20
Wan tauseenna aukuana Yisufa rakisiu ufafa.
Qinee Yoohaneesa miqimaruna qafamasee quandaki innaarunaindari qangiroo moo fannoo maqa ameemaanai kiqa faqa kisaaqa sainanda faqa asaukuki uqirafa maqai quminau. 2-3 Qumureenoo qaareena qumaranau. Mi qaareenna moo auqu ooqeenaa sakani moo auqu Sadannafa moo auqu afaanna. Mi qangiroofa qumareenoo sainandannai rumbaseenoo maqa ameemaanai madikaki afeeqa aquseenoo rookamandeenoo amusaraseenoo wan tauseenna aukuana minaki mariannee qimasee quqanau. Mi kamuqoo sia maa maqa maaqanasaaqaraasa nikaruqiannoo. Mi wan tauseenna aukuanna taikasainanoo Anutufa kafaa idukusainanoo kaqikaaqoo kafaa nikaruqiannoo.
Qaareena rumbasoofaqa qaari moomoo innaarunai ufiqinoo maru qafaqiafana. Minasaa ooqu mariqa marusara Anutufa innee faiqí anaasee ufa iriaqee qinau. Qinee miquna qafeeqa quandakufaqa faiqí nimana moomoo qafaqiafana. Misa Yisuna anoona ufa faqa Anutuna ufa faqa kooroounara narusa nimana marufaqa nindafaqiafana. Misa sia manda kaasau aandau fee mina amanaree innaaru qimarusa mariqau. Misa manda kaasau aandau akara niqinaaqa faqa nisaukusaa faqa qaoo qimarusa mariqau. Misa kuqiranakiqari findi fiqa asauku mundirana saimbaqa karaambaiqaika mambiqa faiqí anaasee rakisifaranoo. Mi uan tauseenna aukuanna minasaimbaqa rakisifaranoo qinee qafaqiafana. Akaqausa kasooqaqee wan tauseenna aukuana aiqarammafufanoo Anutufa inaaqiannaasa mara findifuannoo. Indaaru findifirausa Anutufa firaa asasirana niminaqa asasifaranoo. Inaaqianna findi firafa moo auqu inaaqianna kuqirafa mariannoo. Sia indaaru findifirausa urinaaqareefaranoo. Indaaru findifirausa Anutunaindi faqa asauku mundirana aanaiqikirausa maridaqa wan tauseenna aukuana Yisuna faqa faiqí aanaaseesaa rakisifaranoo.
Sadannana narí aiku asauku faqa idaki aquaninna ufafa.
7-9 Mi uan tauseenna aukuanna aiqarainanoo Anutufa Sadanna narí rumbaranakinaana idukusainanoo raudamakinoo aiqama maqasaa mariasa kafaa nikaruqiannoo. Nikaruqimaseenoo naarainaqa moomoosa uqanna anireeqa nukudara foora qumbiqa aqufifanoo Anutufa aidimari maqusana Yeerusaree maqusa faqa Anutunara rimaria fasiqa anaaseesa faqa aiqama firaaqoo rafusu quqarumasee nariraree qiannoo. Aiqama maqannaasa suqimarusara Kookana maqannaasa faqa Makookana maqannaasa faqee qimarifaranoo. Rakuanee qimarufanoo innaarunaindari ida firaafa qumureenoo aiqama naru taikasoofaqa qinee qafaqiafana. 10 Naru taikasoofanoo Anutufa faiqí anaasee nikaru qimaru afaannana rafuseeqeenoo ida farumaki afunda manda marunaki aqinau. Sia narí kai, ooqai manda kaasau aandau faqa unna qira tamummaqara fasiqa faqa marunaki afaanna rafusu aqinau. Miqoo misa maridaqa faasaana faqa eendaki faqa aupurarana maraidaqa naaru naaru marifaranoo.
Anutufa taikara faasaana ufa qianinna ufafa.
11 Qinee Yoohaneesa miqiqufaqa qafamaseeqa quandaki qafaafananoo firaa qaari ufiqirafa eekara arimarunasaa minasaa ooqumaru fasiqana faqa qafaqiafana. Mifa kooroo mafufanoo innaaruna faqa maqa faqa mina afusaaqari doo taikeenoo taikafinau. 12 Qinee miqoo qafaafananoo kuqirausa aiqama kuqiranakiqari findi fiqa Anutuna qaari aaqa ufa qiraree qimasee kikiqiqa mariqau. Uriqararausa faqa oorudupirausa faqa amana amana kai Anutuna oorisaa kikiqiqau. Innaarunai mariasa mi kuqirausa akara papiqa qairiseenoo nisaana riqau. Papiqa moo kaqi mariasa nuqu papiqa faqa qairisee qafanau. Anutufa mi papiqanakinaana misa manda marirana nirana auqarana qafamaseenoo ufa mina amana kai niminau. 13 Anutufa qufanoo ooruku nammari fannoo kuqirausa minaki marusa mareeqeenoo Anutuna afusaa quqasoofanoo kuqirana faqa maqa ameemaanai kuqirana faqa nariki maria kuqirausa mareeqee Anutuna afusaa quqaqau. Quqasoofanoo Anutufa aiqama nári mandainaina auqoona akiaqara ufa niminau. 14 Kuqiranaki mariasa faqa maqa ameemaanai kuqiranaki mariasa faqa aiqama mareeqeenoo ida farumaki aqinau. Mi ida farumanaki aqimarianara inaaqianna kuqiranee qinau. 15 Aiqamausa asumu maraaninausa papiqaki nuqu marisa misa kaqi marifaranoo mi papiqanaki nuqu sia marinausa misa aiqama mareeqee kaqi kasi marufanoo ida farumaki aiqama aqinau.