4
João tâjigâky indatobyry
1 Jesus tynynonro modoram xirâ modo auguehoem aguepygueduo keankâ, pyanta ara kau wâgâ âzenahunguely kâendyly. Âzenahunguehobyry oze Deus eydâ ato sedâ, tâjitanru xidadâ warâ. Trombeta ara keankâ itanru ipyru. Saguhoem yam agueypylâ keankâ yam agueoni.
— Xarâ âkugâ, wayam waunroem âdydo imeom aitaynrim modo âyam kâenehohoem — kely.
2 Aguepygueduolâ kehoem keankâ ienu âtygadyly; Deus Ispiritury âewyly, wayam waunroem aini modo kâentoem aienehonze. Deus sedâ mure imâsedo, iwâkuru warâ wâgâ ekadybyem awyly, pymâem atodâ.
3 Tohozele kehoem keankâ, tuhu iwâkuru kehoem jaspe ara, sárdio ara warâ. Mârâ mure Pymâ Deus xurery tânâmize nanagope keankâ. Tuhu esmeralda ehozelu ara keankâ ehozelu.
4 Mâkâ Pymâ xurery tânâmize vinte e quatro lelâ mure sedâ. Vinte e quatro agaityom tynrenseim modo mârâ modo wâgâ ekadybyem sedâ warâ. Tapekeim keankâ etymo iwogonromo. Koroa ourugue xygatyby keankâ nhangahumo wogonro, pymâem awylymo xutuho.
5 Ielu âzehoruguely sedâ Pymâ Deus xurery wâgâ. Ielu âjipyruguely ton-honre kehoem xidadâ lâpylâ mârâ muredâ. Tâzekado emyto tâlâ keankâ sete esagon-ho tyatygueim modo. Sete lelâ ispíritu Deus emary modo mârâ nhenehonly.
6 Pymâ Deus xurery xuaynâ tâlâ keankâ paru emyenro, tysenzeim kehoem vidru ara, tuanreim olâ keankâ, cristal emyenro.
Pymâ xurery tânâmize taynâ, tâynâ warâ quatro ânguydo imeompe keankâ. Toenzepa keankâ mâkâ modo enu, waunroem, âgânâ alelâ.
7 Leão emyenro keankâ waunro kuru. Azagâ ieto keankâ xibu emyenro. Azagâ tokalâ ieto keankâ kurâ emydygueom. Quatro ieto keankâ ârigâ sawâguni emyenro.
8 Akaemo quatro ânguydo imeom seis, seis, seis, seis warâ sawâry. Sawârymo wâgâ kehoem keankâ akaemo enu, MON warâ kehoem. Deus wâgâ tygâky nimopamo keankâ:
— Âdalâ inakanhe aityby mâkeba âmâ, Pymâ Deus.
Inakai aieni mâkeba âmâ, koendonro lelâ aieni.
Idânârâ takaze on-honru.
Igueim mâkeba âmâ; tâlâ mykâinane âmâ saguhoem.
Iwerâ tâlâ âmâ. Aunlolâ ise tâlâ mawyly warâ
— kely keankâ igâkymo.
9 Warâ keankâ Deus pymâem awyly wâgâ igâkymo lâpylâ:
— Ton-honreim, iwâkuru warâ âmâ! Tynrenseim âmâ! Tuomare xina, koendonro xinaem aieni mawylygue! Igueim mâkeba âmâ — kelymo Deusram.
10 Akaemo quatro ânguydo imeom Deus xurâem igâky ume keankâ akaemo vinte e quatro agaityom tynrenseim modo âzeguhoam itybyenmo Deus enado. Tykoroary nhetylymo. Nhekanâdylymo Pymâ Deus xurery enado. Pymâlâ wâne akaemo, Deus olâ pymâem kuru nhutulymo, takadâmo kehoem.
11 Warâ keankâ igâkymo:
— Xina iwymâry kuru âmâ.
Âmâ kulelâ Deus xina nheinwânkyly.
Tohoguezeim, tynrenseim warâ âmâ.
Awylygue koendâ mawyly wâgâ, tynrenseim mawyly wâgâ, ton-honreim mawyly wâgâ warâ xina aguely.
Âmâlâ idânârâ tâlânro modo xuguni.
Awylygue idânârâ tâlâ awyly, ize mawylyguelâ
— kelymo keankâ Deusram.