18
A Malala Ni Veru Lobo
1 E huriki a Israel ri vaubi ri bole lobo pali a maka tanga, muri ri vano ri vapopo na tanga e Silo, ri vakapesia vonga a Kape na Vaponga.
2 Pali a kabu i polorua ri tababana ni bole a tabekena malala ne ria.
3 Lakea e Iosua i taki e huriki a Israel i ta maea, “E BAKOVI DAGI a Vure ne huriki a gare ne mua i habia ne mua a malala iea, pali i navai mu dava tabaka hateka, mu gu bole a tabekena malala ne mua?
4 Mu vulaki a bakovi ge ala tolu na kabu takutaku, ga rudu lakea ria na maka tabekena malala lobo, ri gi nagi tala a malala ri ngaru ni bole. Muri ri gi hamule valai tabu nau.
5 Ri gi nagi a tabekena malala ge polorua. A kabu ne Iuda ge made na tabeke mule puru, a kabu ne Iosep ge made na tabeke mule sike.
6 Mu here a nitana maka tabekena malala nga, mu bole valai. Muri ga rehi na rihiva na satu na matane BAKOVI DAGI a Vure ne hita, ga matakilaka vona i vai a tabekena malala ge habi ne mua.
7 Pali a kabu ne Levi ge leho manga a prister ne BAKOVI DAGI, lakea i uka ma ge bole a tabekena malala. A kabu ne Gad ne Reuben turana a kalavana kabu ne Manase, to bole pali a malala ne tou na tabeke na nirikena haro ne Iordan, re Moses a vora ne BAKOVI DAGI i habi ne tou.”
8 E Iosua i taki e huriki a bakovi ri gi here puru a nitana malala, i ta maea, “Mu vano mu kasisi lobo a maka tabekena malala, mu here puru a nitana, mu bole valai nau. Ga rehi na rihiva na satu, ga lohoka vona i vai a tabekena malala e BAKOVI DAGI ge habi ne mua.”
9 E huriki a bakovi nga ri longoa pali a nitane Iosua, ri vano ri kasisi a maka tabeke lobo, ri here puru a maki ri matai na puhu tara. Ri nagi a tabekena malala i polorua, ri here puru a maka rana tanga ri tabuli pololilo ne ria. Muri ri hamule mai e Iosua na mada o Silo.
10 E Iosua i rehi na rihiva na satu na tanga e Silo, ge lohoka vona i vai a tabekena malala ge habi na kabu takutaku. Muri i verua a malala i habia ne ria.
A Malala Ni Habi na Kabu ne Bensamin
11 A Kabu ne Bensamin i bole a malala na kurukuruna kabu ne Iuda a kabu ne Iosep.
12 Na tabeke mule sike a tabekena malala ne ria, a nagi i tubu na naru e Iordan i sike mai a kupona na tabeke mule sike na tanga e Ieriko. A nagi i kaogo vonga i lakea mai a tabeke na nirolona haro i lokovonga liu na tabeke i ngeki ne Bet-Aven.
13 Muri a nagi i lakea mai a tabeke mule puru na kupona na tanga e Lus (re Betel), i puru mai a tanga e Atarot-Adar, i pesi na mapana lolo tabukoi na tanga e Bet-Horon.
14 A nagi i kaogo vonga i lakea mai a tabeke tara na nirolona haro na lolo na tabeke ne Bet-Horon. A nagi i puru lakea i vano i bele na tanga e Kiriat-Bal (re Kiriat-Iearim). Ra tanga iea ne vona e huriki a Iuda na tabeke na nirolona haro.
15 A nagi na tabeke mule puru i tubu tabukoi o Kiriat-Iearim, i lakea mai a nirolona haro i bele na lomu e Neptoa.
16 A nagi i ramai puru a vahana lolo na tabeke mule sike na maloku ne Repaim, na hini i tubu vona a maloku ne Hinom. I tubu tabu vonga i puru lakea, i padikudua a maloku ne Hinom, i lakea mai a rihuhu na tabeke mule puru na tanga ne huriki a Iebus. Muri i lokovonga mai a lomu ne En-Rogel.
17 A nagi i sike lakea na lomu ne huriki a En-Semes i lakea mai a tanga e Gelilot. A viri i pesi vonga bara i masia a bala i sike mai a lolo na tanga e Adumim. A nagi i puru mai a kedo dagi ne Bohan, ra kedo iea ni vunu ramai e tune Reuben bakovi.
18 A nagi i ramai a rihuhu i sike na lolo ne Bet-Araba, muri i lakea mai e Araba.
19 I malaparu vonga tabu i sike lakea na kupona ne huriki a Bet-Hogla, i vano i bele na Dari Mate na ngutuna a naru e Iordan. Ra nagi iea, a nagi na malala ne Bensamin na tabeke mule puru.
20 A nagi na tabeke na nirikena haro i ramai a naru e Iordan. Ra nagi nga, a nagi na tabekena malala na kabu e Bensamin.
21-24 A maka tanga dagi i ravulu a polona i rua, turana maka tanga kiroko ri pesi tabukoi ne ria, ne vona a kabu ne Bensamin. A rana maka tanga ra nga: e Ieriko, e Bet-Hogla, e Emek-Kesis, e Bet-Araba, e Semaraim, e Betel, e Avim, e Para, e Opra, e Kepar-Amoni, e Opni, e Geba.
25-28 I tahoka tabu ranga tanga dagi i ravulu a polona i va, turana a maka tanga kiroko ri pesi tabukoi ne ria ne vona a kabu ne Bensamin. A rana maka tanga ra nga: e Gibeon, e Rama, e Berot, e Mispa, e Kepira, e Mosa, e Rekem, e Irpel, e Tarala, e Sela, e Haelep, a tanga ne huriki a Iebus re Ierusalem, e Gibea, e Kiriat-Iearim.