7
Ngane Si Gi Rata a Leho na Naro Karaba
Mua e huriki a turagu, mu lohoka vona a vinara. A vinara i matakari a viri na tahuna i mahuri kunana. Pali na tahuna i mate pali, a vinara i uka tabu a nitora. I manga i maea, a ngatavine i parangi, a vinara i taki ge made kunana turane girihina. Pali na tahuna e girihina i mate, bara i matukapaga na vinara na parangia, i parangi tabu. A ngatavine ge parangi tabu, pali e girihina i uka ma i mate ma, bara ni gale a ngoi. Pali e girihina i mate pali, lakea i parangi tabu, i uka ma ni gi gale ge ia a ngoi, a vuhuna i matukapaga na vinara na parangia.
*I mavonga kunana o huriki a turagu, mua ranga mu mate turane Kristo, lakea a vinara i uka ma i matakari tabu mua. Ngane a viri tara i matakari mua, ra Viri i pesi rike mule na matenga. Ngane si gi rata kunana a leho na Vure. Hosi si ramai kunana a ningaru hale na kakaine hita. A vinara i vakarike a hatene hita ni rata a naro hale. A naro hale nga ri vakabele ne hita a matenga. *Pali ngane si matukapaga na vinara, i manga a vorakato i mate, i matukapaga na hini ia a vorakato vona. Ngane a Vinara ne Moses i uka ma i matakari tabu hita. A Hanuna Vure i habi a nimahuri karaba ne hita, i matakari hita.
A Vinara, a Naro Hale
*A ra si gi takia ngane? A Vinara na Vure i hale? I uka liu! Iau i uka ma ga lohoka na vinara, i uka ma ga lohoka vona a ra naro i kamumu, a ra naro i hale. A vinara tara i ta maea, “Naha ni ngutu na maki na viri tara.” Pali iau i uka ma ga lohoka vona a ngava iea, ra naro ni ngutu, i uka ma ga lohoka vona ge hale. A ningaru hale nau i rata iau a ngutu na maki i kupo legelege, a vuhuna a vinara i hatekakari iau nahea ga ngutu na maki na viri tara. Pali a ningaru ne hita ni rata a naro hale i uka ma i tora hateka na tahuna i uka vinara. Hosi i uka ma a lohoka na vinara, i uka ma a luhoi legelege. Pali na tahuna a lohoka na Vinara na Vure, a matakilaka vona a naro hale nau, ngane a lohoka vona, a marava basi na Vure. 10 A luhoi ta a vinara ge habi nau a nimahuri vakaroro na tahuna a longototo lobo ria. Pali i uka ma i mavonga. I rata iau a marava basi na Vure, a vuhuna a keri ni longototo lobo a vinara. 11  *A naro hale i tami iau, ta ga ramai lobo a Vinara na Vure, ga bole a nimahuri vakaroro. Pali iau a keri, lakea i rata iau a marava basi na Vure.
12  *I mavonga, a vinara i malamala. A Vinara na Vure i ravulu ri malamala, ri uka a hini hale ne ria, ri kamumu kunana. 13 I navai? A Vinara kamumu na Vure i rata iau a mate? I uka liu. A naro hale i ratea a vinara kamumu i vakabele a matenga na kakaigu. I bele mavonga, a vinara ge vakasiri kavakava ne hita vona a naro hale i hale hateka.
14 Si lohoka vona a Vinara i valai na Vure. Pali iau a bakovi na malala, a manga a vorakato na ningaru hale na kakaigu. 15  *Ra iau, i navai a rata mavonga? A naro a koi ni ratea, a ratea. Pali a naro a ngaru ni ratea, i uka ma a ratea. 16 Na tahuna a rata a maki hale a koi ni rata, a matakilaka vona a vinara a maki kamumu. 17 I mavonga i uka ma a ningaru nau a rata a naro hale. A rata a vuhuna ra ningaru hale pololilo na kakaigu i tora hateka. 18 A lohoka vona, i uka tara maki kamumu vona a ningaru hale na kakaigu. A ngaru ni rata a naro kamumu, pali iau a keri. 19 A naro kamumu ta ga ratea, i uka ma a ratea. Pali a naro hale a koi ni rata, a rata bala. 20 Na tahuna a rata a maki a koi ni ratana, i uka ma a rata a vuhuna a ngaru ni rata. A rata a vuhuna a ningaru hale na kakaigu i rata iau.
21 Ngane a matakilaka vona a naro iea: na tahuna a ngaru ni rata a naro kamumu, a naro hale i lapi iau pali. 22 A hategu i vivi vona a Vinara na Vure. 23  *Pali iau a masia a vilo tara i leho na kakaigu, i rata vabinga na vilo kamumu a ngaru. A vilo tara i leho na kakaigu, ra vilo na naro hale, i rata iau ge iau a vorakato. 24 A matasia polo iau! E rei ge vakamatukapaga iau na ningaru hale na kakaigu, ra ri vakabele a matenga? 25  *Iau a kavurikea a Vure, a vuhuna e Isu Kristo, a Bakovi Dagi ne hita, i vakamatukapaga hita na ningaru hale na kakaine hita. I mavonga, si muri maia a Vure na niluhoi ne hita. Pali a kakaine hita i muri mai a vilo na ningaru hale na kakaine hita.
* 7:4 Rom 6:2,11 * 7:6 Rom 6:4; 8:2 * 7:7 Nim 20:17; Vin 5:21 * 7:11 Vuh 3:13 * 7:12 1Tim 1:8 * 7:15 Gal 5:17 * 7:23 Gal 5:17; 1Pe 2:11 * 7:25 1Ko 15:57