6
A Buluka i Polorua
1 Ngane a masia a Tuna Sipsip i laga talea tara buluka ni pipikari a raukea vona. Lakea tara ne huriki a maki mahuri ala va i ta dagi manga a hini i kururu, i ta maea, “O valai!”
2 A mata lakea, a matai a hos keakea! A bakovi i rike vona i nugu a kiniperi. Ni habi vona a tama hariki. Ia a bakovi hateka. I pagitala ge vaubi ne huriki, ge mulangi.
3 Na tahuna a Tuna Sipsip i lagea a ruana buluka ni pipikari a raukea vona, lakea a longo a ruana maki mahuri i ta maea, “O valai!”
4 Lakea i pagitala tabu tara hos, a hos vururu. A bakovi i rike vona, ni habi vona tara bainat dagi, ni habi a nitora ge vakalobo a nivalemu na malala, e huriki a bakovi ri gi varabalaki.
5 Na tahuna a Tuna Sipsip i lagea a toluna buluka, a longoa a toluna maki mahuri i ta maea, “O valai!” Lakea a mata lakea, a hos katokato i pagitala valai! A bakovi i rike vona i nugu a skel.
6 Lakea a longo a lohona viri i pesi na kurukurune huriki a maki mahuri i va, i ta maea, “A mapana maki ni kani i rike hateka! A lita na vit ni gi kona na mapana bakovi i leho na parava i taku. A lita i tolu na barli ranga, ni gi kona na mapana bakovi i leho na parava i taku. Pali naha ni ratapile a vina oliv, naha ni ratapile a vain!”
7 Na tahuna a Tuna Sipsip i lagea a vuana buluka, lakea a longoa a lohona vuana maki mahuri, i ta maea, “O valai!”
8 A mata lakea, a masia a hos havura! A bakovi i rike vona, a rana e Matenga. A viri ni gale A Murine Huriki Ri Mate Pali i muri vona. Ni habi ne rua a nitora ni rabalaki e huriki ala kupo (¼) Ru gu rabalaki ria na bainat, na pago, na gilanga dagi, ru gu rudu a maka maki ri tegi na robo ri gi kara mate ria.
9 Na tahuna a Tuna Sipsip i lagea a limana buluka, a matai a hanune huriki ri made na taruna dede na nihabi. Re huriki nga ni rabalaki a vuhuna ri taki tala ne huriki a nitana Vure.
10 Ra hanune huriki nga ri gale dagi, ri ta maea, “O Bakovi Dagi, ioe o tahoka a nitora lobo. Ioe o kiripiripi. Ioe a vuhuna ngava muholi. Garika go pelekado e huriki na malala, go koli a naro hale ne ria, ri rabalaki mia?”
11 Muri ni habi ne ria a varakia ola keakea, ni taki ria ri gi dava popote taro, ge harena na tahuna e huriki e turane ria, ra ri leho palupu, ge rabalaki ria taro e huriki, i manga a hini ria ranga ni rabalaki muga. A Vure i lohoka i riva e huriki ri gi mate maea.
12 Na tahuna a Tuna Sipsip i lagea a polotarana buluka, a vuruke dagi i bele na malala. A haro i kato manga a gabu. A keva i mapulo i vururu manga a dara.
13 A maka hada na hunu ri mapasi puru na malala, i manga a kanena kai a pik i pado, ri mapasi na vilu dagi.
14 A hunu ni lopi manga a raukea, i marakavelu. A maka lolo lobo, a bodu lobo ri ha taro a murine ria, ri mariu lakea na hini ranga.
15 Lakea e huriki a hariki na malala, e huriki a bakovi dagi, e huriki a ubu na tara, e huriki a bakovi na mahala, e huriki ri tahoka a nitora, e huriki lobo, re huriki a vorakato, e huriki i uka ma ria a vorakato, ria lobo ri ha, ri kapiloho pololilo na maka babe, polotano na maka kedo dagi na lolo.
16 Ri gale tala, ri taki a maka lolo, a maka kedo, ri ta maea, “Mu taho mia, mu ruhulolo mia na matana Viri i made na gula hariki, mu ruhulolo mia na rongova na Tuna Sipsip,
17 a vuhuna a parava dagi na rongova ne rua i bele ngane. Pali e rei ge mahuri?”