20
1 Moomoo biaqa nammmari neemarianafa ani fufufarirana faqa faaqa fuisee qirana faqa amiannoo. Nammari moomoo narana irirana sia marifa maridanoo.
2 Karaambaiqa aanoo qirafa kaasau fainiara foora rairai qidanoo. Faiqí moo fannoo mi karaambaiqana aranaqarana amirafa kuquannoo.
3 Faiqí moo fannoo narí maraqunara irisee tinoorirana faqa rakiranara faqa qeerairidanoo. Furufarirausa qusufa qimasee rakiranaki faqa aanooqiranaki faqa aqufidaqa.
4 Kudoosaapee mari fasiqafa saikira aukuana sia ainainifa aiqira aukuana naranara randainanoo aararaannoo.
5 Faiqí irirana faqaana irirafa faruma difukunara foora maridanoo. Faiqí irirana faqaafa kai mi fasiqana irirana meemaindaraana uqeera koorooiannoo.
6 Faiqi moomoosa fifau náriara faiqiara nimuqusirana faqaasa maridee qidaqa moodaa moodaa kai miqirausa maridaqa.
7 Andeeqara fasiqa amiqira oosana auqaifaqa mina faiqí namu asasidaqa.
8 Kaaraambaiqa fannoo narí qaarisaa ooqumarifi faiqí anaasee andeeqa nisaidanoo narí afunnoo kai mandainaina qafaidanoo.
9 Yafee faiqí moo fannoo kuqaa qinee anukarausee qiannoofee. Yafee faiqí moo fannoo qini mandainaina ruka taikeenoo fee qianno fee. Sia moo fannoo kuqaa miqi qiannoo.
10 Furufarira sikeera faqa furufarira amanira taqu faqa maridanoo. Yaaweefa aiqamaqarara fidiaqaa midanoo.
11 Faiqiuqaindi nári auqee maria oosnafa nári marirana kooroo idanoo. Anee misa andeeqaranara faqa amiqiranara faqa iri mariananoo.
12 Aaqoo irimarina faqa afu qafeemarina faqa Yaaweefa maasa auqu nimaqanau.
13 Anee faiqarafa faiqarafa ina nidana kudi marinnaaranoo. Ainaina inanoo moomoo narana marinana neennaranoo.
14 Ainaina feefauru firaafa marinara feefauri mariasa moomoo ufa qidaqa. Mifa mi ainainna feefaurummasee doo oonu dupira feefauru aqusee marainara narí amooqidanoo.
15 Amiqira irirana faiqí anaasee qimannimi marifa koora faqa siruaa faqa uraaqaranoo maridanoo.
16 Anee moo maqannaana ufaasu ainainee feefauru aminana anee furufarirafa maridana amiananoo. Miqimari fasiqafa moo anaasee aanai paquri masainanoo aniannee qinanoo mifa furufarira oosana faqaafa maridanoo kaqi fuannoo.
17 Qunna qimasee maree mari ainainafa aaqee adiaafa irafa mariannoo inaaqianna oommaaniara foora ooki kammu kammu qiannoo.
18 Anee amiqira aakapara ufa iriseenana ainaina auqainanoo anoona kambiqaannoo. Anee rakiranaki finana irirana faqaasa ufa iriseenana fua.
19 Munuqi miniqi marifa kukeeqara ainainara mandaika midanoo kooroo idanoo. Anee kaaqa ufa qimariasara qeerairia sia misa naaqandandia.
20 Faiqi moo fannoo narí anoona akoona aqurarainafa qausana qoomara foora dauni dimbaannoo.
21 Maqa fee qumiasana fee kai kaqi marainafa aaqee amiannoo marikinoo doo mandaika miannoo.
22 Faiqí moo fannoo mandoosana ani aminana anee sia narí miqianauree qia. Ani irirafa Yaaweenasaa mundusainanoo mifa ani dadaaqiannoo.
23 Unnaqira amanira ainainara Yaaweefa fidiaqaa midanoo. Unnaqira sikeerara faqa mifa akooqaidanoo.
24 Yaaweefa maasa qiku amaaqa uqaqifiqaidanoo daamua qidanoo. Faiqí naqimmasee narí aiku amaaqara iriannoo fee sia amana.
25 Faiqí moo sia oonumafi iriranaki moo ainaina Anutuna auqu ramasee asauku uqeerasee tatufirana amianauree qimarifa mandaika midanoo. Kasooaqee irisee narí aaqaranara oonumafi iriseenoo akooqaannoo.
26 Irirana faqaa karaambaiqa fannoo aiuqummasee yafee aaqainnana qafamasee mina rumbaidanoo sia minasa qimudaoo qidanoo.
27 Faiqí maraquna Yaaweena qooma maridanoo. Faiqí naundurai qaidanoo narí mariranasa niranara randaidanoo narí amanidanoo.
28 Uriqararafa faiqí aanaaseera amuqusirana faqa anoona ufa qirana faqa mi oosana qanda fannoo mi uriqararana mapuku amaqaannoo.
29 Kumaaraauqa nári nimudaanai qiranara nári nimooqidaqa. Nauraiqiuqa nári aandaunamu qafaida nári nimooqidaqa.
30 Aaqee mari fasiqa anaaseena arinana afaaqa ateeka seenana aakirana afaimma sainanoo andeeqasee mariani. Ariisainafa mina aunduraki faqa amuqusaki faqa findaukama saannoo.