8
Jəju e nje kɨjə nḛ məsɨ kadɨ-kare kɨ bo
1 Ta kɨ bo kɨ kadɨ j-əl dɔ ta tɨ kɨn ə to kɨn: J-aw kɨ nje kɨjə nḛ məsɨ kadɨ-kare kɨ bo, kɨ ɨsɨ me dɔra̰ tɨ, dɔ ji ko̰ lo kɨsɨ ko̰ɓe tɨ lə Luwə, kɨ tɔge e dɔ tɔgɨ je tɨ pətɨ.
2 Ɨsɨ ra kɨlə kɨjə nḛ məsɨ kadɨ-kare kɨ bo ləne me kəy kɨ ay njay tɨ, adɨ e me kəy kaw-naa tɨ kɨ rɔjetɨ kɨ e dɔra̰ tɨ nu. E kəy kɨ Luwə wa ə ra ɓɨ e dɨje ə rai kɨ jide al.
3 *NJé kɨjə nḛ məsɨ kadɨ-kare je kɨ bo, kare kare pətɨ, kɨlə ləde e mba kadɨ adi nḛ je Luwə nɨm, rəi kɨ kadɨ-kare məsɨ je nɨm tɔ. Be tɔ ə, e go rəbe tɨ kadɨ Jəju ka, aw kɨ nḛ kadɨ adɨ kadɨ-kare tɨ tɔ.
4 Təkɨ rɔjetɨ, re Jəju e dɔnangɨ tɨ ne nɨngə, a e nje kɨjə nḛ məsɨ kadɨ-kare al, tadɔ njé kɨjə nḛ məsɨ kadɨ-kare je kɨ ɨsɨ rai kɨlə kɨn kɨ go ndu-kun tɨ lə *Mojɨ, ɨsi dɔnangɨ tɨ ne ə bəlme ngata.
5 NJé kɨjə nḛ məsɨ kadɨ-kare je ka kɨn, ɨsɨ rai kɨlə me kəy kaw-naa tɨ. Nə kəy kɨn e ndɨl kəy kɨ rɔjetɨ kɨ to dɔra̰ tɨ. Təkɨ rɔjetɨ, lokɨ Mojɨ ɨlə ngɨrə kadɨ ra kəy kɨbɨ, Luwə əl-e ə nə: «Ur mbi majɨ o-n dɔ ta kɨ m-a m-əli kam: majɨ kadɨ ɨra kəy kɨbɨ kɨn təkɨ ndɔ kɨ m-ɔjii dɔ mbal tɨ.»
6 Nə ngɔsɨne, Jəju aw kɨ kɨlə kɨ ndae e ngay ɨtə kɨlə lə njé kɨjə nḛ məsɨ kadɨ-kare je. Adɨ e ə, e nje ka mbo̰ lo tɨ kɨ mbata kɨlə mɨndɨ kɨ majɨ, kɨ ngɨre e kɨ kɨndə dɔ kun mɨndɨ tɨ kɨ majɨ tɔ.
Luwə adɨ mɨndɨ ne mbata kɨlə mɨndɨ kɨ sɨgɨ
7 Təkɨ rɔjetɨ, re nḛ kɨ majal goto me kɨlə mɨndɨ tɨ kɨ kəte ə, Luwə a re kɨ e kɨ rangɨ kɨ ko̰ joo al.
8 Nə, Luwə kɔl kɨ dɨje ləne mbata majal je kɨ rai, ə nə:
«Oi ndɔ je a rəi no̰o̰,
Kɨ m-a m-ɨlə mɨndɨm kɨlə kɨ sɨgɨ,
Kɨ dɨje kɨ Isɨrayəl tɨ nɨm,
Kɨ dɨje kɨ Juda tɨ nɨm tɔ.
9 Kɨlə-mɨndɨ kɨn, a to tə kɨlə mɨndɨ,
Kɨ ndɔ kɨ m-ɨlə kɨ kade je,
NDɔ kɨ m-uwə-n jide,
MBa kadɨ m-tḛḛ-n səde dɔnangɨ Ejɨpɨ tɨ kɨn al.
Lo kadɨ ay dɔ njade tɨ səm me kɨlə mɨndɨ tɨ kɨn goto.
Be ə, mi Ɓaɓe, m-a m-təl gɨdɨm madɨde tɔ.
10 Ɓaɓe ə nə:
Kɨlə-mɨndɨ kɨ m-a m-ɨlə
Kɨ dɨje kɨ Isɨrayəl tɨ go ndɔ je tɨ kɨn ə to kɨn:
M-a m-adɨ-de nḛ gər
MBa kadɨ gəri ndu-kun je ləm,
M-a m-ndangɨ ndu-kun je ka kɨn dɔ ɓəngɨrəde tɨ.
M-a mi Luwə ləde,
Ə a əi dɨje ləm tɔ.
11 Dəw madɨ kare kɨ a aw
NDoo dəw kɨ me ɓe tɨ ləne,
Ə se ngokone kadɨ gər-m goto,
Tadɔ dɨje pətɨ,
Ɨlə ngɨre dɔ dɨje kɨ tɔgɨ tɨ bɨtɨ tḛḛ-n dɔ ngan je kɨ du tɨ,
A gəri mi.
12 M-a m-ɨyə̰ go ra go tɨ al je ləde kɔ,
Mem a oy dɔ majal je tɨ ləde ratata.»
13 Lokɨ Luwə əl ta dɔ kɨlə mɨndɨ kɨ sɨgɨ tɨ nɨngə, e kɨn ɔjɨ kadɨ təl e kɨ kəte tə nḛ kɨ kɔke tɨ. Nɨngə j-əi pətɨ jɨ gəri kadɨ re nḛ to kɔkɨ nɨngə nay ngay al kadɨ a goto.