2
Qini qimaaku iria qinee auqaannee qimasee qimamianna ufana sia qaunua.
Amiqra ufa amiqimmasee iriseenana minara oonumafi iria.
Eeoo amiqira irirafa anee iannannai anianinnanara iramirisee iria.
Amiqira iriranara siruaa maqaki marifaqa randee mariandeemmasee randaa. Kukeeqara amiqira iriranara akaqa ainaina maqaki kukeeqaqaafaqa randee mariandeemmasee randaa.
Miqinana anee Yaaweenara rufiara oosanara iriseenana Anutunara irinnaranoo.
Yaaweefa kai amiqira irirana nimidanoo. Mifinnaindari kai irirafa faqa oonumafi irirafa faqa anidanoo.
Kuqaa anoona ufa kai qimariasa faqa andeeqara oosana maree mariasa faqa Anufufa dadaaqida itita nimaqaidanoo.
Anutufa faiqí amana amana kai amiqimma nimaqee mariasa faqa mina ufa mau maqee maqee fimariasa faqa Anutufa itita nimaqaidanoo.
Qini qimaaku anee qini ufa irinana amiqira ainainara faqa andeeqara oosanara amana amana kai rainara oosanara faqa irinnaranoo. Anee aneenna auqainna amiqira oosanara faqa irinnaranoo.
10 Anee moomoo amiqira irirana marasainanoo mi irirafa ani asasirana amiannoo.
11 Ani amiqimmasee marirafa faqa amiqira irirafa faqa anisaa itita amaqaannoo.
12 Mifa kai anee manda ainaina auqaranasaa itita amaqaannoo. Ummaara kambiqaanifeera qimariasa ufasaa itita amaqaannoo.
13 Miqi maria fasiqausa andeeqara marirana minnisee numoo asukunaki maridaqa.
14 Oosana oosana manda oosanara nidi marisa faqa amiqira irirana sia mari manda oosanara asasimariasa faqa furufara foomboo rimaria fasiqausa ufara faqa eerairiaqa.
15 Miqi maria fasiqausa oosana sia andeeqanoo maridanoo. Misa eerairi mariasa maridaqa.
16 Anee qini andeeqara ufa irinanoo moo fasiqa anaaqa fannoo narí fadameena akira ufannai aniara anirainaqa manda oosana auqaanee qinanoo mi amiqira irirafa ani itita amaqaannoo.
17 Miqira anaasee fannoo narí afaaqiara sia irirai Anutuna afusaa naaquqara qima afeekaikirufa qimaqoonara qaunuseenoo narí afaaqi minnisaidanoo.
18 Anee miqi mari anaaseena maaqai finana anee kuqirannai fimaria aatata finnaranoo. Minni finana kuqirausa maria maqa maaqanakiara foora finnaranoo.
19 Mi anaaseefinnai finafa sia kafaa oonurandee aninnaranoo. Anee sia kafaa oorurandee kaqi marira aanasaa aninnaranoo.
20 Anee amiqira irirana marirana mareenana andeeqara fasiqauqa naanna reenana amiqira marira marinnaranoo.
21 Andeeqara fasiqa anaasee faqa oosana siai fasiqa anaaseesa maqa maaqanara maasaindi fee qimasee minaki marifaranoo.
22 Miqiqa marifanoo Anutufa mi maqa maaqanaki manda oosana maree mariasa ummaqira ainainara foora raraku aquannoo.