13
A Nihabi a Vure i Ngaru
1 Mua o huriki a tara na Vure, mu vangaru.
2 Mu tagui, mu matakari e huriki a mosi ri bele ne mua. Hosi e huriki ranga ri matakari a mosi, pali i uka ma a bakovi ri matakari. A agelo ri pahaluhoi ta a bakovi.
3 Mu kori e huriki ri made na bavi, i manga mua ranga mu made turane ria na bavi. Mu kori e huriki ni vakamadihi, i manga mua ranga ni vakamadihi turane ria.
4 A parangia, mua lobo mu togoa. Naha ni vakahale a parangia, a vuhuna a Vure ge pelekado, ge ratapile e huriki ri mole.
5 Naha ni nunu muri mai a mahala. A maki mu tahoka pali, mu vivi vona kunana, a vuhuna a Vure i ta maea,
“I uka ma ga ha taro mua. I uka ma ga lohopile mua.”
6 I muholi hateka a ngava iea, si gi takia, ra i maea,
“I uka ma ga mangenge.
E huriki a bakovi, ri uka a nitora ni rata hale iau,
a vuhuna e Bakovi Dagi i tuhori iau.”
7 Mu luhoi e huriki a matakari ne mua, ri vakalongo mua vona a nitana Vure hosi. Ri laho navai? Ri mate navai? Mu ramai a narone ria ni luhoi torea a Vure.
8 E Isu Kristo i uka ma i pulo lae a narona. I palupulupu kunana na hini ravi, na hini mona, na parava vakaroro.
9 Naha ni nunu muri mai a maka nitovo tebi legelege. I kamumu a Vure ge vakatora a hatene mua na naro kamumu vona. A maka vinara na maki ni kani i uka ma i kori e huriki ri muri mai. Naha ni muri mai a maka vinara nga.
10 A dede na nihabi ne hita i tebi na dede i tabuli na kape na Vure. E huriki ri leho vonga i uka ma ri gi valai ni kani na dede ne hita.
11 E huriki a prister dagi ri rabalaki a bulmakau polovavo na mada, ri bole dili na Tabeke Nitaba a darana, ni puga vuroki a naro hale ne huriki. A podana ni gutu vuro polovavo na mada.
12 Na naro iea kunana, e Isu i bole a nimadihi polovavo na tanga, ge tua a darana, ni rata e huriki a viri vona ri gi malamala.
13 Ngane si gi pagitala, si gi lakea ne Isu polovavo na tanga, lakea e huriki ri gi biu hita i manga ri biua e Isu.
14 Si gi rata mavonga, a vuhuna si uka tanga muholi koea na malala. Si pasimata vona a tanga dagi muholi ta ge bele muri ma.
15 E Isu ge kori hita, nahea si gi malo ni kavurike vakaroroa a Vure. Si gi taki tala a rana ne huriki.
16 Naha ni longo kaburungi ni rata a naro kamumu ne huriki a turane mua, a vuhuna a Vure i ngarua ra naro iea. E huriki ranga ri bala a maki, mu habi ne ria ranga maki mu tahoka.
17 Mu longototo e huriki a matakari ne mua. Mu muri mai a ngava ri taki, a vuhuna ri matakari a hanune mua. Muri ma bara ri pesi na matana Vure, ge nana ria vona ri matakari navai mua. Mu rata kamumu ria, ri gi vivi kunana ni matakari mua. Bara mu rata hale ria, bara ri deke ne mua. I mavonga, mua ranga i uka ma mu gu made kamumu.
18 A ngaru mu gu vasileki na Vure ge tuhori iau. Na hategu, a lohoka vona i uka ma a ratea tara naro hale ga rare vona. A ngaru ni rata kamumu a maki lobo a rata.
19 A ngaru hateka mu gu vasileki mavonga, lakea a Vure ge rudu mule iau, ga lakene malaviriri ne mua.
20 A Bakovi Dagi ne hita e Isu, ia a matakari dagi ne hita, re hita huriki a sipsip vona. I habi a darana ge vakatora a ngava karaba ge tabuli vakaroro. Lakea a Vure i vakamahuri mulea na matenga. Ngane ra Vure na nivalemu,
21 ge habi ne mua a maka maki ge tuhori mua mu gu rata a maki lobo i ngaru mu gu rata. I rata pololilo ne hita tara maki i vivi vona na nitora ne Isu Kristo. Si gi kavurikea, si gi vakabagetua ngane, na parava vakaroro. I muholi.
A Nilobona Raukea
22 Mua o huriki a turagu, a raukea nau i uka ma i ola hateka. Mu hatenono vona a ngava tora a habi ne mua, a vara mua vona.
23 A ngaru ni vakalongo mua vona e Timoti. Ni vakapagitala pali ia na bavi. Ia ge bele malaviriri nau ieni, maria varago miri gi lakene, miri gi gosi mua.
24 Iau a talo rike a haro kamumu ne huriki a matakari ne mua, turana e huriki a tara na Vure iene. E huriki ri mariu valai o Itali, ria ranga ri talo rike a haro kamumu ne mua.
25 A Vure ge rata kamumu mua lobo.