9
E Huriki a Gibion Ri Tami e Huriki a Israel
1 E huriki a hariki ri made na nirolona haro na naru e Iordan, e huriki a hariki na lolo, a tanga na kupona, a tanga na bila tabukoi na Dari na Kurukuruna Malala i harena na malala ne huriki a Lebanon, ria lobo ri longo a maka maki i rata e huriki a Israel. Re huriki a hariki nga, a hariki ne huriki a Hiti, a Amor, a Kenan, a Peres, a Hivi, a Iebus.
2 Ri longoa a ngava iea, ri vadili palupu ri vaubi ne Iosua turane huriki a Israel.
3 A kabu ne Hivi i made na tanga e Gibeon, pali na tahuna ri longo a velengana a maka maki e Iosua i rata na tanga e Ieriko e Ai,
4 ri varodo a ngava ri gi tamia e Iosua ge luhoi ria ge ria a vinuru. Lakea ri bole a maka marapena kulopi, a matutuna a buroi na vain, ri tahoni a maka maki ni kani, ri ru langa na maka donki ri vano.
5 Ri rea na matutuna varakia, ri rodo a matutuna vahapolo, ri bole a maka madeana bret i pu, ri vano turana.
6 E Iosua i made na mada o Gilgal, lakea e huriki a Hivi nga ri vano ri bele vona, ri taki e Iosua e huriki a Israel ri ta maea, “A tanga mi malaga vona i basi hateka. Mi ngaru ni rata a ngava dagi ne vona ni made kamumu turane mua.”
7 Pali e huriki a Israel ri taki e huriki a Hivi ri ta maea, “I navai mi gi rata a ngava dagi turane mua? Mi luhoi i uka ma mua a viri basi.”
8 Lakea e huriki a Hivi ri takia e Iosua ri ta maea, “Mi ngaru ni leho manga a vora ne mua.”
Lakea e Iosua i nana ria, “E rei a kabu ne mua? Mu valai vai?”
9 Lakea ri tuverei ri ta maea, “Mi malaga na tanga basi, a vuhuna mi longoa a nuverei ne BAKOVI DAGI a Vure ne mua. Mi longo a nuverei na maka maki i rata o Egipto.
10 Mi longo a maka maki i rata na hariki ala rua o Amor na tabeke ne Iordan. Re Sihon a hariki na tanga e Hesbon, e Og a hariki na robo e Basan, hosi i made na tanga e Astarot.
11 E huriki a gare ne mia turane huriki lobo na robo ne mia ri taki mia, ri ta maea, ‘Mu bole ranga maki ni kani ne mua, mu vano mu taguia a kabu iea, mu ta maea, “Mia e huriki a vora mua. Mu ratea ne mia tara ngava dagi si gi made kamumu palupu.’ ”
12 O matai a maka bret ne mia. Na tahuna mi malaga na tanga mi laho valai a maka bret ni gutu karaba. Pali ngane o matai. A bret nga ri madea ri pu pali.
13 A maka kulina meme nga a kuli karaba na tahuna mi guru dili a vain ne ria, pali o matai ngane ri matutu pali. A maka varakia a vahapolo ne mia ri matutu pali na dala malaku.”
14 Lakea e huriki a bakovi o Israel ri bole a maka maki ne ria, pali i uka ma ri nana e BAKOVI DAGI na niluhoi vona.
15 E Iosua i rata kamumu e huriki a Hivi, i rata a ngava dagi na nivalemu turane ria, i uka ma ge rabalaki ria. E huriki a matakari o Israel ranga ri ta muholi ri gi ramaia a ngava dagi iea.
16 Ri rata loboa a ngava dagi, pali muri na parava i tolu ri lohoka vona re huriki nga i uka ma ria a viri basi, a tanga ne ria i tabukoi kunana.
17 Ngane e huriki a Israel ri malaga ri vano, muri na parava i tolu ri bele na maka tanga ne huriki a bakovi nga. A rana a maka tanga ne ria e Gibeon, e Kepira, e Berot, e Kiriat-Iearim.
18 Pali e huriki a Israel i uka ma ri rabalaki ria, a vuhuna e huriki a matakari ne ria ri ta muholi na ngava dagi turane huriki nga na rane BAKOVI DAGI a Vure ne ria.
E huriki a Israel ri tahate e huriki a matakari ne ria vona a naro ri ratea.
19 Pali e huriki a matakari ri koli ri ta maea, “Mi ratea pali turane ria a ngava dagi na rane BAKOVI DAGI a Vure ne hita. Naha ni rabalaki ria.
20 Ri gi made, a vuhuna si ta muholi turane ria pali. Hita bara si rabalaki ria, e BAKOVI DAGI bara i habi a vuranga ne hita.
21 Ngane ri gi made, naha ni rabalaki. Pali a leho ri gi rata ri gi popo a kai, ri gi kiru a naru ne hita lobo.” E huriki a Israel ri longototo a nitane huriki a matakari ne ria, i uka ma ri rabalaki e huriki nga.
22 Muri e Iosua i gale valai e huriki a Hivi na tanga e Gibeon i taki ria, i ta maea, “I navai mu tami mia? Mu taki mua ta mu malaga na tanga basi mu valai. Pali mua mu made tabukoi kunana.
23 Mu tami mia, ngane e BAKOVI DAGI bara i rata hale mua. Na parava vakaroro bara mu leho ni popo a kai, ni kiru a naru na roho na Vure ne mia.”
24 E huriki a Hivi ri koli ri ta maea, “Mi longo a nitane BAKOVI DAGI a Vure ne mua i taki e Moses a vora vona, ge habia ne mua ra malala iea. Na tahuna mu bele, bara mu vakalobo liu e huriki ri made vona a malala iea. Lakea mi mangenge hateka ne mua, mi tami mua.
25 Pali ngane mi made na limamu. A ra maki i kamumu o ngaru go rata virihi mia vona, o rata kunana.”
26 E Iosua i tuhori e huriki a Hivi lakea e huriki a Israel i uka ma ri rabalaki ria.
27 Pali e Iosua i vakavora ria ni popo a kai, ni kiru a naru ne huriki a Israel, ri rata a leho na dede na roho ne BAKOVI DAGI. E huriki a Hivi ri rata a maka leho nga na maka tanga e BAKOVI DAGI i vulaki ga murina ni vasileki. Mona re huriki a Hivi ri tababana ni rata a maka leho nga.