3
Ze ziwaraneun du, Zon go Uwait nugau ze duailel mareun.
1 Ziwas go ebu, em ebuan du banou Sisar-Taibirias go em go wai 15 sag gumeun. Pontias-Pailot go Zudia agaig gumaraneu du. Herot-Antipas go Galili agaig gumaraneu du, gonugau apag Pilip go Ituria mui Trakonitis agaig han gumaraneu du. Laisenias go Abilena agaig gumaraneu du.
2 Annas zaug Kaiapas dual, go Uwait ula danemen dudu banban pet. Ziwas go ebu, Zon, Sekaraias nugau mogoi du tamacag uzan em ula ebu darendai, Uwait nugau ze go ebu aleun.
3 Guzenaimai, Zon nug Zordan Ze gasag go em ebu unum betei awaraimai, Uwait nugau ze duailel maraimai, awareun, “Agal oiagab kekulaiban, agal igul eg semoroiban, alebiag, izan ze ziwaremin, Uwait nug agal igul eg zilagai maramau.”
4 E ze getal du tub Uwait nugau ze doimai, awaraneun du Aisaia nug gonugau agau ebu guzenai sikut weun,
“Du tub go du tamacag uzan em ula ebu ulai dareu, ‘Dubanou Ban nugau abu suban kalai moron. Gonugau abu tuguiai moron.
5 Go manam dareu em unum suban solai mamau. Go abu iluai dareu, tuguiai kalan.
6 Duailel ag abe mamamen, go Uwait nug agal igul eg zilagai maraimai, imaigabun alamau, pimamen.’ ” Aisaia 40:3-5
7 Guzenaimai, duailel asiu Zon nug ze ziwarabun alina, Zon nug awareun, “Ag man nugau ug sul, agal igul eg pet. Uwait ag wagarabun alamau ziwas ebu, ag erunai uminai unamamen?
8 Ag agal igul eg semoroiban, agal oiagab kekulan. Go ipal dudu abe mamam agal igul eg ebuan kolital kekulemen. Ag agal dabeleu guzenai i oiban, enan, ‘Abraham go igual asanig. Guzenaimai, Uwait nug ig isanigaba, ig suban damam.’ Uwait go e aiwag ulis oimai, Abraham nugau zaugul patai mabun iboi.
9 Uwait nugau ebeg sil sapol pataimai, a dulu ebu mai dareu. A dab tub useg naliu i mamau, Uwait nug sapol go oimai, a useg naliu i mamau kuataimai, ab unig oug amaciba, elamau.” Zon nug guzenai awareun.
10 Guzenaimai, duailel agen kolital kanaboromen, “Ig erunaimai, suban damam?”
11 Zon nug koli awareun, “Inen duair go iweiu aliag mui damau, tub oimai, du tub go iweiu tamacag du muramau. In du go ee asiu mui, go guzental guzenamau.”
12 Ipal aiwag wanemen dudu, go ze ziwabun en alaimai, Zon kanaboromen, “Du banou, ig erunamam?”
13 Zon nug kolital awareun, “Agal gumaraneu du nug aiwag wabun awareun guzenaital on. Ag polumaimai, duailel agal aiwag asiu gaul i zob on.”
14 Ipal malai dudu agen mui alaimai, go kanaboromen, “Ig erunamam?”
Gonug kolital awareun, “Ag ipal dudu gaul waganemen, ze polumaraimai, goagal aiwag i zob on. Ag agal salau ebuan aiwag tutak on.”
15 Duailel goagal oiagab oug dabeleu asiu oimai, enemen, “Zon go du go Kristus ta, go tam ta?”
16 Guzenaimai, Zon nug duailel unum awareun, “Iz ag petak ze sil ze ziwaranem. Du tub ses alai dareu, gonugau gusig izal gusig zilaoramau. Iz du naliu tam, gonun, iz gonugau arab ebuan arab galau oi abun iborain tam. Gonug ag Uwait nugau Ah Wes ab sil ze ziwaramau.
17 Go savol ebeg nug patai dareu, go savol sil wit epelaba, wag maba, wol nug go wit sog utaba, wit useg oimai, gonugau zaueim gotulai mamau, sog beu oimai, ab i noumaneun ebu agamau.”
18 Zon nug Uwait nugau ze mui ipal ze naliu asiu duailel oiagab kekulabun en mui awareun.
Zon nug Yesus ze zioreun.
(Matiu 3:13-17; Mak 1:9-11)
19-22 Duailel unum Zon nug ze ziwarina, daren daren, Yesus go han, Zon nug ze zioreun. Yesus ze ziwaimai, go Uwait aurina aurina, Mesgai im oiteun. Oitina, Mesgai wag eiman Uwait nugau Ah Wes meg kurumuk sul go ebu alaimai, tabaugab noun. Mesgai wag eiman du tub nugau zeu sul eneun, “Na izal mogoi pet. Izal oiab nug na en noumaneu. Izal oiab na en naliu pet usaleu.”
Herot nug Zon hiacaranem zau oug heun.
Dai dai, Zon nug Herot, Galili agal gumaraneun du banou, duailel amiagab iwai ze aureun. Einen, go gonugau amag nugau air wanib Herodias, Pilip nugau air oun, mui ipal igul eg meun aureun. Aurina, Herot nug aigsisilaimai, igul eg pet maimai, Zon hiacaranem zau oug heun.
Yesus nugau asagul wanimag.
(Matiu 1:1-17)
23 Yesus go wai 30 ban maimai, salau bigegweun. Duailel agal dabeleu eim enai ze memen Yesus go Zosep nugau mogoi, emen.
Zosep go Eli nugau nag,
24 Eli go Matat nugau nag,
Matat go Liwai nugau nag,
Liwai go Melki nugau nag,
Melki go Zamoi nugau nag,
Zamoi go Zosep nugau nag,
25 Zosep go Matatias nugau nag,
Matatias go Emos nugau nag,
Emos go Naum nugau nag,
Naum go Esli nugau nag,
Esli go Nagai nugau nag,
26 Nagai go Mat nugau nag,
Mat go Matatias nugau nag,
Matatias go Semen nugau nag,
Semen go Zosek nugau nag,
Zosek go Zoda nugau nag,
27 Zoda go Zoanan nugau nag,
Zoanan go Resa nugau nag,
Resa go Serubabel nugau nag,
Serubabel go Sealtiel nugau nag,
Sealtiel go Neri nugau nag,
28 Neri go Melki nugau nag,
Melki go Adi nugau nag,
Adi go Kosam nugau nag,
Kosam go Elmadam nugau nag,
Elmadam go Er nugau nag,
29 Er go Zosua nugau nag,
Zosua go Eliesa nugau nag,
Eliesa go Zorim nugau nag,
Zorim go Matat nugau nag,
Matat go Liwai nugau nag,
30 Liwai go Simeon nugau nag,
Simeon go Zuda nugau nag,
Zuda go Zosep nugau nag,
Zosep go Zonam nugau nag,
Zonam go Eliakim nugau nag,
31 Eliakim go Melea nugau nag,
Melea go Mena nugau nag,
Mena go Matata nugau nag,
Matata go Natan nugau nag,
Natan go Devit nugau nag,
32 Devit go Zesi nugau nag,
Zesi go Obet nugau nag,
Obet go Boas nugau nag,
Boas go Salmon nugau nag,
Salmon go Nason nugau nag,
33 Nason go Aminarap nugau nag,
Aminarap go Atmin nugau nag,
Atmin go Hesron nugau nag,
Hesron go Peres nugau nag,
Peres go Zuda nugau nag,
34 Zuda go Zekob nugau nag,
Zekob go Aisak nugau nag,
Aisak go Abraham nugau nag,
Abraham go Tera nugau nag,
Tera go Nahor nugau nag,
35 Nahor go Seruk nugau nag,
Seruk go Reu nugau nag,
Reu go Pelek nugau nag,
Pelek go Eber nugau nag,
Eber go Sela nugau nag,
36 Sela go Kainan nugau nag,
Kainan go Arpaksat nugau nag,
Arpaksat go Sem nugau nag,
Sem go Noa nugau nag,
Noa go Lamek nugau nag,
37 Lamek go Metusela nugau nag,
Metusela go Enok nugau nag,
Enok go Zaret nugau nag,
Zaret go Makalalel nugau nag,
Makalalel go Kenan nugau nag,
38 Kenan go Enos nugau nag,
Enos go Set nugau nag,
Set go Adam nugau nag,
Adam go Uwait nugau nag.