37
Yooseefaana faqa mina afasausamara faqa ufa.
1 Yakooboofa narí akoofa Isakeefa mariu maqa maaqana Kannaana maqa maaqaki miqoo kai marinau.
2 Maa ufafa Yakooboona faiqi namu ufa maridanoo. Yooseefaafa kumaaraa maridanoo qisauku qara taikasee qiku dinni taikasee dinni oonu qaara marasee 17 aukuana faqaafa maridanoo narí afasausa faqa sipsipauqasaa faqa mimmiuqasaa faqa rakisimarinau. Narí akoona ainainira anaasee qara Biriqaa nammarisa Siripaa nammarisa faiqi namu faqa nidanoo rakisi marinau. Mina afasausamara manda oosana auqoonara narí akoona qimami marinau.
3 Yakooboofa aiqama narí faiqi namuara aidimaruna uraaqaramaseenoo Yooseefaanara aidi marinau. Mifa asooqa namuki maqoonara kaaqa minara aidi marinau. Mifa kisaaqa qamunna kisaaqa asauku faqaana auqu aminau.
4 Mina afasausamara qafoofanoo misa nikoofa Yooseefaanara aidi marufa uriqaranoo marufaqa misa firaaqoo uqanna naundura mandaiki marufaqa mina faqa ufa qimariqau.
5 Moo eendaki Yooseefaafa qainammaseenoo qafanau. Minara narí afasausa mara qimannimufaqa firaaqoo uqanna fidiaqaamma amaqaqau.
6 Yooseefaafa maaqi qimasee narí afasausamara qimanniminau. Qini maa qainnana iriaqa.
7 Maasa aiqamausa qafuqaki maridaqa raisa fooqaairana ateekasee rumbasee narisaa narisaa mundiiqaunanoo innindi fannoo maqasaa aqufifanoo qinindi fannoo andeeqasee kikiqinoo mariinoo. Innindi fannoo qinindi oosanaki aqufifanoo fiqu fiqumma datimmafinoo ammuqu namu rambaqaki oosanai quminoo.
8 Miqi qimasoofaqa mina afasausamara aqiqa qiqau. Kasooaqee anee karaambaiqaika mafi maasa rakisiqimaqeennaree. Miqi qimaseeqa mifa qainunara faqa misara qunara faqa iriseeqa firaaqoo fidiaqaamma amaqaqau.
9 Moo kari mifa kafaa qaina maseenoo narí afasausamara qima niminau. Innee iriaqa qinee qaina moommiqa. Qinee qafaunanoo suani faqa uqoona faqa qisaukuqara taikasee qikunni ooqu moodaa marasee 11 fasau namu faqa qini daumooki aniree ninuka tuqu naumoo amisee mariafaqa niqafeeqa.
10 Mifa narí akoona faqa mi qainufana qimamufanoo mina akoofa aqinoo qinau. Naqaa ira qaina fee inanee. Anee aneenna anoonara faqa aneenna afasausa marara faqa qiniara faqa ani aramandunnai ninuka tuqu naumoo amisee mariaqee fee qidanee.
11 Yooseefaana afasausa mara nári nikaqara nirana qeemarinau. Miqi marufanoo mina akoofa aiqama ufara kaqi kai irimarinau.
Yooseefaana Midianna maqannaasa nimisee feefauru maroo ufafa.
12 Moo kari Yooseefaana afasausa mara nári nikoona sipsipa mara maree Seekeemma maqusai karasa naaqeera nifiqee fiqau.
13 Oonu marufanoo Yakooboofa Yooseefaana qimaminoo qinau. Ani afasausa mara Seekeemma maqusai mariannai fua. Miqi qufanoo Yooseefaafa qinau. Qinee firara deedaqidaqa.
14 Mina akoofa maaqi qimasee qimaminau. Anee oonureenana qafaa. Ani afasausa mara kaqi fee maridafee. Aandauqa faqa amiqiqa fee maridee. Nindafamasee anireenana qimaqimia. Mina akoofa Heebooroona noopundukiqari aiqoofanoo finau. Yooseefaafa doo findifufanoo fifiiufanoo Seekeemma maqusai oonuranau.
15 Oonureenoo narí afasausa mararara randanoo nidanoo oonuree aniree inoo nufanoo faiqí moo fannoo qafamasee mina iramirinoo qinau. Anee nanaree randaidanee.
16 Miqi qufanoo Yooseefaafa qinau. Qinee qeeqa qifasausa mara sipsipasaa rakisi mariasara randaidaqa. Amanee anee misa mariannaira qini qima qiminnaree.
17 Miqi qufanoo mi fasiqafa qinau. Misa doo quqasee fiqau. Misa Dootana maqa maaqai firaree qufaqa iriqiafana. Yooseefaafa mi ufana iriseenoo narí afasausa ninaaqianna fifiufanoo Dootana maqa maaqai misa oonu paqurinau.
18 Mifa nianai ani marufaqa mina afasausamara qafamaseeqa mina arirara tipundaariqau.
19 Misa maaqi qimasee narí qimami narí qimami qimariqau. Doo qaininoo nifa anidanoo.
20 Anifaqa mina aruseeqa mina iri mareeqee maa soorausaki mooki aqua. Miqimmaseeqa maasa minara kaasau aandau ariifoo qianaura. Maasa miqimmasaananoo mina qaina fannoo naqaa fee iannoo.
21 Reeubeenafa misa ufa iriseenoo Yooseefaana saa ititaidanoo qinau.
22 Kaqi maa kaasau maqa maaqanaki maa nammari madikanaki aqua. Sia aidafirana amia. Mifa miqi qimasee narí kai qimiriseenoo qumee afiqamaree narí akoofunnai munu aisarara miqi qinau.
23 Yooseefaafa narí afasausamara maruqoo ururoofaqa qumarasee mina kisaaqa qamunna kisaaqa asauku faqaana raipaqiqau.
24 Miqimmaseeqa nammari aadana usufu madikanaki aqiqau.
25 Aquseeqa miqoo ooqu faqee narana naidaqa tautummasee qafoofaqa Isamaeerana aiku asauku aniqau. Misa Kireeata maqa maaqaindari Isipa maqa maaqai fimariqau. Misa adiafaa imarufaqa neemaru ainainna faqa afundimaru saqari anoonnana faqa mara kammeerasaa quqeesee Isipa maqannaasa feefauriaqeera maree fiqau.
26 Yudafa narí akaqaa fasaauqa qimanniminoo qinau. Inni saimbaqa qeeqa qikaqa arusee mina fidika rafaaqafusee nana dadaaqiranee maraanauree.
27 Anifaqa Isamaeerana aiku asauku maa aniraasa nimianaqa feefauru qimiaqa. Mifa maasa qikaqa maridanoo maasa moodaa fidika marinara sia mina aidafirana amia. Miqi qufaqa misa eedoo qiqau.
28 Eedoo qimarufaqa Midianna maqusanaasa ainaina feefauri marusa aniroofaqa misa nári nikaqa Yooseefaana madikakinaana qubaqeeqee misa nimisoofaqa siruaa munnimma moodaa fasiqa aiku asauku taikasee 20 nimisee doo Yooseefaana maree Isipa maqa maaqai fiqau.
29 Misa Yooseefaana nimuna Reeubeenafa sia qafanau. Mifa anireenoo madikaki ooqu qafoofanoo sia marufanoo narí qamunna anaqaana qinau.
30 Miqimmaseenoo Reeubeennafa narí akaqaafasaauqa unnai oonuree qimanniminau. Yooseefaafa sia maridanoo qinee naqi fee ianauree.
31 Miqi qufaqa misa mimmi arusee Yooseefaana kisaaqa qammunna mina fidikaki raaraa iqau.
32 Miqimmasee misa mi qammunnana mara maree nári nikoofunnai oonuree qimamiqau. Maasa maa qamunnana moosaa paquriqa, qafaa, ani amaakundi fee maridanoo fee.
33 Yakooboofa mi qamunnana qafamaseenoo qinau. Qini qimaaku qamunna maridanoo. Kaasau aandau fannoo qini faiqi Yooseefaana arusee rakeekaammaseenoo fee qinau.
34 Miqi qimaseenoo Yakooboofa narí qamunna anaqana qiiseenoo soofaara qamunna afisuseenoo kisaaqasaa narí faiqiara soofaarida marinau.
35 Marufaqa mina faiqi namu faqa araamuqmaaka faqa anireeqa nári nikoona aundura reendeenira ufa qufanoo misa nikoofa qaoo qidanoo qinau. Qinee qeeqa faiqiara iki raqaqa fuannaqbaqa kuqiqa kuqirausa mariannai fuanaura.
36 Yakooboofa miqi marufaqa Midianna maqannaasa Yooseefaana afiqamaree Isipa maqa maaqai Pootifaana ainainira faiqi kianifeera amiseeqa feefauru maraqau. Isipa maqannaa kinna maaqasaa rakisi marusakiqari Pootifaafa uriqarara oofisaa marufaqa amiqau.