3 Jon
Jon unda ingiso ambova gefiria, aná evere.
Iesu da ambo nimbi eini, ragaro Jon, umó emboko ea, ghaeko* 85-95 Iesu siroruturia-da ambova ená gaga gefirie.
Jon unda ingiso gefirota, unda ragaro jo isaghava gembambi re. Umó undufa isuri urota, ená ingiso embó ragaro Gaius dava gefirota tufoko, “Amó inda bego re.” rirota gefirie.
Gaius irugari kakato dumeni Iesu da Gaga irugaita rea, esega furia-du ghaito teno fugeta uria-du, Jon undú raga ririe. Aghade, Jon na, rourogo aná irugari kakato tuveta uria embó, ragaro Diotrefes nu ambo-ambo auve-degea gefirie.
1
1 Ariee, anda komana Gaius ko,
Amó inda bego re. Anona imó neno bua goghó eta rore. Imó ghanena bee urota, ená ingiso rei-gefereta. Yata bua gi!
2-4 Anda neno bari komana, imó gaa beeda ambo-ambo urota, anada aito fugeta rora-nu, namonde anda ikoko mendi dumenimi futa bubua, andú ritata ningia gangoro rore. Anada bee mo, anda sasingu gaabee urota irarida aito fugeta rousua-du, amó gangoro jojabe eta rore. Domi jo ata, amó gangoro aghago ambi aita rore. Kotú inda asisida jebuga kaifa ueta, taubana vitia aghagonu, Jojabee na daiyagha inda tamode iraride dano kaifa asueta, imó taubana irasira-du rea, undava benunu eta rore.
5 Anda neno bari komana, inda buro donu God da natofodava eta rora, aná ea goghó eta roravore. Kotú ikoko mendi dumeni, imó tanana ambi esega indava bubari beago, kauta kavevera eta rora, aná taubana bee re.
6 Númanena inda neno bari daiyaghago eta rora, God da natofo eve vitia-du ritata niningiguta. Avore, benunu rere: God indú daiyagha gangoro asua-nu nundubuturota, númane nanjigo fufugadua feferava, númane sonembadi rere!
7 Anada bee mo, númane Iesu da Ragarova buro aita rirota, númanda kambesi doa, isaghava yari furari eta rouvia-va sonemba eini gaabee ambi enembodava jo bambi re.
8 Amindu, namonde amó gaabee ari kakatomi enembo aghagodu, orokaiva rea, ghaito teno fugea kauta kavevera egegasire. Aghá egegadora mo, namonde amó buroda bouvu inonova fufirota, númanena Gaa Beeda gaga vesa egegoe!
9 Amó ingiso eini ekaresia* anava desea vitia-du gefivutare. Tago, Diotrefes unda uno, umó númanda barirari aita sei-sei eta rouvie. Aghá-gea, umó andú jo verua ambi, anda gaga ningia ningambigo eta rouvie.
10 Atá amó ya, nímandava bubadora mo, unda gavera unongu námanda tamova reta rouvia-nu, isaghava rata nímane niningigaita rosoravore. Tago, anada itiva eghá eta rouvie. Gaga Taubana minono reta rousua-da ikoko mendidu, ghaito teno jo fugambi eta rouvie. Aghade, aná minono rari kakatodu, avona simbugea ghaito teno fugari mo, unona doari-du rirota, númane tuveaveta, ekaresia doa seserigeta rousue.
11 Avore, anda neno bari komana, imó eghá adora mo, avore. Sembagoda ambo-ambo mania ata! Tago, kaverea, ari taubanada ambo-ambo ege! Avona ari taubana urota iradua, umó aná God da tofo re. Kotú umó avona ari sembago adua, umó jo God gia, tanana ambi vitie.
12 O Demitrius mo, enembo dano undú raga reta rousue. Kotú unda irariva gaa bee ambo-ambo eta rouvia-mi rei-irugetue: umó embó taubana re. Kotú amó beago, umó taubana gaa rere. Kotú imó rei-geroravore, anda gaga dano gaa bee re.
13 Indú rasira-da gaga oruabe vitie. Tago, amó indú ingisova gembari uno ambi re.
14 Aghá-gea, anda rei-nundubutora, jo gaimbo ambi, angá dibe mino-mino gerurota, gaga rea ningaitare. Yata bua gi!
15 God da siriri ari indava iroe!
Kotú inda kokomana enava vitia-mi, imó ghanena rousue. Kotú angá anda kokomana avo vitia, daba-daba ghanena roreta, rege niningigoe!