7
Ânguy kienwentâbyra kine
(Lc 6.37-38,41-42)
1 Jesus aguely:
— Ânguy kâzewentâdaundâ, Deus iwentâbyramo itoem lâpylâ.
2 Âkelomoram mâundulymo ara lâpylâ ise Deus âyanmo nhuduly. Imâem mâundulymo watay, imâem lâpylâ ise Deus nhuduly. Imâemba watay, imâembalâ ise nhuduly warâ.
3 Agonromo tâwentâze âmaemo, âdiempa inakanhe aitobyry wâgâ kulâ, âmaemo olâ inakanhe kuru aini. Koendonro mâkeba awârâ. Agonro âzenupialodobyry lelâ mâenkylymo, inumo odano se iwatary imâsedo pylâ mâempyra âmaemo-ro myara.
4 Agonromo âzenupialodobyry etyze myguewâdylymo, inumo oday se iwatarybe awyly umelâ.
5 Saguhoem wao inumo odano se iwatary etywâdaungâ, koendâ agonromo âzenupialodobyry mâentyhomoem. Koendonro emyenro wâne âmaemo, inakanhe kulâ olâ amidylymo! Saguhoem kuru wao inakanhe amidylymo imowâdaungâ. Inakanhe amidylymo mâinmopygueduomoma ise tâwâlâ agonrodo mâunrudylymo, inakanhe anipyra itoem.
6 — Deus itaumbyry egatuly izepaom modo tindadyseba awyly umelâ aguehonly watay, tindadyseba inkâba, Deus itaumbyry iweniby kaxoroam samely waunlo ara kulâ. Amyguelymo watay, kaxoro ara otoguyzemo, nhâsemo warâ. Tuhu tâwâenseim pâsega nhakabehoem samely myara kulâ ise amyguehomobyry — kely Jesus.
Ize kydato Deusram kyzekane
(Lc 11.9-13)
7 Jesus aguely:
— Ekadaungâ. Mâenkaduomo, emakeze lelâ âmaemo. Xuiwâtaungâ. Mâwinduomo, soenkeze lelâ âmaemo. Pyantaylâ âtâ sodo igâsedaungâ, enahungueze lelâ mawânkâ.
8 Idânârâ ekanibyry modo emakeze. Xuirimpyry modo soenkeze. Âtâ sodo pyantay tygâsenibyryram enahungueze.
9 Âmerymo turu nhekaduo, tuhu mâunduwâpyra âmaemo.
10 Kanra âjihuyby nhekaduo, âgâu mâunduwâpyra âmaemo eoduem.
11 Inakai wâne âmaemo, iwâkuru modo olâ âmerymoram mâundulymo. Kunwym kaynonroma kuru koendonro-ro; koendonro modo xuduze ekanibyry modoram!
12 — Âkelomo agâ koendâ itaungâ, agâmo koendâ awyse matomo ara. Xirâ aguely mawânrâ Moisés inweniby, akaemo Deus wâgâ aguewâni modo konomedâdobyry warâ — kely Jesus.
Aguipa kulâ ise Deus eydâ atoram idâwâni modo
(Lc 13.24)
13 Jesus aguely:
— Agui lelâ yeinwândysebaom modo tâwâlâ ize tato ara kulâ adâidyse awylymo; Deus ize ato ara adâidysebamo. Pyanta tâtaydygueim oze tâgawândyse awylymo, ânwa tâtaydygueim oze tâtâdyze awylymo warâ. Awylygue ise tâdâsenagazedoram kulâ idâlymo, Satanás eydâ atoram. Akaemo araba itaungâ. Yeinwântaungâ, pyanta tâtabigueim oze egawânni ara.
14 Ton-honreim olâ awârâ ânwa tâtabigueim oze tâdâtâly, pyanta tâtabigueim oze tâzegawândyly warâ, myara lâpylâ aguipa kulâ Deus eydâ atoram idâwâni modo, tâwâlâ âjize tawyly imowâni modo, Deus ize ato ara lelâ aitaynrim modo warâ — kely Jesus.
Konokuze kulâ “Deus itaumbyry egatuim xina” kewâni modo
(Lc 6.43-44)
15 Jesus aguely:
— Tonomeguelâ itaungâ, “Deus itaumbyry egatuim xina” kewâni modo agâ. Udodo kaneru xuhudugue âzetydâdyby emyenro kulâ akaemo.
16 Inakanhe aidylymogue olâ ise Deus eynynonro keba awylymo mâuntulymo. Tyguyreim, uvague tâwituneba; kazainwam, figugue tâwiseba warâ. Tâwilygue lelâ mawânrâ nady modo ewitu.
17-18 Se takyguenry, koendâ lelâ ewily, ein-hoem tuduze. Se takygueim, inakanhe lâpylâ ewily, ein-hoem nudupa.
19 Se koendâ tâwisenry satâly lelâ. Peto onwanji samely-ro warâ.
20 Warâ ise ânguy Deus wâgâ koendâ aguenri, ânguy konokuni warâ awyly, mâuntulymo aidyly wâgâlâ — kely Jesus.
Idânârâ inkâba ise Deus pymâem atoram tâdâtâly
(Lc 13.25-27)
21 Jesus aguely:
— Deus aguehobyry ara aini modo lelâ ise Deus eydâ atoram idânri. Toenzepa kurâ domodo yam, “Pymâ, pymâ” kewâni modo, kewâdylymo kulâ olâ. Pabai kaynonro eydâ atoram nâtâwâbyramo ise, Deus aguehobyry ara anipyra awylymogue.
22 Xypyry etay, “Jesus eynynonro xina” kewâtyby modo warâ ise yam aguelymo: “Pymâ, Deus itaumbyry xina egatuwâm on-honrugue. Toenzepa kadopâ modo xina egaseânmâ, toenzepa adyesenry modo warâ xina aiemâ on-honrugue” kezemo yam.
23 Warâ olâ ise eyanmo auguely: “Âutuwâbyramo urâ. Ydâpa itaungâ, âmaemo inakanhe aitaynrim modo!” keze lelâ urâ — kely Jesus.
Deus aguehobyry ara lelâ aini, aguehobyry araba aini warâ
(Lc 6.47-49)
24 Jesus aguely:
— Deus itaumbyry indadyly, aguehobyry ara aidyly waunlo uguondo tonomegueim, tuhu wâgâ tâty itânibyry emyenro.
25 Toenzepa kopâ ihugueduo, paru inwenly. Sapezenru ton-honre kehoem âtâ onwa idâly. Mârâ âtâ olâ nihugueba, tâhugane kehoem tuhu wâgâ itâdyby awylygue.
26 — Deus itaumbyry idani, aguehobyry ara aniempyra olâ waunlo uguondo sagunu wâgâ tâty itâni emyenro kulâ.
27 Toenzepa kopâ ihugueduo, paru inwenly. Ton-honre kehoem adapezeinly âtâ onwa. Aituo âtâ ihuguely. Idânârâ kehoem adakalaguely, tâhuganeba itâdyby awylygue — kely Jesus.
Adâkeho tutuze lelâlâ Jesus
28 Jesus aguepygueduo, toenzepa myani kurâ domodo âsewânily, arâ tâzenomedâoduomo.
29 Aguelymo:
— Adâkeho tutuze lelâlâ awâkâ uguondo! Ton-honruguelâ awâkâ aguely, akaemo Moisés inweniby wâgâ enomedâni modo ara inkâba — kelymo.