3
3:1-6 Iesu Umó Moses Da Itiva Re.
1 Avore, avonu God na unda tofodu bua, jebuga bubugari-du ghogho reiria enembodu, eghá rere. Anda ikoko mendi, ariri gharovu, God umó gateguturia-da aghi kato Iesu, namonde anda fristi* iti beeva karigeta rosora-nu, nundubadi rere.
2 Avore, God da kambova, kotú natofoda rova Moses na God da uno ea goghó eta uria aghagonu, Iesu beago, God umonu gateguturia-da unonu ea goghó eta urie.
3-4 Aná gaa bee re. Kambo bee aná enembomi itita rousue. Tago, eini-eini nanjogoda ruru aná God re. Abua-abua dano embó einimi urieta sirorea futa rouvie. Tago, eini-einide, God unda natofode unona urieta sirorea futa rouvie. Moses jo rata, God da natofo sirorambi, umó natofo rova embó eini re. Aghá-gea, undú raga itoko regegeta rousue. O Iesu umó aná natofoda Jojabee-gea, undú raga jojabe regegeta rousue.
5 Gaa bee re: Moses umó God da buro kato ea, God da unonu ea goghó urota, God ambova gaga donu raita nunduturia-nu, isaghava reta urie.
6 Tago, Keriso umó numamo God da mendi re. Umó God da kamboda jojabe ea, God da unonu ea goghó urota, God da natofo kaifa eta rouvie. Kotú, God da kambo aná namonde andú rirota rere. Namonde amó jo oru ambi, ano ea irirota, namonde anda gigita ari jo doambi egegadora mo, gaa bee namonde amó unda natofo bee ea, iririgaita rosore.
3:7-4:13 God Na Nangu Undari Kambesi Unda Natofodu Simbuguturia-Da Gaga Re.
7-8 Namonde amó daiyagha God da natofo ea irasira-nu, Asisi Kakara na ririeta, buka rova gefiria, aná evere:
“Oreki God da beemi rirota niningigadora mo,
mania mambube mane uvu tefo enembo irambi kambesiva gogore ea,
unda Gaga bua fugituria, aghagonu egegata!
9 God ririe, ‘Númane ghaeko 40 da rova anda donu urera-nu,
gigiguturie-tago, amó kuvia gigiguta fufuguturie.
10 Amindu, amó aná enembodu neno akuago ea, eghá rirere,
“Númane tumanadu amó injigha egeguturota, anda rari jo niningigea, ambo-ambo ambi egegeta urie.”
11 Aghá-gea, amó neno akuago ea, númandu tamú-tamú eghá rirere,
“Númane jo unumbea bua, anda nangu undari kambesiva namonde terambi aita rore.” ’ ”
12 Anda ikoko mendi, ariri gharovu, rourogo namonde anda God tumanadu jebuga vitia-nu, neno itia, kivu egegara-degea rirota, umonu gaabee ea, nímanda neno roonu kaifa ea goghó egegadi, rere.
13 God da gaga rova oreki gembari vitia-da bee mo, jo fefera oreki dabakodu rambi re. Tefo, namonde amó, God gaabee ari-du, goroto ututuria-du reirie. Ená goroto utua-da rova, rourogo ari-bari akokogomi kuvia gata, gogore ea, God du goitu fotara-degea, fefera inono mino-mino neno erari gaga rirota, sonembadi rere!
14 Namonde amó umonu gaabee ea, unda natofo urera feferava, namonde Keriso du itoko jo mana-mana ambi re. Aghá-gea, oreki namonde anda gaabee ari kaifa ea goghó urota ya, amburarimi tano ae!
15 God da gaga anadu reirie,
“Oreki God da beemi rirota niningigadora mo,
mania mambube mane uvu tefo, enembo irambi kambesiva gogore ea,
unda Gaga bua fugituria, aghagonu egegata!”
16 God da gaga ningia, undú goitu fotituria enembo mo, avodu reiri? Aná Moses da roo enda ragaro Isip reta unumbea bua furia enembodu reirie.
17 Kotú, ghaeko 40 da rova, God enembodu neno akuago uria mo, avodu reiri? Enembo dabako anami ari-bari akokogo egegutueta, God na ririeta, númane kambesi uvu tefo, kotú enembo irambi anava sirivu uta fufuguturia-du ririe.
18 Kotú enembo dabako anami, God du goitu fotituria-du God tamú-tamú eghá ririe, “Númane jo unumbea bua, anda nangu undari kambesiva namonde terambi aita rore.”
19 Avore, namonde oreki tanana rosore, númane jo ya, God dava terua, nangu undambi egeguturia-da bee mo, númanda gaabee ari God dava tefo re.