21
Cawoˊ pe lec Eun veng Yeruˊsalaem
1 Yam hukˊ rot ce keunam veng Yeruˊsalaem nang yungˊ Bethpageˊ pang gong Sanlon naˊ, Yesuˊ Eun cusˊ tapaeˊ lalˊ peue naˊ ka heulˊ.
2 Eun lahˊ a ri ka, “Heulˊ ri yungˊ utˊ nanggalˊ tehˊ a reuˊ. Paˊ kaw keulawnˊ pun ri nyu rawngla aetˊ naˊ mawt a ri maeeˊ ma ri naˊ tiduihˊ tehˊ. Paˊ naˊ kahˊ ri teukˊ a heulˊ maenˊ.
3 Peue ti ri peue eun lawn naˊ lhonˊ ri mhaingˊ paˊ ri kuˊ ti ri ceu koˊ, paˊ naˊ lahˊ, ‘Cawoˊ loˊ Eun a.’ Peue awnˊ eun kaw keulawnˊ kahˊ ri tuilˊ a ri paˊ.”
4 Aenˊ meuh a neumneum hotˊ seunˊ kuˊ peue suip leukahˊ Eun Peucawoˊ naˊ lahˊ eun ri uinˊ naˊ. A lahˊ,
5 “Lahˊ a ri peue veng Yiˊon naˊ ce yeuh keutitˊ reuˊ,
‘Keueˊ reuˊ, Hkunˊhawˊhkamˊ peˊ naˊ buih ingˊ Eun.
Eun hpumˊ onawnˊ, Eun pawk rawngla naˊ,
Eun pawk rawngla aetˊ naˊ ingˊ.’ ”
6 Tapaeˊ lalˊ peue naˊ ka ku heulˊ hotˊ ri yeuh seunˊ kuˊ Yesuˊ tuilˊ Eun leukahˊ ri naˊ.
7 Ka teukˊ rawngla ma naˊ maeeˊ konˊ ka naˊ ingˊ. Ka lhupˊ hk'o dalˊ ri naˊ pang kuiˊ ka naˊ. Yesuˊ Eun pawk a.
8 Peue cum heunˊ naˊ ce ti ri tawm hk'o ri naˊ nang gonˊhk'aˊ naˊ. Ngonˊ ce tawsˊ yuim naˊ, ce tawm a nang gonˊhk'aˊ naˊ.
9 Peue cum heunˊ heulˊ nanggalˊ maeeˊ peue heulˊ hk'aˊkuiˊ Eun naˊ ce klawng ri lahˊ,
“Hosana, ri Konˊ aiˊ eun Davitˊ naˊ Eun.
Nap munˊ ri Cawoˊ ingˊ hk'aˊruim muis Eun Peucawoˊ naˊ Eun.
Hosana, ri kuˊ lhungˊ hk'aiˊ peue naˊ Eun.”
10 Yam Yesuˊ hukˊ lec Eun nang veng Yeruˊsalaem naˊ, peue veng naˊ ce tuinˊtung seutuin seutan. Ce mhaingˊ, “Hkawnˊ Eun ciˊ meuh aˊnhawˊ?”
11 Peue cum heunˊ naˊ ce topˊ a, “Hkawnˊ meuh a Yesuˊ Eun. Eun meuh peue suip leukahˊ Eun Peucawoˊ ingˊ neum veng Nasaraetˊ kuingˊ Galilaeˊ naˊ.”
Yesuˊ yeuh Eun nya hk'oˊ munˊ keuting naˊ seungaˊ chakˊ
12 Yesuˊ Eun ingˊ lecˊ nang kangˊhkungˊ ka nya hk'oˊ munˊ keuting naˊ. Eun ra ri tec peue paingˊ hk'eung maeeˊ peue leuvaee hk'eung mawnˊ naˊ ce pucti heulˊ. Eun seukleupˊ hpuinˊ ce peue leuplohˊ leumuil naˊ maeeˊ pangˊ mokˊ ce peue paingˊ guiˊ naˊ.
13 Eun lahˊ a ri ce, “Kueˊ a leukahˊ temˊ ri yeuhkiˊ, ‘Nya Uiˊ naˊ meuh a vang hk'oˊ munˊ’, daecti peˊ yeuh a meuh vang hk'onˊro conˊ.”
14 Peue ngaiˊ lecˊ maeeˊ peue tiˊ cung lu naˊ ce ingˊ ri Heun nang kangˊhkungˊ ka nya hk'oˊ munˊ keuting naˊ. Eun ku baiˊ ce cuin.
15 Daecti yam peue jhawpˊ rit keuting maeeˊ peue guil leukahˊ ritroe naˊ pun ce ri nyu kuˊ hk'oˊamˊ yeuh Eun naˊ ce maeeˊ pun ce ri mhawngˊ konˊ nyom naˊ klawng ce ri lahˊ, “Hosana ri Konˊ aiˊ eun Davitˊ naˊ eun”, nang kangˊhkungˊ ka nya hk'oˊ munˊ keuting naˊ, ce seungeuengˊ nyawkˊ.
16 Ce mhaingˊ Yesuˊ Eun, “Unˊ mhawngˊ Mi kuˊ konˊ nyom aenˊ klawng ce ri lahˊ naˊ aw?”
Yesuˊ Eun topˊ a, “Mhawngˊ Uiˊ a yeut. Kuˊ temˊ ri yeuhkiˊ naˊ unˊ duing lip peˊ a aw? A lahˊ,
‘Yeuh Mi leukahˊ sukˊseunˊ naˊ
pucti lih hk'aiˊ moeng ce konˊ nyom maeeˊ oˊngak naˊ ce hawcˊ.’ ”
17 Hawcˊ koˊ, Eun gahˊ hk'aiˊ ce pucti heulˊ hk'aiˊ veng naˊ. Eun heulˊ keuluiˊ ri nang yungˊ Betaniˊ naˊ.
Yesuˊ Jhaˊ Eun kleumˊ pliˊ keutuic
18 Peunngup cawo yam cengˊ ka naˊ, yam Yesuˊ tang buih hukˊ Eun nang veng naˊ baee naˊ, Eun sumˊ somˊ.
19 Yam pun Eun ri nyu kleumˊ pliˊ keutuic utˊ keunam hk'aˊ ti kleumˊ naˊ, Eun heulˊ ri keunam ka naˊ. Daecti Eun nyu pal lhaˊ ka a unˊ kueˊ pliˊ naˊ, Eun lahˊ a ri kleumˊ pliˊ keutuic naˊ, “Naˊ mi pawlaee pliˊ baee.” Kleumˊ pliˊ keutuic awnˊ a keulawnˊ fitˊ hk'ohˊ hk'oengˊ heulˊ.
20 Yam tapaeˊ naˊ pun ce ri nyu yeuh a keutitˊ naˊ, ce amˊ. Ce lahˊ, “A ciˊ cang meuh yeuh saˊnhawˊ kleumˊ pliˊ keutuic aenˊ a vaeeˊ keulawnˊ fitˊ hk'ohˊ hk'oengˊ heulˊ?”
21 Yesuˊ Eun topˊ a, “Kaw Uiˊ lahˊ a ri peˊ neumneum, peˊ lawn kueˊ hk'aˊ yumˊ unˊ kangkae koˊ, gup kaw peˊ cang yeuh yawo kuˊ meuh ri kleumˊ pliˊ keutuic ti lhemˊ aenˊ a koe naˊ a hkuinˊ meuh, daecti kaw peˊ cang tuilˊ leukahˊ ri gong aenˊ na, ‘Sat ri heulˊ hk'uicˊ lec nang mhaˊseumutˊ naˊ reuˊ’, a ku naˊ meuh yeuh keutitˊ yeut.
22 Hk'aˊnaee hk'aˊ yumˊ peˊ naˊ peˊ lawn hk'oˊ munˊ hk'oˊ koˊ, kaw peˊ pun kuˊ hk'oˊ ri naˊ gawmˊeucˊ ka.”
Mhaingˊ peue lawng Yesuˊ pun Eun tiˊca
23 Yesuˊ lec Eun nang kangˊhkungˊ ka nya hk'oˊ munˊ keuting naˊ. Yam buih sangsawnˊ Eun naˊ, roˊ peue jhawpˊ rit, peue guil leukahˊ ritroe maeeˊ nang kawt naˊ ce ingˊ mhaingˊ Eun, “Mi yeuh ceu nang aenˊ ce, Mi ciˊ cu tiˊca keunhawˊ yeuh a? Aˊnhawˊ ciˊ tuilˊ tiˊca aenˊ a ri Mi?”
24 Yesuˊ Eun topˊ a, “Uiˊ ku kaw mhaingˊ peˊ ti moeng yeut. Peˊ lawn lahˊ Uiˊ mhawngˊ a koˊ, Uiˊ naˊ kawnˊ lahˊ peˊ mhawngˊ Uiˊ ciˊ pun tiˊca aenˊ a ri aˊnhawˊ Uiˊ yeuh ceu nang aenˊ ce.
25 Aˊnhawˊ ciˊ tuilˊ tiˊca tuilˊ hk'aˊ cumˊ naˊ ri Yoˊhan eun, neum kuingˊ pang maoˊ aw, aˊkoˊ neum peue aw?”
Ce saˊlit puri lahˊ, “Eˊ lawn topˊ lih a neum kuingˊ pang maoˊ koˊ, Eun kaw tang cang mhaingˊ eˊ, ‘A ciˊ yeuh keunhawˊ peˊ vaeeˊ unˊ yumˊ eun?’
26 Daecti eˊ lawn topˊ lih a neum peue koˊ, eˊ ku lhatˊ ri peue cum heunˊ naˊ ce. Kopti yumˊ ce Yoˊhan meuh eun peue suip leukahˊ Eun Peucawoˊ naˊ.”
27 Kop awnˊ na, ce topˊ a ri Heun, “Unˊ yawng ye a.”
Yesuˊ Eun lahˊ a ri ce, “Yeuh keutitˊ koˊ, Uiˊ ku hkuinˊ kaw lahˊ peˊ mhawngˊ cu Uiˊ tiˊca keunhawˊ Uiˊ yeuh ceu nang aenˊ ce yeut.
Leukahˊ leupongˊ lawng konˊ me lalˊ peue
28 Daecti, peˊ ciˊ kuit a yeuh saˊnhawˊ? Peue ti peue kueˊ eun konˊ me lalˊ peue. Eun heulˊ lahˊ a ri nang ecˊ naˊ eun, ‘Konˊ, heulˊ yeuh kanˊ nang val pliˊ bui naˊ seunyaenˊ awh?’
29 Konˊ naˊ eun lahˊ, ‘Uihˊ, hpaw uiˊ caˊ kaw heulˊ.’ Daecti hawcˊ ka naˊ eun plinˊ hpumˊ ri naˊ, eun heulˊ.
30 Hawcˊ koˊ, kuiingˊ naˊ eun tang heulˊ lahˊ a ri nang awngˊ naˊ eun seunˊ awnˊ a yeut. Nang awngˊ naˊ eun topˊ a, ‘Kaw uiˊ heulˊ yeut.’ Daecti eun hkuinˊ heulˊ.
31 Konˊ me lalˊ peue awnˊ ka nangnhawˊ eun ciˊ hotˊ ri yeuh alo eun kuiingˊ ri naˊ?”
Ce topˊ a, “Meuh a nang ecˊ naˊ eun.”
Yesuˊ Eun lahˊ, “Uiˊ lahˊ a ri peˊ neumneum, peue cepˊ hkawnˊ maeeˊ beunˊ paingˊ tuˊ ri naˊ kaw ce va puri heulˊ lec nang kuingˊ Eun Peucawoˊ naˊ nanggalˊ peˊ.
32 Kopti Yoˊhan lih seuji eun peˊ nawk hk'aˊ leupaws seumeuˊ naˊ, peˊ hkuinˊ yumˊ eun, daecti peue cepˊ hkawnˊ maeeˊ beunˊ paingˊ tuˊ ri naˊ ce yumˊ eun. Peˊ saecˊ naˊ pun ri nyu ceu nang aenˊ ce hawcˊ koˊ, peˊ hkuinˊ tawsˊ hpumˊ fuin mapˊ ri yumˊ eun.
Leukahˊ leupongˊ lawng sangˊ hpaˊ val pliˊ bui
33 Leuceng leukahˊ leupongˊ seubu naˊ, cawoˊ val ti peue naˊ sangˊ eun val pliˊ bui. Eun ru a rop. Eun kungˊ a isˊ keutuiˊ vang betˊ pliˊ bui. Eun plengˊ a isˊ tupˊ lhungˊ vang koˊ. Hawcˊ koˊ, eun tuilˊ peue sangˊ val naˊ ce sangˊ hpaˊ a. Hawcˊ koˊ, eun heulˊ nang kuingˊ tawk seubu.
34 Yam rot a yam pocˊ pliˊ bui naˊ, punta kaw eun ti pliˊ kuˊ kaw eun htukˊ ri pun naˊ, eun kah mhaiˊ ri naˊ ce heulˊ ri peue sangˊ hpaˊ val naˊ ce.
35 Daecti peue sangˊ hpaˊ val naˊ ce mheutˊ mhaiˊ awnˊ ce. Kuˊ ti peue naˊ eun ce peumˊ eun, kuˊ ti peue naˊ eun ce toh eun, kuˊ seubu ti peue naˊ eun ce dhimˊ eun yeum ri meulˊ seumu naˊ.
36 Cawoˊ val naˊ eun tang kah mhaiˊ seubu heunˊ hk'aiˊ kuˊ nanggalˊ naˊ ce heulˊ ri ce baee. Daecti peue sangˊ hpaˊ val naˊ ce ku yeuh ce seunˊ kuˊ nanggalˊ naˊ ce yeut.
37 Pok tisutˊ ka naˊ, eun kah konˊ me ri naˊ eun heulˊ ri ce. Eun lahˊ, ‘Naˊ ce chakˊ ri hkopyawmˊ ri konˊ me uiˊ naˊ eun.’
38 Daecti yam peue sangˊ hpaˊ val naˊ nyu ce konˊ me eun cawoˊ val naˊ eun naˊ, ce saˊlit puri lahˊ, ‘Peue aenˊ meuh eun peue pun sinˊ. Pawh, eˊ toh eun. Eˊ naˊ rimˊ ri ti sinˊ eun naˊ.’
39 Kop awnˊ na, ce mheutˊ ri jongˊ ri tec eun hk'aˊnok ka val naˊ. Hawcˊ koˊ, ce toh eun yeum.
40 Kop awnˊ na, yam cawoˊ val naˊ ingˊ eun nang val naˊ, eun ciˊ naˊ kaw yeuh saˊnhawˊ ri peue sangˊ hpaˊ val awnˊ ce?”
41 Ce topˊ a, “Kaw eun yeuh caeˊ ri peue rai awnˊ ce. Hawcˊ koˊ, yam rot a yam ti kuˊ seumal naˊ nang seubu kuˊ kaw tuilˊ pun pun eun cawoˊ val naˊ ce, eun kaw tuilˊ ce sangˊ hpaˊ val awnˊ na.”
42 Yesuˊ Eun mhaingˊ ce, “Unˊ duing lip peˊ htawm Seungaˊ ton aenˊ a aw? A lahˊ,
‘Seumu peue goˊ nya naˊ tec ce hawcˊ naˊ,
maetˊmaenˊ meuh a seumu ri kleumˊ nang ceˊ ka naˊ hawcˊ.
Cawoˊ Peucawoˊ yeuh Eun kanˊ aenˊ na,
a meuh kuˊ hk'oˊamˊ ri ngaiˊ eˊ naˊ.’
43 Kop awnˊ na, Uiˊ lahˊ a ri peˊ, kuingˊ Eun Peucawoˊ naˊ rup a ri ti ri heulˊ hk'aiˊ peˊ. A kaw tuilˊ ri ri peue cang pliˊ naˊ ce.
44 Aˊnhawˊ lawn htangˊmeul pang seumu awnˊ a koˊ, eun kaw betˊ. Daecti seumu awnˊ a lawn hk'uicˊ tengˊ aˊnhawˊ koˊ, eun kaw betˊ nyaiˊlheoˊ.”
45 Yam roˊ ce peue jhawpˊ rit maeeˊ peue Hparisaeˊ naˊ mhawngˊ ce leukahˊ leupongˊ awnˊ a naˊ, ce yawng Yesuˊ buih lahˊ Eun ti ri naˊ.
46 Ce sok hk'aˊ kaw ri mheutˊ ri ti Eun. Daecti ce lhatˊ ri peue heunˊ naˊ ce, kopti peue heunˊ naˊ sawnˊ ce Yesuˊ Eun meuh peue suip leukahˊ Eun Peucawoˊ naˊ.