3
Iguewâm, kurâem itonmâ warâ Cristo. Iwerâ Deus eahoru eynynâ ekadybyem awyly, pymâ ekadodâ. Deusram iweloem âiehoybyem âmaemo, igueypyem Cristo agâ kurâem mitondylymo waunlo ara. Awylygue Deus xurâ modo lelâ, aiedyse ato modo lelâ warâ angahumo odano nidâ. Aunlolâ Deus xurâ wâgâ âpaunzezedaungâ; xirâ anano wâgâ inkâba âpaunzedaungâ. Saguhobyry arapa âmaemo iwerâ; tadainze mârâ. Iweloem âiehoybyem âmaemo iwerâ, Cristo agâ tokaleom ara itybyem. Deus xurâ keba modo nhutuhomoem nuduwâpyra iweloem mâiehohomobyry. Cristo tâinwânse mawylymogue iweloem mâiehondylymo. Xarâ onro anaxi odopâduo, eagâlâ ise âmaemo. Eagâlâ ise âwâkurumo, on-honrumo, âynrumo warâ. Tywâkureim, ton-honreim warâ mâkâ; eara ise âmaemo-ro warâ.
Koendonro lelâ aguyjiene, inakai modo keba
Igueypy inakai adiendyly inmolylâ, arâ lâpylâ inakai amânhedyse matomo imowâdaungâ; Deus xurâem tywykeim ara âenehoinmo akâiedaundâ. Eagâ mohogüin-homobyry keba kulâ mâynanâdyzemo tâiseba itaungâ. Kywypado amânhedyse tâiseba itaungâ. Inakai modo amânhedyse tâiseba itaungâ. Toenzepa âsejiguyunmoze tâiseba itaungâ. Toenzepa kysejiguybe kidyly kulâ ize kydato watay, ilâ modo kulâ ize kydato, Deus takaze kehoem. Adâkehobyry sakanibyry modo agâ Deus iewiâpaze, enagazenehonzemo-ro warâ. Saguhoem Jesus mâinwândylymo iraynâ idânârâ inakai modo amânhedyse matomo amiensezedâmolâ.
Iwerâ olâ awârâ modo imowâdaungâ; âdyem itânry manmelymo-ro waunlo ara samewâdaungâ: tâjiewiâky, ânguydoem tadawyly, ânguy izepa tadawyly, tâdâtunâguedyly, tâdâpyguely warâ. Myguewâdylymo kulâ tâiseba itaungâ. Izewenrymo saguhobyry inakai modo aiedyly imoimbyryenma âmaemo. 10 Kurâ iwelo âmaemo. Itymo owogonromo iwelo keba samerimbyryem, iwelo onwamo mânhedylymo-ro waunlo ara, iweloem ietondybyem mawylymo. Deuslâ aunlolâ iweloem âesezenimo, eara mitomoem, iwâgâ mâuntudyze matomo idânârâ mâuntuhomoem. 11 Awylygue Deus xurâem judeu, judeu keba warâ kydawyly, judeu domodo satâhogue satâybyem, tatâzeba warâ kydawyly, xidadâ odano, idu odano, pymâ, tâwaneim warâ kydawyly âdyem nitaymba awyly. Cristo koendonro kuru awylygue, idânârâ takaze tynrenseim awyly, tynynonro modo agâlâ warâ.
12 Deus xurâ âmaemo. Âwynedylymogue myakâwândy âduakelymo turâem. Awylygue kaikâ kewâtaungâ. Ânguydoempa, koendonroem tâdutuzeba, tyewiâpazeba warâ itaungâ. 13 Inakanhe amâieholymo emaenwâdaungâ lelâ; âpeânze tâkezeba itaungâ. Pymâ Jesus inakanhe amitomobyry tygakeze, arâ lâpylâ inakanhe amâiehohomobyry enanânehonwâdaungâ. 14 Awârâ modo takazeno kuru tâdâpynedyly. Kagonro agâ toenzepa kydâpynedyly mawânrâ on-hoam lelâ kyenehorim, kytanru, kâzewenry warâ âkeloem awyly umelâ. 15 Cristo wâgâ mawânrâ agonromo agâ âdapa lelâ mawylymo. Agâmolâ mâkâ; mâkâlâ inakanhe amidyse matomo xygakerim. Koendâ lelâ mitomoem, mâpynedomoem, mâseinwândomoem warâ Deus âgâsedylymo. Awylygue koendonroem awyly wâgâ anhekyly wâgâ warâ amyguepa tâiseba itaungâ Deusram.
16 Aunlolâ Cristo xunâry odaymope nidâ, idânârâ amânhekylymo, âtaumbyrymo warâ Cristo aguehobyry ara lelâ itoem. Agonromo enomedâdaungâ, xurutaungâ warâ, idânârâ tâzenomery Deusdâpa âeni mâuntuybymogue. Deus itaumbyry awo wâgâ iwenibygue âgâtudaungâ, livru Salmos wogonrogue. Deus wâgâ agueingue âgâtudaungâ, kurâem anhetybygue warâ. Deus Ispiritury tâjigâky nhuduypygue âgâtudaungâ. Tuomare kehoem Deus xurâem âgâtudaungâ, ânguyem awyly wâgâ agueingue, anhekyly wâgâ agueingue warâ. 17 Kywymâry Jesus emary mawylymogue, mâkâ amyguedysemo ato ara aguewâtaungâ, mâkâ amânhedysemo ato ara aietaungâ warâ. “Koendonro âmâ, xinaem amânhetyby wâgâ” kewâtaungâ Kunwym Deusram. Jesuslâ mawânkâ aguykehobyry Deusram sani.
Koendâ lelâ âzetaungâ
18 Tâjiwysaro modo, osomo aguehobyry aietaungâ, arâ mawânkâ Kywymâry Jesus Cristo einwânni modo aidyly.
19 Tâjiso modo, âwydymo koendâ etaungâ, iwynedaungâ. Âwydymo kâjiewiâsedaundâ, kâzenagazedaundâ warâ.
20 Tâjimeombyry modo, unwânmo, âzemo warâ einwântaungâ. Awârâ mawânrâ Deus ize ato, Kywymâry Jesus xurâem mawylymogue.
21 Tâjiunwyndo, âmeonmo kâzeusedaundâ, newiâpabyra, nitywambyra warâ itomoem.
22 Tâwanuneim modo, pymâ xirâ anano modo aguehobyry kadakadaundâ. Inuagaendylymo ume lelâ inkâba âsewaniwâdaungâ, koendâ amyguehon-hoem kulâ waypa. Koendâ lelâ âsewaniwâdaungâ, Kywymâry Jesus einwânni mawylymogue. Aiedyse ato mankadylymo tytazema âmaemo. 23 Idânârâ âwanu amânhekylymo, amânhedyse mawylymogue aietaungâ, tuomare, tugüigue warâ. Âwymârymo xurâem kulelâba, Kywymâry Jesus Cristo xurâenlâ amânhedylymo nidâ. 24 Mâkâlâ ipywanimo awyly enanâguewâdaungâ. Tâinwânni modo xurâem kaynâ tienkanâguyly koendonro ise mâkâ âyanmo nhuduly. Cristo mawânkâ âwymârymo kuru. 25 Idânârâ epywaze anhetyby aralâ. Koendonro aienibyry modoram, koendonrolâ ise nhuduly. Inakai aienibyry modoram inakailâ ise nhuduly warâ. Iozelâ ise arâ anhedyly.