15
Jishɔ ŋkiɛŋ ndǎa grape
1 “A mmu mbɔ ŋkiɛŋ ndǎa grape, Tǎa a pɔ ŋgaŋ nyìeŋ.
2 Sheshe fɨ̀ga mbhɔ ma ŋa a lɔ njiʼi njuŋ nɛ a yaʼa mīʼaŋ. Ti sheshe mbhɔ ŋa a yuŋ ntíɛŋ nɛ, a fēe ŋa a pɨnɨ njuŋ shiʼi.
3 Ndɔ pəɨ kwo pɔ yi taoŋtaoŋ nthɛ chrà ŋa mi ni nchrā ni pəɨ nɛ.
4 P̂əɨ kɨna mbɨŋ mu, ŋ̀kɨna mbɨŋ pəɨ. Minthɛ paʼa fɨ̀ga ndǎa grape lɔ njuŋ ntíɛŋ ni noŋ yi ki lɔ ŋguʼɔ ŋkɨna pi ŋkuoŋ ndǎa grape ghɔ. Wuʼɔ nɔ haʼaŋ mbaʼa pəɨ ŋkaa pəɨ yuŋ ntíɛŋ kaŋ a nɛiŋ pəɨ kɨna mbɨŋ mu.
5 “A mmu mbɔ ndǎa grape, pəɨ pɔ pa fɨ̀ga mbhɔ ma. Shesheŋoŋ ŋa a kɨna mbɨŋ mu, ŋ̀kɨna mbɨŋ yu nɛ, a ju ŋa a shi njuŋ ntou ntíɛŋ. Nthɛ ŋa m̈i ŋkiɛŋ, paʼa pəɨ lɔ nchwīe sheshe nnu.
6 S̈hesheŋoŋ mieŋ ki kɨna mbɨŋ mu, pi mīʼaŋ vi nɔ fɨ̀ga mbhɔ, a yaoŋ, pi kɨrɨ pa mbhɔ mi pighɔ māʼaŋ moŋ móŋoŋ pugu kɨɨ.
7 P̈əɨ ŋkɨna mbɨŋ mu, chrà a kɨna mbɨŋ pəɨ, pəɨ pie sheshe yaoŋ ŋa pəɨ tāʼa nu nɛ, kaŋ pi shi nchwīe mfɛ ni pəɨ.
8 Ntɔgɔ pi ŋkuoŋ yei nnu Tǎa a ghà mfāʼo ndighaʼo yi, ŋa pəɨ yuŋ ntou ntíɛŋ, nnɛ nōoŋ ŋa pəɨ ghaŋ younjiŋ paŋ.
9 “Nɔ haʼaŋ Tǎa khwā a nɛ, a haʼaŋ ŋ̀khwā vəɨ nɛ. P̂əɨ kɨna moŋ khwǎ a.
10 P̈əɨ nūʼɔŋ pa kɨ̀na paŋ, kaŋ pəɨ shi ŋkɨna moŋ khwǎ a, wuʼɔ nɔ haʼaŋ mummu nūʼɔŋ kɨ̀na Tǎa a nnɛ ŋkɨna moŋ khwǎ yi nɛ.
11 Ŋ̀ki chrà nnu pei ni pəɨ nnɛ ŋa pwanjuʼɔ a pɔ mbɨŋ pəɨ, pwanjuʼɔ yəɨ lɨnaoŋ.
12 Yei kɨ̀na a, ŋa pəɨ ŋkhwā noŋ pəɨ nɔ haʼaŋ ŋkhwā vəɨ nɛ.
13 Yichəɨ mmɛ khwǎ lɔ mbɔ ntɔgɔ yei, ŋa ŋoŋ fɛ chɔmbhi yi nthɛ taannu pi.
14 Pəɨ pa taannu paŋ, nɔ haʼaŋ p̈əɨ nūʼɔŋ kɨ̀na a.
15 Ǹdɔ nuʼuŋ mɛ̄iŋ vəɨ pi ni puoŋ fàʼa paŋ, nthɛ ŋa muuŋ fàʼa shiʼa nji yaoŋ ŋa Taathɔ vi chwīe nu nɛ. Ndɔ m̀ɛ̄iŋ vəɨ pi ni taannu paŋ nthɛ ŋa ŋguoŋ nnu ŋa ǹjaʼo mbhɔ Tǎa nɛ, ǹchwīe pəɨ ji.
16 Pəɨ shi ki lɔ nchuʼɔ a, a ni nchuʼɔ mmu nchuʼɔ vəɨ, nūʼɔŋ vəɨ ŋa pəɨ ghə̄ɨ njuŋ ntíɛŋ, ntíɛŋ yəɨ kɨna, nnɛ ŋa sheshe yaoŋ ŋa pəɨ shi mbie Tǎa nɔ ghɔ ni ligi a nɛ, a nthɛ a fɛ ni pəɨ.
17 M̀fɛ kɨ̀na pei ni pəɨ, nnɛ ŋa pəɨ khwā noŋ pəɨ.
Kipɨna pa ŋgwa ŋkuoŋ mbhi
18 “Pa ŋ̈gwa ŋkuoŋ mbhi mbɨ̄na vəɨ, pəɨ ji ŋa pugu kwo fǔoŋ mbɨ̄na a ŋkaoŋ maa mbɨ̄na vəɨ.
19 Pəɨ kaŋ ni mbɔ pi yi ŋgwa ŋkuoŋ mbhi, ŋgwa ŋkuoŋ mbhi kaŋ ŋkhwā vəɨ nɔ yugu. Ndɔ nthɛ ŋa pəɨ lɔ njiʼi mbɔ yi ŋgwa ŋkuoŋ mbhi, ndɔ a chuʼɔ mmu nchuʼɔ vəɨ ŋa pəɨ taoŋ shɨna ŋgwa ŋkuoŋ mbhi nɛ, a chwīe yie ghɔ ŋgwa ŋkuoŋ mbhi pɨ̄na vəɨ.
20 Pəɨ kwiŋ chrà ŋa mi ni nchrā ni pəɨ nɛ, ‘Muuŋ fàʼa shiʼa nchaa Taathɔ vi.’ P̈ugu mfɛ ŋgəʼɨ vəɨ, kaŋ pugu shi mfɛ ŋgəʼɨ ni pəɨ ŋkaa pəɨ. Pugu kaŋ ni nūʼɔŋ chrà a, kaŋ pugu shi nūʼɔŋ yəɨ ŋkaa pəɨ.
21 Ndɔ pugu shi nchwīe ŋguoŋ nnu pei ghao mbɨŋ pəɨ nthɛ ligi a, nthɛ ŋa pugu lɔ njiʼi nji ŋoŋ ŋa a taoŋ a nɛ.
22 Ŋka ni mieŋ ki lɔ nthɔ nchrā ni pugu, pi shi kaŋ ndɔ ŋgwɛ̄iŋ vugu nɔ pa ghaŋ phɨ. Ndɔ ndwɛ pugu lɔ nuʼuŋ mfāʼo la nɔ māʼaŋ nu nthɛ phɨ yugu.
23 Shesheŋoŋ ŋa a pɨ̄na a nɛ, pɨ̄na Tǎa a ŋkaa yu.
24 Ŋka ni mieŋ ki chwīe pa nnu shɨna pugu ŋa yichəɨ ŋoŋ lɔ naa nchwīe nɛ, pi shi kaŋ ŋgwɛ̄iŋ vugu nɔ pa ghaŋ phɨ. Ndɔ ndwɛ pugu yəɨ ndɔ mbɨ̄na vigi Tǎa a.
25 Ndɔ chrà yei ŋa pi nāʼaŋ moŋ gɨ́ yugu ŋa, ‘Pugu pɨ̄na a ki laʼo yi’, shi ŋguʼɔ ndɔ̄gɔ lɨʼɨ.
26 “Ndɔ ndɨɨ ŋa ŋgaŋ ghɛ̀rɛ, mbɔ Jijwɛ nnu shini ŋa ǹshi ntaoŋ llɔ mbhɔ Tǎa shi nthɔ nɛ, kaŋ a shi ŋkwe ntie a.
27 Pəɨ ŋkaa pəɨ shi ŋkwe ntie a nthɛ ŋa pia pɔ kaʼa llɔ nɔ njɛ̄ yi.