqee qini darimariaqini. Fainanduqira ufa Yisunasaa ookaairafa anoona marinoofau qinee asauku mundirana aunirira saqarisaa arunara qimannimianaqau sia daruqini. Yisunasaa mundirunara kai qimannimimarunaqa iridaqa darimariafanoo.
(Misa mi aukuanna faina kafaqianda uqidee qimasaida Yuda maqannaasa maasa Anutuna faiqi namu fee qimariqau. Nifaandama itirausara inni nianasaa naadumasaa mariaqee qimariqau. Pauroofa minara irisee maa ufana qimanniminau.)
12 Inni Karatia maqannaasa mareeqee moo aatata quqeemariasara qidaqa misa nári fainanduqiranara kai qidaqa nári nifaandama itirana faqa minaki ookaammaseeqa doo naadumasaqanna maridaqa sia aaqaranaki inni fuki faaki qima quqaaqeera.
13 Oo qini qikaaqaafasaauqa inniara qinee qianaura. Innee inneeqa mandainaina rumbaranaki mariafanoo Anutufa minakinaana inni naarameeqeenoo Yisuna idukiranaki quqeenoo. Doo innee minaki maridaqa inni nifaaqa manda nidimari ainainafa sia quandakinoo innisaa rakisidanoo inni nikaruqiranannai minni ubeekamannimaqaani. Sia miqiaqa maaqiaqa inneeqa nariara nariara rirafa nimudaoo qirafa inni nifiqeeqeenoo nariara nariara dadaaqiranaki quqaani.
14 Mooseena sandufa aiqamatia maa moodaa ufanaki anoona kambiqaidanoo, mi ufafa maaqimminoo maridanoo. Innee inneeqa niqoonausara inniqa nifaaqara foora nidinaqa dadaaqiaqa.
15 Innee aandaura foora narí aidafirana narí aidafirana narí ukaqami narí ukaqami irana narí ami narí ami idaqa rufiaaqa qusaasa innee narinni narinni naru taikaseefaara, minara nariara nariara nidiranara qidaqa.
Pauroofa maqasaaqaraa irirana faqa maraquna irirana faqa miqandara qimaqoo ufafa.
16 Qinee Pauroosa minara inni qimannimidaqa. Sia innee inniqa maqasaa irirannai ubeekaaqa. Anutuna maraquna fannoo inni naakinoo marifa maqee maqee inni naaqooki amiqira oosana maraaqeera qimaseenoo mandoosanara aaquqidanoo. Innee mi ufamau fiqa sia uqanna inneeqa maqasaa iriranamau fifaranoo.
17 Maqasaa fasiqa anaasee maqasaa irirafa faqa Anutuna maraquna aidimari ainainafa faqa maasa naunduraki narí maqauruamaqee narí maqauruamaqee idaqa miqanda namuqaa marianara innee firaree qimariaqoo sia amana fifaranoo. Minara innee Anutuna maraquna ufamau fuaqa.
18 Anutuna maraquna fannoo inni rakisifaqa innee sia Mooseena sandufa ameemaanai mariafanoo.
19-21 Faiqí faiqi maqasaa irirana oosana kaqi akooqoo maridanoo. Mina oosana maaqimmasee koorooidanoo, faiqí anaasee narí ummuari narí ummuarirana faqa adi namufaqira oosana oosana faqa irirana siaisa furufarida kaqi mandainaina maraqanuana faqa saqarinnai unnaqira Anutuna amana auqusee irirana mina amimariana faqa aukainaina ufaaqa afaannainaina maraqanuana faqa, faiqí anaasee namuqaa kirana faqa rakirana faqa rairaiqirana faqa qusufa qimasee aanooqirana faqa, aiqama ainaina náriara kai fatusimariana faqa, naadu naadu rakeekaammasee nariqa kai naadu naadu suqimariana faqa, nariara nariara rairai qimariana faqa nammari namasee furufarirana faqa, misa suqufifaqa oosana oosana mandoosana uqeeree mariana faqa oosana oosana mandoosana maraidaqa. Qinee ooqai aaquqima nimaqaafanausa kafaa maqee faqa aaquqimannimaqaidaqa, mi oosanna maree mariasa sia uqanna Anutuna ququsaki keeqeefaranoo.
22-23 Anutuna maraquna fannoo sia miqi maria mandoosanakina uqannifiqaidanoo. Innee mina ufamau fifanoo inni mareeqee amiqira saqari qaqammara foora ireefaranoo. Maa amiqira oosanausa ireefaranoo, nariara nariara uriqarara ainaina maridee qimasee nariara nariara rirana faqa Anutunara asasirana faqa naunduraki asooarana faqa faiqí aanaaseera reendeenira irirana faqa amiqimandee dadaaqi mariana faqa afaarirana faqa amiqira ainaina afaarirana faqa sia minnisee firafa miqookai marida auqainna ainaina auqaida marirana faqa fisoofisoommasee ufa qirana faqa narí mandoosanara akooqamasee andeeqasee fimarina faqa Anutuna maraquna fannoo mi ainainausa kai uqannifiqaidanoo, sia moo sandufa fannoo mi amiqira ainainausara qaoo qiannoo.
24 Asauku mundirana Yisunaindi mariasa misa nariqa faiqí faiqi irirana marirana faqa nári maqasaa irirana faqa aunirira saqarisaa Yisuna namufaqa kuqa kai aru quqee mariasa maridaqa.
25 Anutuna maraquna fannoo maqee oosana arasee naaru marirana qimimarifa marinara mifa kai maasa marirana nirana rakisiani.
26 Sia maasa qeeqara doori uqeeraseeqa amiqirausee qimasee qeeqa qimooqia sia nariara nariara sukufa qia sia nariara nariara rairai qiaqa.