46
Yakooboofa narí aiku asauku faqa Isipa maqusai ooqu fu ufafa.
Yakooboofa narí ainaina indaaii mareenoo Beeraseeba maqusai ooqureenoo miqoo narí akoona Isakeena Anutuna aandau tatufirana suqaminau.
Miqoo eendaki faiqaqee ufanoo Anutufa qainasaa afu nareenoo qinau. Yakooboo Yakooboo qufanoo Yakooboofa maqi qimaseenoo qinau qinee maaqoo maridaqa.
Qufanoo Anutufa qimaminoo qinau. Qinee Anutusa ani akoona Anutusa maridaqa. Anee sia Isipa maqasaa ooqu firaranara rufiaa. Mi maqanasaa ooqu marinaqa ani aiku asauku firaa maqanaasaikamma nisaanaura. Qinee ani faqa Isipa maqasaa ooqu fuanaura. Yooseefaafa ani faqa Isipa maqa maaqaki marinana mariinana kuqinnaranoo. Mariinaqa kasooaqee kafaa ani aiku asauku mareeqee kafaa Kannaana maqasaa quqaanaura.
Beeraseeba maqusa Yakooboofa quqasee Kannaana maqa maaqai ooqufinau. Mina faiqi namu Yakooboona faqa nári faiqi aanaaqiuqa faqa nári ninaaqmaaka faqa mareeqee qoosa rarisee maru karana Isipa maqannaa karaambaiqa Faraoofa nimaqoonasaa quqasee nifiqee ooqufiqau. Misa nári aandau aina faqa nariqa umiasana faqa Kannaa maqasaa maridaqa maqeeiunauqa aiqama maree ooqu fiqau. Yakooboofa narí aiku asauku aiqama nifiqee ooqu finau. Yakooboofa narí faiqi namu faqa narí anaiqi mara akoonaiqiuqa faqa narí araamuqmaaka faqa narí anaiqi mara maanaaqauqa faqa aiqama nifiqee ooqu finau.
Yakooboona faiqi namu Isipa maqasaa ooqu fusa maaqi miqa mariqau. Yakooboona ooqa faiqi Reeubeenafa marinau. Reeubeena faiqi namu Qanookafa faqa Parufa faqa Qeeseeroonafa faqa Karamifa faqa mariqau. 10 Simeeona faiqi namu Yeemueerafa faqa Yaminafa faqa Ooqadafa faqa Yakifa faqa Sooqarafa faqa mariqau, misa aiqamausa moodaa anaasee faiqi namu mariqau. Moo anaasee faiqi Saurafa marinau. Mina anoofa Kannaana maqannaa anaasee marinau.
11 Reefina faiqi namu Keerasoonafa faqa Kooqafa faqa Meerarifa faqa mariqau.
12 Yudaana faiqi namu Seeraafa faqa Peereesafa faqa Siraafa faqa mariqau. Yudaana faiqi qaaraqanda Eerafa faqa Oonanafa faqa mariiufaqa Oonanafa Kannaana maqasaa kuqinau. Peereesana faiqi qara Qeesaroonafa faqa Qamurafa faqa mariqau.
13 Isakarana faiqi namu Toorafa faqa Puaafa faqa Yasubafa faqa Simaroonafa faqa mariqau.
14 Seeburuna faiqi namu Seereedafa faqa Eeroonafa faqa Yareerafa faqa mariqau. 15 Miqimmaseenoo Reeaa nammarifa Yakooboona faiqi namu Meesapotamia maqusai maridanoo maqanau. Maanaaqa moodaa auqu Dinnaa nammarifa mina faqa miqoo maqanau. Doo Reeaa nammarina faiqi namu maanaaqa akoonaiqi aiqamausa 33 mariqau.
16 Kadana faiqi namu Seefoonaa faqa Qakifa faqa Sunifa faqa Eesaboonafa faqa Eerifa faqa Aroodifa faqa Areerifa faqa mariqau. 17 Aseerana faiqi namu Iminaafa faqa Isauaafa faqa Isififa faqa Beeriaafa faqa misa nisookifa Seera nammarifa faqa mariqau. Beeriaana amaaku qara Qeebeerafa faqa Marakieerafa faqa mariqau. 18 Doo miqimmasee Yakooboona aiku asauku 16 nári ainainira maanaaqa Rabanafa Reeaa namarina amuna Siripaa nammarinasaa maqanau.
19 Yakooboona anaaqa Raseera nammarifa faiqi qaaraqanda maqanau. Yooseefaafa faqa Beensaminnafa faqa mariqau. 20 Yooseefaana faiqiqara qaaraqanda Isipa maqasaa kambiqaqau. Miqanda nuqu Mannaseefa faqa Eefaraimmafa faqa mariqau. Miqanda ninoofa Aseenata nammarifa marinau. Aseenata nammarina akoona auqu Pootifeerafa marinau. Mi fasiqafa Qeerioporisa maqannaa amaana maqasaa rakisi marufa marinau.
21 Beenasaminna faiqi namu maaqimmiqa mariqau. Beerafa faqa Beekeerafa faqa Asabeerafa faqa Keerafa faqa Naamanafa faqa Eeqifa faqa Roosafa faqa Mupimafa faqa Qupimafa faqa Aratafa faqa mariqau. 22 Doo miqimmasee 14 Yakooboona aiku asauku Raseera nammarinasaa qari kambiqaqau. (Rabanafa Biriqaa nammarina narí ainainira maanaaqa Raseera nammarina narí araamuna amufanoo mifa mareeqeenoo narí afaaqi Yakooboona amufanoo faiqi maaqi mandee maqanau.) 23 Biriqaa nammarina indaruqaa faiqi Dannafa marinau. Dannana faiqi moodaa marinau mina auqu Qusimafa marinau. 24 Biriqaa nammarina faiqi moo Nafatarifa marinau. Nafatarina faiqi namu maaqi miqa mariqau. Yaqaseerafa faqa Kunifa faqa Yeeseerafa faqa Sireemafa faqa mariqau. 25 Doo miqimmasee Yakoobooona aiku asauku 7 narí ainainira manaaqa Rabanafa Raseera nammarina amunasaa Biriqaa nammarinasaa maqanau.
26 Yakooboona aiku asauku uqanna Isipa maqasaa ooqufusaa aiqama moodaanaki 66 mariqau. Misa ninaakuqmaaka sia nisaanariqa. 27 Yooseefaana faiqi qara Isipa maqasaa kambiqaqau. Miqanda faqa Yooseefaana faqa Yakooboona faqa moodaanaki ootupamasee 70 fasiqa ooqu fiqau.
Yakooboofa narí aiku asauku faqa Isipa maqusai maru ufafa.
28 Yakooboofa Yudana aiqoofanoo indaaru ooqu Yooseefaana qimaminanoo Kooseena maqasaa misa paquriani feera aiqanau. 29 Yooseefaafa narí qoosa rarisee maru karanaki akarama fufanoo Kooseena maqa maaqai narí akoona paqurirara finau. Oonu paqurimmaseenoo Yooseefaafa narí akoona anukaki oonu mafi kaqaramma umareenoo kisaaqasaa iki raqee marinau.
30 Iki raqee marufanoo Yakooboofa Yooseefaana qimaminoo qinau. Doo qinee kuqiraridaqa qinee maqee ani qafeeqa anee sia kuqina mariana kaqi mariana.
31 Yooseefaafa iki raqaseenoo narí afasausa mara faqa narí akoona aiku asauku aiqama faqa qimanniminoo qinau. Qinee Faraoofa mariqoo ooruree inniara qimamianaura. Qini qikoofa faqa qini qifasausa faqa Kannaana maqusaindari qinee marunnannai qumureeaa maqi qianaura. 32 Qinee inniara sipsipasaa rakisi mariasa maridaqa nariqa sipsipa faqa burimakau faqa nariqa aiqama ainaina faqa maree qumiaa maqi qimasee qimamianaura. 33 Qinee miqi qimasee qimamisaananoo Faraoofa inni naaramasee innee ainaini marianara irainaqa maaqi qimasee qimamiaqa. 34 Oo maasa uriqararafa maasa qikeeku qikaaku ooqai sipsipa kai rakisi marusa marufaqa maasa faqa maqee minasaa kai rakisidaqa. Innee miqi qimasee Faraoona qimamifanoo mifa Kooseena maqa inni nimiannoo. Isipa maqannaasa sipsipa rakisiranara nikoo uqanna qaidanoo. Minara inni naaduma saa Kooseena maqa nimiannoo.