7
144,000 Israel duailel Uwait nugau e bol omen.
1 Ece go unum peimai, iz koli Uwait nugau tibur iwanarai ag em ebu em guru iwanarai tubaim tubaim tapai daimai, wol iwanarai gusig patai daremen uligaremin. Ag go guzenina, wol goagen em ebu ta, ibut ze ebu ta, a ebu ta, wol zuabun iborain tam.
2-3 Iz koli Uwait nugau tibur tub am zuaneun ebuan, Uwait awau muzmuz daneu nugau bol waneun e Uwait nugau sikut mui oiagab petak emen duailel ebalagab mabun oi zoun, pemin. Gonug Uwait nugau tibur iwanarai Uwait nug agen em mui, ibut ze mui, eg marabun, gusig mareun. Gonug guzenai gusig ze ulareun, “Ag pigai em mui, ibut ze mui, a mui i eg maran. Bo, ig Uwait nugau salau dudu agal aipag ebu sikut tub wai maremin, go petak ag ece unum go eg maran.”
4 Agen guzenai ze memen, domin, “Go Uwait nugau duailel sikut go wai maremenin goagal ianai 144,000. Duailel go Israel agal ug begurug ebuan.
5-8 Duailel go Uwait nug ug tutak tutak, tausen begurug, tausen begurug guzenai tapai marena, ag sikut go omenin.
Zuda nugau ug tausen begurug (12,000),
Ruben nugau ug tausen begurug,
Gat nugau ug tausen begurug,
Asa nugau ug tausen begurug,
Naptali nugau ug tausen begurug,
Manase nugau ug tausen begurug,
Simeon nugau ug tausen begurug,
Liwai nugau ug tausen begurug,
Isakar nugau ug tausen begurug,
Sebulun nugau ug tausen begurug,
Zosep nugau ug tausen begurug,
Benzamin nugau ug tausen begurug.
Israel duailel go ug begurug go ebuan Uwait nug tapai marena, go Uwait nugau sikut omenin.”
Duailel asiu pet go Uwait wanib ulagwag moromenin.
9 Go uligaimai, iz koli ameitaimai, duailel asiu pet uligaremin. Du tub nug duailel go nanalabun iborain tam. Duailel go unum enimag beu beu ebuan, ug beu beu ebuan, emgasag beu beu ebuan, ze beu beu ebuan. Ag tibur galau ausiau huia arugaimai, gom gau sul patai daimai, go alai Uwait nugau biz mui, Sipsip Nag mui goagal ameagab tapai daremen.
10 Agen guzenai gusig ze memen, “Igual Uwait biz ebu hoboi dareu, go Sipsip Nag dual goagen ig koli imaigemen.”
11 Uwait nugau tibur agen dudu banban mui, ece iwanarai awau darem mui, Uwait nugau biz talioroi kataraimai, tapai daremen, go unum Uwait nugau biz waugab taubibaimai, Uwait ulagwag moromen.
12 Go guzenai ze memen, “Petak, igual Uwait go naliupet pet, gonun, ig go en oigeb siksikaimai, go du banou abiu maimai, ig go dabeleu naliu wabun aimai ananem. Ig go ‘Ese-e’ auraimai, gonugau wanib ulagwag manem. Go wanib banou mui, gusig mui daimai, muzmuz damau. Petak.”
13 Gonun, dudu banban ulacan du tub nug iz guzenai kanabileun, “Duailel go tibur galau ausiau huia arugaimai, darem, go inen? Go eru eiman alemenin?”
14 Iz koli go guzenai auremin, “Du banou, nagtal na abiu. Na iz ailen.” Gonug iz koli guzenai aileun, “Duailel go agal iwai zaiagar agen uhu maraimai, mu banou marena, go gusig tapai danemen. Ag agal tibur galau huia go Sipsip Nag nugau eseu sil ulusemen, gonun, agal tibur galau ausiau pet usaleun.
15 Guzenaimai, go Uwait nugau biz ameg ebu waugab tapai daimai, amban umaum Uwait nugau zaueim go muzmuz gonugau salau muranemen. Uwait go gonugau biz ebu hoboi daimai, go nugtal duailel go suban isanaraimai, gumaramau.
16 Duailel go ag koli we i ugaramau, ag koli ze i useg ugaramau. Am wes nug agal enimag i agaramau. Ece zabeg ipal agen han agal enimag i agaramau. Tam pet tam.
17 Sipsip Nag go biz ula hoboimai, go agal gumarabun du damau. Gonug duailel go muzmuz awau dabun ze kom ebu imarai bitaba, ze zimam. Gonug guzenaba, Uwait nug goagal ameag ilau unum gulesai maramau.”