14
A Malala na Nirolona Haro ne Iordan
1-3  *Iea a nuverei na maka tabekena malala na kabu takutaku ne Israel ri bole pololilo ne Kenan. Na tahuna e huriki a Israel ri tababana ni made na tabeke na nirikena haro na naru e Iordan, e Moses i habi a tabekena malala na kabu i rua turana a kalavana kabu tara ne Israel. Pali e Moses i uka ma i habia na kabu ne Levi tara tabekena malala.
Ngane e huriki a Israel ri bele pali na malala e Kenan na tabeke na nirolona haro na naru e Iordan. Lakea e prister Eleasar, e Iosua e tune Nun, turane huriki a matakari na kabu takutaku ne Israel, ri ramai a ngava ne BAKOVI DAGI i ratea ne Moses. Ri rehi na rihiva na satu, ri veru ne huriki a kabu i polova turana a kalavana kabu tara ne ria a malala. Na tahuna ri veru a malala, ri kalipida na kabu i rua e huriki a hamone Iosep, a kabu ne Manase, a kabu ne Epraim. Lakea i uka ma ri habia na kabu ne Levi tara tabekena malala. A kabu ne Levi i bole kunana ranga tanga. Ra tanga nga ri tahoka a tabekena malala ni vakani a bulmakau a sipsip vona. E huriki a Israel ri ramai a ngava e BAKOVI DAGI i taki e Moses vona, ri vaveru vona a malala e Kenan.
E Keleb i Nanea e Iosua Ge Habi a Malala Vona
*I ranga bakovi ne Iuda ri bele ne Iosua o Gilgal. Lakea e Keleb e tune Iepune na kabu ne Kenas i takia e Iosua i ta maea, “Na tahuna si made o Kades-Barnea, e BAKOVI DAGI i takia e Moses a vora vona na maki ge ratea ne tarua. O lohoka vona a maki i takia. *Na tahuna iea a tahoka a pida i ravulu va, lakea e Moses a vora ne BAKOVI DAGI i rudu iau a vano a kasisia ra robo iea. A lokovonga, muri a hamule, a vakalongo e Moses na maka maki a matai, i uka ma a tamia. Pali e huriki ri vano turagu ri rata tebi a ngava, lakea i rata e huriki ri mangenge. Pali iau a ramai kamumu a nitane BAKOVI DAGI, a Vure ne hita. *Lakea e Moses i ratea nau tara nita muholi, i ta maea, ‘O ramai kamumua na hatemu e BAKOVI DAGI a Vure nau, i mavonga ioe turane huriki e tumu bara mu bolea ra tabekena malala o laho vona.’ ”
10 “E huriki a Israel ri tababana ni made na tabeke i ngeki, e BAKOVI DAGI i taki e Moses vona ngava iea. A pida i ravulu va a polona i lima i lobo pali. E BAKOVI DAGI i tuhori iau a tababana ni mahuri, manga a ngava i ta muholi vona ne Moses. Ngane a tahoka a pida i ravulu polotolu a polona i lima. 11 Pali a tababana ni gao i manga hosi na tahuna e Moses i rudu iau a kasisia a robo iea. A tuhagu i tababana a kara ni vano ni vaubi. 12 Ngane o habia nau a malala iea na lolo, e BAKOVI DAGI i takia na tahuna a vakalongo a maki a matai. O longo iau a vakalongo ioe vona e huriki a bakovi hateka ne Anak ri made vona a hini nga, na maka tanga ni tura halui na nure i tora hateka. Pali ge BAKOVI DAGI i made turagu, bara lili tala e huriki a bakovi nga, i manga a ngava e BAKOVI DAGI i taki pali.”
13 E Iosua i longoa a ngava iea i nanea e BAKOVI DAGI ge rata kamumua e Keleb e tune Iepune, lakea e Iosua i habia vona a tanga e Hebron. 14 E Keleb i ramai kamumu a nitane BAKOVI DAGI a Vure ne Israel. I mavonga, e Hebron i tabuli liu a malala ne huriki a hamone Keleb, e tune Iepune, a kabune Kenas. 15 Hosi a rana e Hebron e Kiriat-Arba. E Arba a bakovi hateka ne huriki a Anak. Muri ne Keleb i bolea pali a malala, ri made na nivalemu e huriki, i uka tabu a vabinga.
* 14:1-3 Gi 32:33; 34:14-15; Vin 3:12-17 * 14:6 Gi 14:30 * 14:7 Gi 13:1-30 * 14:9 Gi 14:24; Vin 1:36