22
A Vinara ni Pelekado a Maregoa
“A bakovi i panaho a bulmakau o a sipsip, i rabalakia o i habia ni kona, ge koli mule na tahona, a bulmakau ge lima, a sipsip ge va. 2-4 Ia ge uka a maki ni koli mule a maki i panaho, ra matapanaho iea ni gi habi ni gi kona, ge a mapana ra maki i panaho. Na tahuna a bulmakau o a sipsip ni gi matai i tababana ni mahuri, ge koli balaka rua a maki i panaho.
“Na tahuna a matapanaho ni matavisi i puka a ruma, i panaho a maki na rodo, ni gi rabalaki. A bakovi i rabalakia, i uka ngava. Pali a bakovi i panaho na haro ni rabalaki, a viri i rabalakia i tahoka a ngava.
“Na tahuna a bakovi i matataroa a bulmakau a sipsip vona i laho viliha, i dili tavula na hania na viri tara, a tahona a bulmakau a sipsip ge koli a maki i kani a bulmakau a sipsip vona.
“Na tahuna a bakovi i rata a kanono, muri a kanono i nono lakea na hania na bakovi tara, i nono a hania vona turana a maka vit i ru kadolu, a bakovi i vakatubu a kanono ge koli a maki i ratapile a kanono.
“A bakovi i habi a moni na turana ge matakari, ni panaho na ruma vona a moni. Na tahuna a matapanaho ni matavisi, a matapanaho ge koli balaka rua a moni i panaho. Pali a bakovi ni panaho i uka ma ni matavisi, ni gi bole a tahona ruma ge lakea na mari ni pelekado a maregoa,* ge nanea, i panaho a moni o i uka.
“Na tahuna a bakovi ala rua ru vakau vona tara bulmakau, a donki, a sipsip, a kala, a maki i velu, ra bakovi nga ru gu lakea na mari ni pelekado a maregoa, ni gi longo a maregoa ne rua. A bakovi i kau tavula a maki ge koli balaka rua a maki i kau na turana.
10 “Na tahuna a bakovi i habia na turana a bulmakau, a sipsip o a maki tara ge matakaria, muri i mate, o ni padiha, o ni lakavu i uka ma ni matai, 11 ra bakovi i habi a bulmakau, a bakovi i bole a bulmakau ru gu dili na roho nau, lakea a bakovi i bole a bulmakau ge kaba na ragu ge ta maea, ‘Muholi hateka, i uka ma a ratapilea a bulmakau vona.’ A tahona bulmakau ge longo maia a nikaba na turana, nahea ge kolia a bulmakau vona i velu. 12 Pali a bulmakau iea ni panaho vona, ge kona lakea na tahona. 13 Na tahuna a livoa hateka i rabalakia tara sipsip a bulmakau, a turana ge bole ranga balena i kani kalevea a livoa hateka ge vakasiri. Lakea i uka ma ge konea a maki i rabalakia a livoa hateka.
14 “A bakovi i bolea ne turana tara bulmakau ge rata taro a leho vona, muri a bulmakau i bole a gilanga i mate, a bakovi iea ge kona lakea na tahona. 15 Pali a maregoa ge bele na bulmakau na tahuna a tahona ia vonga, a bakovi i bolea nahea ge konea, a vuhuna a moni i habi pali na tahuna i habikaria.
A Vinara Ranga
16  *“A bakovi i lakavua a sirula, i uka ma ni habikari ge parangi vona, ra bakovi iea ge konea a ngatavine, muri ge bolea a ngatavine iea ge girihina. 17 E tamana ngatavine i marikoi vona a bakovi iea ge parangi e tuna, i kamumu kunana. Pali a bakovi iea ge konea a ngatavine, ge manga a mapana sirula ni tovo.
18  *“A ngatavine i tahoka a malulu ni gi rabalaki.
19  *“E rei a bakovi o a ngatavine i tari a ligo, a sipsip, o a bulmakau tara, ra bakovi o a ngatavine iea ni gi rabalaki.
20  *“E huriki ri gi habi a nihabi nau kunana, e BAKOVI DAGI. A viri i habi a nihabi na vure ranga ni gi rabalaki.
21  *“Naha ni rata hale mu gu vakamarego e huriki a mosi, a vuhuna hosi mu made manga a mosi na robo e Egipto. 22 Naha ni rata hale e huriki a havuri, a duku. 23 Na tahuna mu rata hale ria bara ri tangi valai nau, a longo a nitangi ne ria, 24 mu vakarike a hategu, bara rudu valai e huriki a pile ri gi rabalaki mua. Muri e huriki a ngatavine ne mua bara ria a havuri, e huriki e tune mua bara ria a duku.
25  *“Na tahuna mu habi a moni na matasia tara ne huriki a viri nau, ge koli kunana a moni i bole. Naha ge habi langa tabu ranga moni. 26  *Na tahuna a viri ge bole taroa tara maki vomu, ge habia vomu a varakia vona ge a kilakila na maki i bole, o habi mulea muga na haro ge rolo a varakia vona, 27 a vuhuna a bakovi iea i tahoka kunana a varakia i taku ge kavitagua vona na rodo. Bara o vakatokua, ge kavitagua na a ra? Na tahuna i tangi valai nau bara tuhoria, a longo maia a nitangi vona, a vuhuna iau a dodo e huriki lobo.
28  *“Naha ni harogia a Vure, naha ni harogi a matakari ne mua.
29 “Naha ni vakatoku ni habi nau a vit, a vain, a oliv ri moro muga.
E huriki a koma tabua bakovi, ngi ranga mu habi nau. 30 Mu habi nau tabu a tabua na bulmakau a sipsip. A tuna bulmakau a sipsip ni gi poda, ge laho turane kinana na parava ge polorua. Na polotoluna parava mu habia nau.
31  *“Iau a vulaki mua a Israel ge mua a viri nau. Naha ni kani a bobona sipsip a bulmakau i rabalaki a livoa hateka na robo. Mu voro lakea na ligo ge kani.
* 22:8 O na matana Vure. * 22:16 Vin 22:28-29 * 22:18 Vin 18:10-11 * 22:19 Levi 18:23; 20:15-16; Vin 27:21 * 22:20 Vin 17:2-7 * 22:21 Nim 23:9; Levi 19:33-34; Vin 24:17-18; 27:19 * 22:25 Levi 25:35-38; Vin 15:7-11; 23:19-20 * 22:26 Vin 24:10-13 * 22:28 Apo 23:5 * 22:31 Levi 17:15