25
1 Maa aaquqira ufafa Sooroomoonna akaqa aaquqira ufa maridanoo. Yuda maqannaa karaambaiqa Heeseekaiaafa fuka bukaki akara rumaqoofa maridanoo.
2 Maasa Anutuna auqu uqeeree marunafa mifa moomoo ainaina narí iriranaki kukeeqee marinara miqidaqa. Minara maasa mina uriqarara auqu amidaqa. Maqassaa karaambaiqauqa mina oosana maasa qima qimianara maasa misa firaa nuqu nimidaqa. Miqi kai masee maqasaa karaambaiqa irirafa firaafa marinara sia amiqimmasee iriranaura.
3 Maasa sia innaarunai mari ainainnara faqa ooruku nammari meemai mari ainainnara faqa irianaura.
4 Faiqí siraa tasirisirimmasee apaapa mara aqusee anoona amiqirana kai uqasaifanoo ainaina akoofasa fannoo mara maree munusee auqidanoo.
5 Maqasaa karaambaiqa manda ufa aakapee mariasa mara aqusaifanoo mina rakisi amaqarafa afeekaikiannoo.
6 Anee maqasaa karaambaiqa afusaa oonuree sia aneennara faiqí firaasee qia. Sia aneennara uriqararausee qia.
7 Anee sia faiqí firaasa nimaaqa maqasee misa qannusaa ooqu maria narí anirainaqa ani aiqaifanoo sia andeeqaannoo. Minara anee kaiqeesa faqa marinaqa nariqa kai ani aaraifana oonu faiqí firaasa faqa ooqu maria.
8 Anee aneenna aqoonnana moo ainaina qafamasee sia aaqmuraaqmura inana kootai munu koorooia. Moo fasiqa mi ainainnara amiqimmasee irimarifa aniree ani ufa rafaaqafu sainana anee naqaa fee innaree.
9 Anee aneenna aqoonnana faqa ufa rainaidana kai kaqi mi fasiqafinnai oonuree mi ufana andeeqa taikaa. Anee moo kukeeqara ufa iriseenana sia mi ufana koorooia.
10 Anee minauqa kooroo inanoo mi fasiqafa asaurinaqa faiqí aniara sia umee ufa kukeeqaifee qimasee asaurirana amifarahnoo.
11 Faiqí moo fannoo amiqira ufa qinafa amiqira ainaina koorannai auqusee siruaannai afaaqa auquqaafara foora mina ufa maridanoo.
12 Faiqí moo fannoo irirana faqaa fasiqa aauqima nimaqara ufa irisee eedoo qinafa koorannai auqira fidinaanu naaqooki uqee mariana faqa uraaqararafa maridanoo.
13 Ufa maree fuani feera aiqainafa andeeqasee narí rakisirafa qinna ufana qimanniminanoo misa mi ufafa asasirana nimiannoo. Faiqí afuqaki narana unaki marifanoo suani arifanoo fuka nammari naindee iannoo.
14 Faiqí moo fannoo moo ainaina nimiraree qimasee qima afeekaikammaseenoo sia nimifa aadana oonnamuara foora maridanoo. Mifa ufai uqinoo oonnamu rakee ifanoo aaku sia rindee idanoo.
15 Reendeenira ufa fannoo amudaani raqa ummooquka midanoo, miqimmasainaqa rakisirausa faqa ani ufa irifaranoo.
16 Anee ookasaasa anoona kaaqa adiafaa imari ainainna paqurimmasee aneenna amana kai naa. Moomoo namasee fidinafaara.
17 Sia aneenna aqoonana maaqai maqee maqee namummaqaa, miqinanoo mifa aniara akooqainanoo fidiaqaammiannoo.
18 Narí aqoonnanara unnufa qimarifa qaseemara foora faqa aaruqira feefannaira foora narí aqoonnana aridanoo.
19 Anee manda aukuana unna qimari fasiqanasaa dadaaqiani fee qimasee mundinana anee afai rufidira fara foora narana neemariananoo. Anee aiku pipisaaqa usirafara foora aana fimariananoo.
20 Oori runusee marina aaqa oorureenana asasira idi rainanoo akooqaannoo. Suaraki faiqí moo fannoo qamunna akusee marifana rafaqaamma maraana suara arindee innaranoo. Moona afaaqa aurimarinaki ooruku anoona adieera foora iananoo.
21 Ani namuqaa aararainana narana amia. Nammariara aidinana nammari aminanoo naani.
22 Anee miqinanoo mina asaurirafa idara foora qaannoo. Yaaweefa mina akiiqara ani amiannoo.
23 Munuqi miniqirafa noori runirana maree anidanoo. Suani ataaqeendari ufai fannoo aaku maree anindee idanoo.
24 Tiqeera maqaki maridana amana marinnaranoo. Firaa maqatiaki rairai qimari manda anaaseena faqa maridana mandainainaki marinnaranoo.
25 Nianaindari aninna amiqira ufana asooara nammariara foora nainanoo rukukuqama amiaqaannoo.
26 Manda oosana maree mariasa andeeqara fasiqara anee maa manda oosanna marannee qimasee sandanainai qifanoo eedoo qimasee auqeenoo mifa faqa mandaikammiannoo. Amiqira nammari mookoofa amanee kai randaida qumimarina neemarianaki dumuna kai qumbiqanoo mariannoo andeeqara fasiqa mandaikirausa ufara eedoo irafa miqinoo maridanoo.
27 Anee adiafaa ira ainaina neeneesainanoo mandaika miannoo. Anee aneennara uriqararanara randainanoo mifa faqa mandaika miannoo.
28 Faiqí moo fannoo narí aranaqarana sia qumaraifa maqusa faandaamura rapee inoo marifaqa akoosa mariafaqa namuqaa keeqaaqaa inoo mariara foora inoo maridanoo.