16
1 Faiqí ainaina auqarara tipundaaria fanoo Yaaweefa minara irisaifaqa kai auqaidaqa.
2 Faiqí nári mariranara andeeqaidee qifanoo Yaaweefa aiqamausa naundurai irirana oosana rainasee qafaidanoo.
3 Aneenna tipundaarianna ufana Yaaweenara amiqi amiqimma qimaqaannee qinanoo anoona kambiqaannoo.
4 Yaaweefa aiqama ainaina auqufa taikeefandinnanara iridanoo. Manda oosana maree mariasa inaaqianna kuqiranaki taikee fandinnanara faqa iridanoo.
5 Ramoo ramaaida nári nifaaqa mara maree uri mariasara Yaaweefa fidiaqaa midanoo. Misa narirafa sia niaqaannoo kaqi naruanno.
6 Anee aiqama kari Yaaweena ufasaa mapukusee marinanoo mifa ani numoo taikaannoo. Yaaweena ufasaa mundufi finanoo sia moo mandainaina aniki kambiqaannoo.
7 Ani marirafa nirafa andeeqanoo marinanoo Yaaweefa minara asasinoo ani namuqaa aqoondi kamma amaqaannoo.
8 Anee qoodaa qumiasana andeeqara aatata maraseenana andeeqara oosana mau finanoo ani marirafa firaa qumisana faqaana marirana uriaqaranoo mariannoo.
9 Anee moo ainainara aneenna iriranaki qimirinanoo Yaaweefa narí irimarinnai ani mara ubeekaannoo.
10 Yaaweefa maqasaa uriqararana dadaaqifanoo andeeqara ufa nimidanoo. Mina ufa qirafa aiqama kari kuqaa kai marirannoo.
11 Yaaweefa aiqama sikeerara andeeqara sikeera kai marinaqa aiqama feefauru faqa andeeqarafa kai mariani fee qidanoo.
12 Uriqararausa manda oosanara fidiaqaammidaqa. Kaamanna fannoo andeeqara oosana marainnana mi andeeqara oosannanannai mina mapuku amaqaannoo.
13 Uriqararafa kuqaa anoona ufa qimariasara aididanoo. Kafa mifa anoona uf qimariasara asasammasee dadaaqidanoo.
14 Uriqararafa aanoo qimasee kuqaa naruannoo. Irirana faqaafa narí irira ufannai mina aanooqirana asooama amaqaannoo.
15 Uriqararafa naanaidara qinanoo aiqamausa nimuqusa amiqimma nimaqaannoo. Uriqararana asasirafa aukuanai aakuara foora aiqama amiqi amiqimma nimaqaidanoo.
16 Anee amiqira irirana marasainafa mifa koora faqa siruaa faqa uraaqaranoo mariannoo.
17 Andeeqara aatata fimariasa misa manda oosana maree mariasa aanara qeeraira midaqa. Niku raanaki qafamasaida nimariasa misa kaqi marifaranoo.
18 Nári nifaaqa mara maree uri mariasa kuridiranaki ooqu fidaqa. Ramoo ramaa imariasa aqufi marianaki aqu fidaqa.
19 Sarauidaqa nári mara maree qumi mariasa misa uriqararanaki maridaqa. Kafa manda oosana maree mariasa ramoo ramaairana faqa moosa ainaina ummuara marasee raina nimimariasa ureeqarausa maridaqa.
20 Ani aakapainna ufana amiqimmasee irinanoo ani marirafa amiqiannoo. Yaaweena saqarikinana anee asasinnaranoo.
21 Irirana faqaa fasiqara amiqirafa irirana faqaafee qifaranoo. Irirana faqaa fasiqa ufa fannoo adiafaa inoo irirana pooduqaidanoo.
22 Faiqí moo fannoo amiqira irirana faqaafa marifanoo mi irirafa maqakaqari ururee mari nammari fara foora amiqira irirana mi fasiqana amidanoo. Furufari mariasa nári furufarirafa nári naridanoo.
23 Irirana faqaa fasiqa ufa qirara oonumafi irisee ufa qidanoo. Mi ufana iriafanoo adiafaa inoo iriaqaa kai midanoo.
24 Amiqira ufa fannoo adiafaa ira ainainara foora faiqí naundurai adiafaa irana faqa amiqi amiqirana faqa nimidanoo.
25 Faiqí anaasee moo aanara andeeqara aanammifoo qimariafanoo mifa kuqi maria aanafa maridanoo.
26 Ainaini mari fasiqafa daara raandoo qimasee ainainidanoo. Narí aarararanara iriseenoo ainainidanoo.
27 Manda oosana maree mariasa akaqausa mandaikamma nimaqara aanara kai randaidaqa. Misa ufa fannoo idara foora nitakuqidanoo.
28 Manda oosana maree mariasakiqari munuqi miniqirafa kambiqafi daraanidanoo. Miqi mariasa mi ufanannai amiqira aqoondi rakeemma aqidaqa.
29 Faiqí narimari asa nári niqoondi nikaruqimasee rarisameeqeenoo mandainainaki quqaidanoo.
30 Afu atindari maqee marifa mandoosana kambiqaanifeera miqidanoo. Afauru uqmairí marifa mandainaina kambiqaanifeera miqidanoo.
31 Aandau akiiqa faqaana akiiqa fannoo uriqararausa qatara foora maridanoo. Andeeqara mariranannai kai mi ainainna paquridaqa.
32 Moo fannoo narí aanoo rafaaqafusee reendeenira ufa kai qimarifa maqasaa karaambaiqa uraaqaranoo maridanoo. Narí mariranasaa rakisi marifa moo maqannaasa narusee misa maqa maaqa maree marina uraaqaranoo maridanoo.
33 Kaatara foora sararammasee Anutuna aidiranara iriraree qiafanoo Anutufa narí kai akooroomma nimidanoo.