Filemon
Pol Unda Ingiso Filemon Du Gefiria, Aná Evere.
Pol, unda komana Filemon dava ingiso gefiria, aná evere. Filemon, umó Kolosi bogu naava embó eini re. Umó ria-boatode embó re. Umó Pol da komana bee re. Kotú umó gaabee ari embó eini ea vitirie.
Unda sabua* eini ragaro Onesimus unda barirari Filemon nu injigha ea doa sufirie. Pol na umó tambua, Jojabee Iesu da Gaga taubananu Onesimus du iruguturieta gia, gaabee ea, Jojabeeda tofo urie. Onesimus daiyagha kaverea yasua, Filemon gha siriri arimi irasua-nu nundubuturota, Pol na ená ingiso gefirie. Pol, Rom anava dibura ea irirota, aghajora ghaeko* 60 Iesu siroruturia-da ambova ená ingiso gefirie.
Ená gagada mendó mane jo gembambi re. Anada bee mo, ená buka jo yafabe irambi re. Amindu gagada beforo mane irugea gagada mendó mane tanana aita roravore.
1
1 Ariee, Anda ikoko,
Amó Pol re. Iesu Keriso da ragarova diburava irirota, amó angá anda ikoko Timoti gha ená ingiso rei-gefereta. Filemon, imó anda komana re, namonde amó buro danode egegeta urera-du imó ghanena bee roreta. Yata bua gi!
2 Aghade, namonde anda eta rosora aghago, Iesu da ragarova mene-mene rouvia embó Arkipus de, namonde anda gharovu Apia de, kotú Iesu da yavero inda kambova deseta rousua-de dano ghanena bee roreta, rege niningigoe!
3 Namonde anda Afa God kotú Jojabee Iesu Keriso ungá unda sonembade siriri aride nímandu utota bubugadi rere.
4-7 Pol Filemon Da Gaabee Arinu Nundubuturota, “Aiye” Riria Re.
4 O ariee, anda ikoko Filemon, amó fefera nanjogo benunu urota, imó nundubuturota, anda God dava “aiye” reta rore.
5 Anada bee mo, imó angá Jojabee Iesu gaabee urota, God da natofo dano neno buta rora-da bingá regegutuaveta, amó ningita rore.
6 Kotú indú rea, benunu eta rora-da bee, aná evere. Inda gaabee eta rora-da bee natofo jededava vesa urota, namonde amó Keriso de takembea, ea simbugari nanjogo bua vitera-nu nendufa tanana egegari-du rere.
7 Ariee, anda ikoko, inda ikoko mendidava neno evurari gaga reaveta, númane neno esiko egegeta rousua gaganu ningia, amó beago inda neno baridu gangoro jojabe urota, neno yaura rore.
8-22 Pol Umó, Filemon Na Onesimus Da Dara Uria-nu, Nundubea Gia Doari-du Riria Re.
8-9 Amó Iesu Keriso da aghi kato eini re. Iesu da ragarova amó bua diburava itieta vitere. Kotú angá mo, Iesu da jamena re. Aghá-gea, amó oreki imó rea bera-bera asueta, anda gaga ningasiravore. Tago, inda neno barinu nundubuturota, amó indú tefo benunu rore.
10 Onesimus inda sabua, imó doa sumbua furie. Tago, undú neno mema adi rea, benunu urota, rere. Anada bee mo, umó anda mendigo re. Umó eghá urie. Amó diburava irieta, umó imó doa furia andava buburiturieta, Iesu da gaga anona ririeta ningia, gaabee urota, anda mendi aghago ea vitie.
11 Imó sei Onesimus dava buro, kotú sonemba eini jo bambi eta ureravore. Tago, oreki unona amó sonembea goghó eta rouvie. Oreki umó kaverea, indava yadua mo, imó beago, unona sonembea goghó aita rouvie.
12 Oreki anona, umó ninengota indava yaita rouvie. Umó aná anda neno bari mendi-gea, anda neno dano unona bua yaita rouvie.
13 Amó God da Gaga Taubananu minono reta urera-du amó bua diburava ititurieta vitere. Amindu rea, inda kambesi bua, amó diburava irirota, aghi ari-du rasueta, eve andava jirasue.
14 Tago, aghá jo ambi aita rore. Inda unonu ningambi umó irari-du itia bera-bera radora, jo taubana irambi re. O ambova indufa amó sonembuturota, Onesimus rekago ninengota, andava kaverea furadua, aná taubana re.
15 Tago, amó eghá rere. Aghajora Onesimus fefera betufoko imó doa airo vita amindu, umó oreki kaverea ya, ingá danode tumanadu iraita rouvie-jogo.
16 Sei umó inda sabua* ea vitago, oreki umó jo aghago irambi re. Umó Keriso gha danode takembea angá anda neno bari komana eini ea vitie. Umó neno bua goghó eta rore. Oreki imó beago, umó neno bua goghó urota, inda mendi ea, ingá danode irasiravore.
17 Aghadu, amó inda kanona aghago nundubadora mo, andú ghaito teno fugasira aghagonu, undú aghá adi rere!
18 Umó sei, ingá irirota, dara dumeni, o eini-eini bagia uria-nu rege, furota ningia, unda aghá uria-da mino dano utota yata badi.
19 Amó rekago dabako ananu rirota, ená mino utari gaganu anda ingomi rei-gefereta! Unda ari akokogoda mino Pol, anona, utota yata baita roravore. Yata bua gi!
Kotú, anona daiyagha sonembuturieta, imó jebuga tumanadu irari rururera, imó rei-geroravore. Amindu andava guri barida gaga itoko jo nundubambi asiravore.
20 Anda ikoko, angá amó Keriso da natofo ea vitera-du, Onesimus du “Orokaiva” rea, ghaito teno fugea, umó bua kaifa adi rere. Aghá adora, andú neno jama utaita roravore.
21 Tago, ená gaga gefirota, tanana rore, amó dodu benunu rora, inona aita roravore. Kotú itatama rore, anda benunu rera-da itiva inona urota, Onesimus kaifa ea goghó aita roravore.
22 Kotú gaga eini, aná evere: andú evari kambesi eini gategea simbugea do-gea iroe! Anada bee mo, nímanda benunu dano God na ningia rata-gea, amó diburavareta bubua, nímandava yaita rora-nu kaifa gigita urota vitereta! Yata bua gi!
23-25 Pol Na Ghanena Rorogha Urota, Gaga Rea Tano Uria Re.
23 Unda gaabee eta uria-du, nandia diburava ititiguturia embó Epafras, angá danode irirota, imó ghanena rouvieta. Yata bua gi!
24 Kotú, Mak, Aristarkus, Demas, Luk namonde buro egeguturera, númane beago, imó ghanena rousueta! Yata bua gi!
25 Jojabe Iesu Keriso da sonemba, nímane nanjogodava iroe!
Anda gaga eve tano etue.
Amó Pol re.