40
Yooseefaafa karafusaki marusa qainuna kooroo qimaru ufafa.
1 Kaqikaaqoo marinoo Isipa maqannaa karaambaiqa uainna anoona tatimaru fasiqafa faqa mina feemu suqee marufa faqa nariqa uriqararana mandaikamma amaqaqau.
2 Mandaikamma amaqasoofanoo mi qandara aranaqoofanoo narí sundiauqara qufaqa qumaraqau.
3 Qumaraseeqa sundiauqa uriqararana karabusa maqaki Yooseefaafa maru maqanaki quqanau.
4 Mi qanda kisaaqasaa karabusaki marufanoo karabusasaa rakisirafa qufanoo Yooseefaafa misasaa rakisi marinau.
5 Miqoo karabusaki maridaqa moo eendaki uainna tati marufa faqa feemu suqee marufa faqa qainiqau. Uainna tati marufa mina qaina oosana aaduma marinau. Feemu suqee marufa mina qaina oosana aaduma marinau.
6 Mi kananaanna miqanda noori runusee marufanoo Yooseefaafa ani nindafeenoo iramirinoo qinau.
7 Inneeqara nanaree kaaqa moomoo irira irida maridee.
8 Qufaqa miqannda qiqau. Maaqanda qaina maqaqee idaqa qaina oosana qimannimi marifa sia marifaqa maaqanda minara oonu mafi irida maridaqa. Yooseefaafa miqanda ufa iriseenoo qima niminau. Anutufa kai qaina oosana qimannimirana nimidanoo. Inneeqa qaina qima qimifaqa iria.
9 Miqi qimasoofanoo Faraoona uainna nammari tati maru fasiqafa narí qaina maaqi qimasee Yooseefaana qimaminau. Qinee qafaunanoo uainna sanda qini doorinni marifaqa qafeeqa.
10 Qaarammoo asaana minasaa marifaqa qafeeqa. Amanee ifaqa qafaunanoo afufeenaarifaqa qafaunanoo qaqama irafi akuqeenoo.
11 Qinee karaambaiqa Faraoona kaafa uaqeeidaqa akuqamafina minaki anoona tatiisee munu amiqa.
12 Yooseefaafa mina iriseenoo maaqi qimasee qimaminau. Sanda qaarammoo asaana qafaannana mina amana qaaramoo faasaana marinnara.
13 Qaaramoo faasaaana taikainanoo Faraoofa ani iduku aisainana kafaa aneenna saikaki finnaranoo. Anee ooqai mina uainna tatira faiqi maridana mina uainna kaafa amiunnandee inana kaifaa aminnaranoo.
14 Anee miqimma finana qiniara qimudaoo qimasee karaambaiqa Faraoona qimaminanoo qini dadaaqinoo iduku qisaani.
15 Misa ooqai qini Qeeburu maqusaindaraana ummuara mamaree aniqau. Qinee maaqoo Isipa maqa maaqaki marida sia moo manda oosana mareeqa. Misa fifau qini karabusaki quqaqaafaqa maridaqa.
16 Feemu suqee marufa narí aqoonnana qaina oosana qimamuna irufanoo amiqufanoo Yooseefaana qimaminoo qinau. Qinee faqa moo qainammiqa. Qinee qaarammoo feemu difaani qumbiqarana qikiiaaqa akuaqee idaqa qafeeqa.
17 Meeraqooqaraa difaaniki oosana oosana feemu ainaina uriqararanaindi marifanoo ufiniuqa nee mariafaqa qafeeqa.
18 Yooseefaafa mina qaina oosana iriseenoo maaqi qimasee narí qimaminau. Qaarammoo difaani qafaanafa qaarammoo faasaana maridanoo.
19 Qaaramoo faasaana amana mina qaaramoo feemu difaani marifana qafaananoo. Qaaramoo faasaana aiqarainanoo Faraoofa ani ani qumareenoo munusee anuka ateekasee ani iri saqarisaa dirisainaqa ufiniuqa ani amaqi neefaranoo.
20 Miqiqimasee qima nimisoofanoo miqooqari mi qaaramoo faasaanna aiqaroofanoo mikari Faraoona maqoo aukuanafa aniroofanoo narana firaaqoo suqaseenoo narí ainainasaa rakisi marusa niminau. Mifa narí uainna tati maruna faqa feemu suqee maru fasiqana faqa idukumaree mini narí ainainasaa rakisi marusa nifusaa quqanau.
21 Idukuseenoo uainna tati maru fasiqana mareeqee ooqai mareeu saikanaki kafaa quqasoofanoo uainna tatimarinau.
22 Feemu suqee maruna idukuseenoo anuka ateekasoofaqa sandannai mina qiri saqarisaa diriqau. Aiqama ainaina Yooseefaana ufamau andeeqaseenoo mimau kaimbinau.
23 Uainna tati marufa kafaa Faraoona ainainidanoo Yooseefaanara siamma irinau. Qaunusee marinau.