10
Leukahˊ leupongˊ lawng konˊyungˊ maeeˊ cawoˊ goˊ ka
Uiˊ lahˊ a ri peˊ neumneum, peue unˊ ingˊ lec hk'aˊ leuvaˊ ka kok konˊyungˊ naˊ, daecti eun hukˊ ri lec hk'aˊ tawk seubu naˊ meuh eun peue conˊ peue ra. Daecti peue ingˊ lec hk'aˊ leuvaˊ naˊ meuh eun cawoˊ goˊ ka konˊyungˊ naˊ. Peue koˊ leuvaˊ naˊ eun tahˊ leuvaˊ naˊ ri heun. Konˊyungˊ naˊ a leuceng leukahˊ eun. Eun klawng muis ka konˊyungˊ ri naˊ ti tuˊ hawcˊ ti tuˊ. Eun va konˊyungˊ ri naˊ ce pucti heulˊ. Hawcˊ va eun konˊyungˊ ri naˊ ce pucti heulˊ eucˊ naˊ, eun heulˊ nanggalˊ ka konˊyungˊ ri naˊ. Kopti konˊyungˊ Eun naˊ yawng a leukahˊ eun naˊ, a hotˊ eun heulˊ. Daecti konˊyungˊ naˊ a hkuinˊ duing hotˊ peue unˊ yawng ri naˊ eun. Lheuˊ awnˊ na, a sawm hk'uih ri heun kopti unˊ yawng a leukahˊ eun naˊ.” Yesuˊ lahˊ Eun leukahˊ leupongˊ aenˊ a ri ce, daecti Eun ciˊ lahˊ lawng keunhawˊ naˊ, ce hkuinˊ leuceng pun a.
Kop awnˊ na Yesuˊ Eun tang lahˊ a baee, “Uiˊ lahˊ a ri peˊ neumneum, meuh Uiˊ leuvaˊ ka konˊyungˊ naˊ. Peue ingˊ nanggalˊ Uiˊ naˊ meuh ce peue conˊ peue ra. Daecti, konˊyungˊ naˊ a hkuinˊ leuceng leukahˊ ce. Uiˊ meuh leuvaˊ awnˊ na. Aˊnhawˊ lawn ingˊ lec Uiˊ koˊ, eun kaw pun ri lawtpon. Eun kaw lec lih a. Eun kaw nyu rip seungal vang saee chakˊ naˊ. 10 Peue conˊ naˊ ingˊ eun punta kaw eun ingˊ ra, ingˊ toh maeeˊ ingˊ yeuh kuˊ lulaic naˊ palkoe. Uiˊ ri, Uiˊ lih punta kaw ce pun aˊyu ri, a meuh aˊyu htonnuk naˊ.
11 Meuh Uiˊ Cawoˊ goˊ konˊyungˊ chakˊ. Cawoˊ goˊ konˊyungˊ chakˊ naˊ eun hkamˊ ri sum aˊyu ri naˊ pun konˊyungˊ ri naˊ ce. 12 Peue rapcangˊ goˊ konˊyungˊ naˊ eun hkuinˊ meuh cawoˊ ka konˊyungˊ naˊ. Kop awnˊ na, yam ruk naˊ ingˊ ka naˊ, eun tec muk ka konˊyungˊ naˊ, eun hk'uih. Hawcˊ koˊ, ruk naˊ a ingˊ lec ri yeuh muk ka konˊyungˊ naˊ lulaic, hk'akcakˊ puri. 13 Peue awnˊ eun hk'uih, kopti meuh eun peue rapcangˊ naˊ. Eun unˊ hkiˊkeung ri konˊyungˊ naˊ.
14 Meuh Uiˊ Cawoˊ goˊ konˊyungˊ chakˊ. Uiˊ yawng konˊyungˊ ri naˊ ce, konˊyungˊ Uiˊ naˊ ce ku yawng Uiˊ ri 15 seunˊ Aˊkuiingˊ yawng Eun Uiˊ naˊ, Uiˊ ku yawng Aˊkuiingˊ Eun. Uiˊ hkamˊ ri sum aˊyu ri naˊ pun konˊyungˊ ri naˊ ce. 16 Uiˊ ku kawnˊ kueˊ konˊyungˊ nang seubu kuˊ unˊ meuh isˊ ka kok aenˊ na, Uiˊ kaw kah ri heulˊ va ce ingˊ yeut. Konˊyungˊ titˊ ce ku kaw leuceng leukahˊ Uiˊ. Ce kaw pawngˊ ri meuh ti muk maeeˊ muk aenˊ ce. Ce kaw kueˊ yawo Cawoˊ goˊ ti peue. 17 Kuiingˊ Uiˊ leumeusˊ Eun Uiˊ naˊ meuh a kopti hkamˊ Uiˊ ri sum aˊyu ri punta kaw Uiˊ tang pun aˊyu awnˊ a keutah baee naˊ. 18 Aˊnhawˊ hkuinˊ rutrimˊ ri ti aˊyu Uiˊ naˊ hk'aiˊ Uiˊ, daecti sahpawˊ Uiˊ ri hkamˊ ri sum ri naˊ meun. Kueˊ Uiˊ tiˊca kaw hkamˊ ri sum aˊyu ri naˊ, maeeˊ tiˊca kaw rap ri ti aˊyu tang keutah baee naˊ. Pun Uiˊ leukahˊ tuilˊ aenˊ a ri Kuiingˊ Uiˊ Eun.”
19 Leukahˊ aenˊ a yeuh peue Yuˊda naˊ ce tang gvah muk gvah cum ri naˊ baee. 20 Peue heunˊ naˊ ce lahˊ, “Seucaˊ lec ka Eun, eun buicbuic lahˊ leukahˊ unˊ cengˊ unˊ saeeˊ. Leuceng leukahˊ Eun naˊ meuh keunhawˊ?”
21 Daecti peue seubu naˊ ce lahˊ, “Aenˊ hpaw a caˊ meuh leukahˊ peue seucaˊ lec. Seucaˊ naˊ kaw a cang yeuh peue ngaiˊ fecˊ naˊ eun nyu hk'aˊ ri aw?”
Peue Yuˊda naˊ unˊ yumˊ ce Yesuˊ Eun
22 A rot yam yeuh pawe sukˊseunˊ nya hk'oˊ munˊ keuting nang veng Yeruˊsalaem naˊ. A meuh yam kawtˊ. 23 Yesuˊ Eun buih lawngˊlaengˊ ri hotˊ nang aˊrasˊ rum Sawˊlamon nang kangˊhkungˊ ka nya hk'oˊ munˊ keuting naˊ. 24 Peue Yuˊda naˊ ce ingˊ rop Eun. Ce lahˊ, “Mi ciˊ kawnˊ kaw uinˊ ye kangkae ri ti lingˊ aˊneng? Mi lawn meuh Hkrit neum koˊ, lahˊ seumeuˊ ye mhawngˊ a reuˊ.”
25 Yesuˊ Eun topˊ a, “Lahˊ Uiˊ peˊ mhawngˊ a hawcˊ, daecti peˊ unˊ yumˊ Uiˊ. Kuˊ hk'oˊamˊ yeuh Uiˊ hk'aˊnaee muis Eun Kuiingˊ Uiˊ naˊ hkamˊ a saˊhkiˊ lawng Uiˊ naˊ hawcˊ. 26 Daecti unˊ yumˊ peˊ Uiˊ kopti unˊ meuh peˊ konˊyungˊ Uiˊ naˊ. 27 Konˊyungˊ Uiˊ naˊ leuceng ce leukahˊ Uiˊ naˊ. Uiˊ yawng konˊyungˊ awnˊ ce. Ce ku hotˊ Uiˊ. 28 Uiˊ tuilˊ aˊyu cotˊcu naˊ ri ce. Ce hkuinˊ kaw laee duing lulaic heulˊ. Aˊnhawˊ hkuinˊ kaw cang rimˊ ri ti ce hk'aiˊ dak tiˊ Uiˊ naˊ. 29 Kuiingˊ Uiˊ kuˊ ap konˊyungˊ awnˊ ce ri Uiˊ naˊ keuting Eun hk'aiˊ ku ceu gawmˊeucˊ naˊ. Aˊnhawˊ hkuinˊ kaw cang rimˊ ri ti konˊyungˊ awnˊ ce hk'aiˊ dak tiˊ Eun Kuiingˊ Uiˊ naˊ. 30 Uiˊ ri maeeˊ Aˊkuiingˊ meuh ya ti peue.”
31 Pok aenˊ na, peue Yuˊda naˊ ce seutˊ meulˊ seumu kaw dhimˊ Yesuˊ Eun baee. 32 Daecti Yesuˊ Eun lahˊ a ri ce, “Yeuh Uiˊ peˊ nawk kuˊ chakˊ heunˊ ceu lih neum Aˊkuiingˊ Eun naˊ hawcˊ. A ciˊ meuh kopti kuˊ chakˊ ceu nangnhawˊ naˊ, peˊ vaeeˊ seutˊ meulˊ seumu peˊ kaw dhimˊ Uiˊ?”
33 Peue Yuˊda naˊ ce topˊ a, “Hpaw ye caˊ kaw dhimˊ Mi ri meulˊ seumu kopti yeuh Mi kuˊ chakˊ naˊ. Daecti kaw ye dhimˊ Mi kopti unˊ nawpsang Mi Peucawoˊ Eun naˊ. Chaeeˊ gup meuh Mi peue yawo, daecti Mi sawnˊ meun tuˊ ri naˊ meuh Peucawoˊ Eun.”
34 Yesuˊ Eun topˊ a ri ce, “Hk'aˊnaee htawm leukahˊ ritroe peˊ naˊ Peucawoˊ lahˊ Eun a yeuh keutitˊ, ‘Lahˊ Uiˊ, peˊ meuh Cawoˊ’*, unˊ meuh ka aw? 35 Yawng eˊ kuˊ hk'aˊnaee htawm Seungaˊ naˊ lahˊ ka naˊ maeeˊ kuˊ Peucawoˊ klawng Eun ce meuh Cawoˊ naˊ meuh a kuˊ neumneum. 36 Kopti Aˊkuiingˊ leuk Eun ri cusˊ Uiˊ lih pang bhenˊ keuteˊ naˊ, naˊ Uiˊ lahˊ ri meuh Konˊ aiˊ Eun Peucawoˊ koˊ, a ciˊ meuh kop keunhawˊ peˊ vaeeˊ lahˊ Uiˊ unˊ nawpsang Peucawoˊ Eun? 37 Uiˊ lawn unˊ yeuh kuˊ yeuh Eun Kuiingˊ Uiˊ naˊ koˊ, pawlaee yumˊ Uiˊ. 38 Daecti Uiˊ lawn yeuh a koˊ, peˊ saecˊ naˊ unˊ yumˊ Uiˊ, yumˊ kuˊ yeuh Uiˊ naˊ reuˊ. Yeuh keutitˊ koˊ, naˊ peˊ leuceng pun yawng Aˊkuiingˊ utˊ Eun hk'aˊnaee Uiˊ, Uiˊ utˊ hk'aˊnaee Aˊkuiingˊ Eun naˊ.” 39 Pok aenˊ na, ce coˊcaˊ ri kaw mheutˊ Eun baee, daecti Eun pucti heulˊ hk'aiˊ ce.
40 Hawcˊ awnˊ na, Yesuˊ Eun tang klongˊ Yawˊdan naˊ, Eun keutah ingˊ vang Yoˊhan tawn tuilˊ eun hk'aˊ cumˊ nanggalˊ aenˊ ce naˊ. 41 Peue heunˊ naˊ ce ingˊ ri Heun. Ce lahˊ, “Yoˊhan eun saecˊ unˊ duing yeuh hetˊ keuting naˊ, daecti kuˊ Yoˊhan lahˊ eun kuˊ toˊ ri lawng Eun peue aenˊ Eun naˊ meuh a kuˊ neum gawmˊeucˊ.” 42 Peue ingˊ yumˊ Yesuˊ Eun heunˊ peue ri mawnˊ naˊ.
* 10:34 10:34 Sukˊseunˊ 82:6