3
3:1-18 Jebugada Emboro Asisimi Ifeguturia-Da Durogha Aná Jojabe Bee Re.
1 Avotago, amó jo námane andufa raga regegaita rea gembambi re. Mania aghá nundubata! Irugari kakato dumeni benunu egegutata, Iesu gaabee egegeta rousua enemboda babarigari dumenimi, aná irugari kakato rera-du raga rirota, ingiso gegembugea ututata bua, nímandava irugutata, númanda gaga gaabee egegutaravore. Avotago, dodu námane aghá egega? Námane ingiso aghago, jo avodava benunu egegota, utota bua ya irugota gigigambi aita rosoravore. Kotú nímandava jo benunu ea rata gembua utadi bua, ekaresia* dumenidava yambi egegaita rosore. Anada bee mo, námane avouvi nímane seibe gigigutaravore.
2-3 Námanda ingiso, aná nímane re. Irugari kakato retora mo, númanda ingiso enembomi gefivuta. Kotú nímane mo, jo ingiso enembomi gembua ututa rousua aghago irambi re. Nímane aná Keriso na ea simbuguturieta, ingiso taubana aghago ea viteravore. Umó jo enemboda eta rouvia aghagonu ongomi o singoi tamova gembambi re. Tago, God jebuga vitia-da Asisimi nímanda neno rova gefirie. Aghá urieta, nímane unda natofo egegutureravore. Aghá uria-du, enembo dano gia tanana rousue, námane jo námanda anomi buro egegambi re. Keriso na námane gategea, unda anonu ututurieta bua, unda minono rirera-da bee nímanda neno rova siroruturieta, enembo dano gigigeta rousue.
4 Námane Keriso de takembea, God da ano gaabee urota, ená gaga rei-gefere.
5 Námane jo námanda anomi buro egegota, bee nímanda neno rova sirorambi re. Námane God da anomi minono regeguturieta, niningiguturota, jebuga nímanda neno rova siroruturie. Námandava ano tefo bee tefo re.
6 Atá nímane reisi-geroravore, God enembo sonembaita rea, emboro* reka ifegea ririeta, námane undava ano bua, aná emboro rekada aghi kakato ea vitere. Aná God dava yarida emboro, God da Asisimi ifeguturie. O emboro sei Agho Darimi ifeguturia-va, avona yadua, jo God dava bubambi amburaita rouvie. O avona Asisida ifeguturia emborova yadua, umó jebuga tumanadu irari tambua baita rouvie.
7 God da Agho Dari ututuria aghade, unda gaga singoi tamova gembua, Moses dava ututurieta rururie. Aghá ueta, God da unana Moses dava isagha ea, unda dibe be unana urie. Aná unana, janimbea furia, sidara aita uua, aghade, aná unana unda anogha janimbutueta, Israel enembo dibe fugia geruria, númanda dibe aná uvi bambagi urieta, gerurota irari inono egegambi urie. Aná Agho Dari taubana re-tago, umó jo namonde anda jebuga bua furambi eta rouvie. Avore, Agho Darimi amburari bua futa rouvie-tago, umó unda durogha jojabe retora anamigha siroruturie.
8 Atá, Agho Darida durogha mo, ijokoko bee irambi re. Tago, jebugada emboro Asisida ifeguturia-da durogha aná jojago bee re. Agho Darida durogha aná serigea iti beeva re.
9 Anada bee mo, emboro ya, God dava bubari Agho Darida ifeguturia-mi namonde anda ari-bari akokodu amburari bua futa rouvie. O jebugada emboro Asisida ifeguturia-mi God namonde anda ari akokogo nundubea gia doa, namonde andú “Taubana” reta rouvie. Amindu, jebuga emboroda durogha aná jojabe re. Anada bee mo, umó jebuga bua futa rouvie. Jo amburari bua furambi eta rouvie. Amindu, unda durogha Agho Darida durogha serigea iti beeva vitie.
10 Agho Darida durogha tutunova janimbuturia, aná gotiturie. Jebugada duroghami Agho Darida durogha serigea vitie.
11 Gaa bee, Agho Darida durogha jo yafabe irambi re. Avotago, unda feferava durogha jojabe janimbuturie. Tago, jebugada emboro tumanadu iraita rouvie. Aghá-gea, namonde amó tanana rosore, unda durogha aná jojabe re. Anami sei Agho Darida durogha fafoturieta, sidara urie.
12 Ananu kaifa gigita rosore-gea, námane jo oru egegambi, ivisa jará ea, Iesu da Gaga Taubana minono reta rosore.
13 Amindu, námane jo Moses da uria aghagonu egegambi eta rosore. Moses da dibeva aná unana jo sidara ambi-gea, sokuami unda dibe be afureguturie. Anada bee mo, enembomi unda dibe beva durogha gotitua-nu gigigauve-degea, umó uno ambi urie.
14-16 Aghá urie-tago, Israel enemboda nundubari jo ifegambi re. Kotú oreki beago, númanda dibe jo ifegambi, aghá urota vitie. Númane oreki Moses da Agho Dari gefiria, ananu irugeta rousue. Tago, unda durogha kotú bee jo itatama egegambi eta rousue. Moses da sokua afureguturia aghagonu númanda beforo munju takembea, dibe ifegambi vitia-mi, aná Agho Darida ruru jo gambi eta rousue. Atá beforo munju ifegarida emboro dabako vitie. Umó avona Keriso gha danode takembea iradua mo, unda beforo munju ifegea, dibe ifegota, ená gagada ruru gaita rouvie. Amindu God da Gaga eghá ririe, Moses umó Jojabeedava teteruria aghade, unda sokua ifeguturieta, unda dibe be isagha urie. Gari dabako aghago, avona neno kaverea, Jojabeedava yadua mo, unda beforo munju gajea vitia, aná ifegea, dibe ifegaita rouvie.
17 Avore, amó Jojabeeda ragaro retora mo, unda Asisidu retore. Kotú Jojabeeda Asisi enembo avodava vitia, umó jo rekago Agho Darida emborova ya, God tambari nundubambi aita rouvie.
18 Aghá-gea, namonde amó dibe be ifegea vitia enembomi Jojabee, aná Asisidu rere, unda unana gerurota, umó aghago uta reisi-fore. Aghá urota, God da unanade duroghade baboruta reifia-mi namonde andava isagha ata, endava enembomi gigigaita rousue!