སྐུ་ཚབ་པ་རྣམས་ཀྱི་མཛད་འཕྲིན་ཞེས་པའི་གཞུང་འདིའི་ནང་དུ་ཡེ་ཤུའི་ཆོས་ལུགས་དར་སྤེལ་དུ་བཏང་བའི་ལོ་རྒྱུས་གསུངས་ཡོད་པ་དང་། འདིའི་ནང་དུ་སྐྱབས་མགོན་ཡེ་ཤུ་སྐུ་གྲོངས་པ་ནས་སླར་གསོན་རྗེས་ཀྱི་ལོ་ངོ་སུམ་ཅུའི་རིང་གི་ལོ་རྒྱུས་གསུངས་ཡོད། མཛད་འཕྲིན་ནི་འཕྲིན་བཟང་རྣམས་དང་འཕྲིན་ཡིག་དག་གི་སྦྲེལ་ཐག་ལྟ་བུ་ཡིན་ལ། མཛད་འཕྲིན་གྱི་གཞུང་འདི་ལ་དམ་པའི་ཐུགས་ཉིད་ཀྱི་མཛད་འཕྲིན་ཞེས་བརྗོད་ཀྱང་ཆོག་སྟེ། ཅི་ལ་ཞེ་ན། མཛད་འཕྲིན་ལས་དམ་པའི་ཐུགས་ཉིད་ཕེབས་པ་དང་དམ་པའི་ཐུགས་ཉིད་ཀྱི་མཛད་འཕྲིན་སྐོར་ཁྲིད་སྟོན་བྱས་ཡོད་པ་ཡིན།

མཛད་འཕྲིན་དུ་ཡི་གེར་འགོད་མཁན་གྱིས་རང་ཉིད་སུ་ཡིན་ཁ་གསལ་མེད་ནའང་། དམ་པའི་གསུང་རབ་ཀྱི་ཕྱི་མོའི་མ་ཡིག་ཏུ་ཡོད་པའི་བདེན་དཔང་དང་མཛད་འཕྲིན་གྱི་ནང་དུ་ཡོད་པའི་བདེན་དཔང་གཉིས་ལ་བལྟས་ན། གཞུང་འདི་ཉིད་ཡི་གེར་འགོད་མཁན་ལོ་ཀུ་ཡིན་པ་གསལ་ཐག་ཆོད། མཛད་འཕྲིན་གྱི་གཞུང་འདི་བྱུང་བའི་ལོ་ཚིགས་ནི་ཧ་ལམ་སྤྱི་ལོ་63ལོ་ཡིན་པར་འདོད།

གཞུང་འདིའི་ལེའུ་དང་པོའི་ཚིག་རྐང་བརྒྱད་པ་ནི་ལོ་ཀུས་བརྗོད་བྱའི་སྙིང་པོ་མདོར་བསྡུས་སུ་བྱས་པ་ལེགས་ཤོས་ཡིན་ལ། ཁོང་གིས་བསམ་ཚུལ་མི་གཅིག་པ་མང་པོ་ནན་གྱིས་གསུངས་པ་དང་དེ་རྣམས་ཕྱོགས་གཅིག་ཏུ་སྤུངས་ནས་ཆོས་ཚོགས་ཀྱི་ཐོག་མའི་བྱུང་ཚུལ་དང་དར་སྤེལ་གྱི་སྐོར་བརྗོད་པ་ཡིན། གཞུང་འདི་ནི་དོན་དག་བཞི་ཡིས་གྲུབ་པ་སྟེ།

༼1༽ མི་སྣ་གལ་ཆེན་པེ་ཏྲོ་དང་ཕོལ་ལོལ་གཉིས་ཀྱི་སྐོར།

༼2༽ བརྗོད་གཞི་གལ་ཆེན་དང་དོན་དག་འགངས་ཆེན་རྣམས་ཀྱི་སྐོར་ཏེ། དམ་པའི་ཐུགས་ཉིད་ཀྱི་ལས་འགན་དང་། གཙོ་བོ་ཡེ་ཤུའི་སྐོར་ཐོས་མྱོང་མེད་པའི་ཡུལ་རྣམས་ལ་ཆོས་སྤེལ་བ། སེམས་བསྒྱུར་ནས་དད་པ་བྱས་པ། ཆོས་ཚོགས་འཕེལ་རྒྱས་སུ་ཕྱིན་པ། ཡེ་ཤུའི་ཆོས་ལུགས་ཀྱི་དད་ལྡན་མང་ཚོགས་བཅས་དང་།

༼3༽ དད་ལྡན་རྣམས་ལ་གནད་དོན་བྱུང་བ་སྟེ། ཡ་ཧུ་དཱ་པའི་དད་ལྡན་རྣམས་དང་ཕྱི་ཕྱོགས་པའི་དད་ལྡན་བར་གྱི་འགལ་བ། ཡ་ཧུ་དཱ་པ་ཁ་ཤས་ཀྱིས་ཆོས་ཚོགས་ལ་མནར་གཅོད་བཏང་བ། དད་ལྡན་རྣམས་ཡ་ཧུ་དཱ་པ་དང་རོ་མཱ་པའི་མདུན་དུ་བཀག་སྐྱིལ་བཙོན་འཇུག་བྱས་པ། དད་ལྡན་རྣམས་དང་ཕྱི་ཕྱོགས་པའི་བར་ལ་འགལ་ཟླ་བྱུང་བ། ཆོས་སྒྲུབ་པའི་སྐབས་སུ་དད་ལྡན་རྣམས་དཀའ་ངལ་དང་ཕྲད་པ།

༼4༽ ཡེ་ཤུའི་ཆོས་ལུགས་ཡེ་རུ་སཱ་ལེམ་ནས་རོ་མཱའི་བར་དུ་རྒྱ་བསྐྱེད་ཅིང་དར་སྤེལ་བཏང་བ་བཅས་སོ། །

1. པེ་ཏྲོ་དང་པཱ་ལེ་སི་ཐན་ཡུལ་དུ་ཐོག་མར་བྱུང་བའི་ཆོས་ཚོགས། ༼1:1-12:25༽

ཀ ཡ་ཧུ་དཱ་དང་ག་ལིལ། སཱ་མར་ཡ་བཅས་ཡུལ་ཀུན་ཏུ་ཆོས་ཚོགས་དར་སྤེལ་བཏང་བ། ༼1:1-9:31; 9:31ལ་གཟིགས་རོགས།༽

ཁ། ཕོའོ་ནེ་ཀེ་ཡུལ་དང་ཀིབ་རིས་གླིང་ཕྲན། ཨན་ཏི་ཡོག་ཡཱ་གྲོང་ཁྱེར་བཅས་སུ་ཆོས་ཚོགས་དར་སྤེལ་བཏང་བ། ༼9:32-12:25; 11:19ལ་གཟིགས་རོགས།༽

2. ཕོལ་ལོལ་དང་ཨན་ཏི་ཡོག་ཡཱ་ནས་རོ་མཱ་གྲོང་ཁྱེར་བར་དུ་དར་སྤེལ་བཏང་བའི་ཆོས་ཚོགས། ༼13:1-28:31༽

ཀ ཕུར་གེ་ཡཱ་དང་ག་ལད་ཡཱ་ཡུལ་བརྒྱུད་ནས་ཆོས་ཚོགས་དར་སྤེལ་བཏང་བ། ༼13:-1-15:35; 16:6ལ་གཟིགས་རོགས།༽

ཁ། མ་ཀེ་དོན་ཡཱ་ཡུལ་དུ་ཆོས་ཚོགས་དར་སྤེལ་བཏང་བ། ༼15:36-21:16; 16:9ལ་གཟིགས་རོགས།༽

ག རོ་མཱ་གྲོང་ཁྱེར་དུ་ཆོས་ཚོགས་དར་སྤེལ་བཏང་བ། ༼21:17-28:31; 28:14ལ་གཟིགས་རོགས།༽