19
E Huriki na Hunu Ri Vivi
Muri a longo meli na hunu a maki i nangi manga e huriki ala kupo hateka ri roro, ri ta maea,
“Kavurikea a Vure!
A Vure ne hita i gao hateka, i tahoka a bagetuanga dagi, i korimule hita!
*A naro i pelekado e huriki vona i muholi, i malamala.
I vakamadihi pali a ngoi dagi,
ra viri i vakahale e huriki lobo na malala na moleanga vona.
A Vure i koli a narona ni rabalaki e huriki a vora vona.”
Muri ri gale tala tabu, ri ta maea,
“Kavurikea a Vure!
A pokona e Babilon i nono bara i sike vakaroro, i uka nilobona.”
Muri e huriki a nupesi ala ravulu rua a polona i va (24), turana maki mahuri ala va, ri tabuli puru na ngalane ria, ri kavurikea a Vure, ra i made na gula hariki, ri ta maea,
“I muholi. Kavurikea a Vure!”
Muri a longoa a lohona viri tara na gula hariki i ta maea,
“Mua e huriki a vora na Vure,
mua e huriki a bakovi dagi, a bakovi tavula,
ra mu mangenge na Vure,
mu kavurikea a Vure ne hita!”
A Habu na Parangia na Tuna Sipsip
*Muri a longoa a maki i nangi manga a lohona e huriki ala kupo hateka ri roro. I nangi manga a bokona dari i rere, a hini i kururu i pelaka. Ri gale tala, ri ta maea,
“Kavurikea a Vure!
E Bakovi Dagi, a Vure ne hita i tuhaka hateka, i matakari a maki lobo!
*Si gi vivi, si gi pitei
si gi vakabagetua,
a vuhuna a parava i bele pali ne Tuna Sipsip ge parangi.
E Girihina i kisi puru mule ia pali, i davea.
Ni habi vona ge rodoa a varakia keakea, i para hateka,
i kamumu hateka.”
A varakia, ra mapana i dagi hateka, i manga a maka naro kamumu ne huriki a tara na Vure.
*Muri a agelo i taki iau, i ta maea, “O here maea: E huriki a Vure i gale ria ri gi valai na habu na parangia na Tuna Sipsip, ri gi vivi.” Muri i taki iau, “A ngava nga, a ngava muholi na Vure.”
10  *I ta mavonga, lakea a turume puru na vahana, ta ga kavurikea, pali i koi, i ta maea, “Naha ni rata mavonga! Iau tara a vora vona kunana manga ioe, manga e huriki e turamu, ra ri luhoi tora a ngava muholi ne Isu. O kavurike kunanea a Vure.”
A nitora ne huriki ri taki tala a nita propet, a ngava muholi ne Isu.
A Bakovi i Rike na Hos Keakea
11  *Muri a masia a hunu, i mata ka. A masia hos keakea! A viri i rike vona ni gale a ‘Viri Muholi’, a ‘Viri i Rata Lobo a Leho ni Habi Vona.’ I pelekado e huriki na naro i malamala, i vakatubu a vabinga na naro i malamala. 12  *A matana i manga a huvina kanono. I kube na gina a tama hariki i kupo. Ni here na kulina a rana. A rana iea, i uka tara viri ge lohoka vona. Ia kikeri i lohoka vona. 13  *I rodoa a varakia olaola, ni lutu na dara. A rana e Nitana Vure. 14 E huriki a nugumaheto na hunu ri rike na hos keakea, ri ramaia. Ria lobo ri rodo a varakia keakea karaba. 15  *A bainat i vere hateka i pagitala na ngavana. Ge ratapile e huriki i uka ma ria a Iuda, “ge matakari hateka ria, i manga a viri i matakari e huriki na lebo ni rata na aen.” Ge pahabebe e huriki na murina ni pahabebe na rongova na Vure i Tuhaka Hateka. 16  *Ni here na varakia, na lebona a rana tara, ra i maea,
‘A Hariki ne huriki a hariki,
a Bakovi Dagi ne huriki a bakovi dagi.’
17  *Muri a masia a agelo tara, i pesi langa na haro. I gale tala dagi, i taki a maka kadirovo ri bebe na hunu, i ta maea, “Mu valai, mu vapopo, mu davea a habu dagi na Vure. 18 Mu valai, mu kani a bobone huriki a hariki, e huriki a ubu, e huriki a bakovi hateka, a maka hos turana e huriki ri rike ne ria, a bobone huriki a vora, e huriki i uka ma ria a vora, e huriki a bakovi tavula, e huriki a bakovi dagi, e huriki a bakovi lobo.” 19 Muri a matai e Livoa turana e huriki a hariki na malala, turana maka tara ne ria, ri vapopo ta ri gi vaubi turana viri i made na hos keakea, a tara vona. 20  *Pali e Livoa ni lakavu turana nitamina propet vona, ra i rata muga a maka nivakasiri dagi na matane Livoa, i tami e huriki ri bole a kilakila ne Livoa, ri vasileki na hanuna. Rua varago ni voro puru mahuri na lovo na kanono, a viku. 21 Pali e huriki ranga, a bainat i pagitala na viri i rike na hos keakea i tolo mate ria, lakea a maka kadirovo ri valai, ri kani a bobone ria, ri maru.
* 19:2 Vin 32:43; Kap 6:10 * 19:6 Kap 14:2 * 19:7 Ais 61:10; Kap 21:2 * 19:9 Mat 22:2 * 19:10 Apo 10:25-26; Kap 22:8-9 * 19:11 Sng 96:13; Ais 11:4; Kap 1:5; 6:2 * 19:12 Dan 10:6; Kap 1:14; 2:17 * 19:13 Ais 63:1-3; Ion 1:1,14 * 19:15 Sng 2:9; Kap 1:16; 14:20 * 19:16 Kap 17:14 * 19:17 Ese 39:17-20 * 19:20 Kap 13:12-17; 20:10