ཨེ་ཕེ་སི་ནི་ཨེ་ཞི་ཡཱ་ནུབ་ཁུལ་གྱི་གྲོང་ཁྱེར་ཆེས་གལ་ཆེན་ཞིག་ཡིན་ལ། ༼དེང་གི་ཐུར་ཁེ་རྒྱལ་ཁབ།༽ གྲོང་ཁྱེར་དེ་ནི་ཚོང་པ་མང་པོ་འཁོར་བའི་བཞི་མདོ་ཞིག་ཡིན་པས་ཚོང་ལས་ཁྱབ་སའི་ལྟེ་གནས་ཤིག་ཏུ་གྱུར་ཡོད་པ་རེད། གྲོང་ཁྱེར་དེ་རུ་ཕྱི་རོལ་པའི་རོ་མཱའི་ལྷ་མོ་ཨར་ཏེ་མེའི་ལྷ་ཁང་སྐད་གྲགས་ཅན་ཞིག་ཡོད་ཅིང་། ཕོལ་ལོལ་གྱིས་ཨེ་ཕེ་སི་གྲོང་ཁྱེར་དུ་ཆོས་སྤེལ་ནས་ལོ་གསུམ་གྱི་རིང་ལ་བཞུགས་པ་ཡིན། གཅིག་བྱས་ན་འཕྲིན་ཡིག་འདི་ཨེ་ཕེ་སི་རུ་ཡོད་པའི་ཆོས་ཚོགས་ཁོ་ནར་སྤྲིངས་པ་ཞིག་མ་ཡིན་པར། ཨེ་ཞི་ཡཱའི་ཡུལ་དུ་ཡོད་པའི་ཆོས་ཚོགས་རྣམས་ལའང་སྤྲིངས་པ་དང་། ཕོལ་ལོལ་ཡུལ་དེར་ཐེངས་གསུམ་ལ་ཆོས་སྤེལ་དུ་སོང་བ་རེད།

དམ་པའི་གསུང་རབ་ཀྱི་མཁས་པ་རྣམས་ཀྱི་བཞེད་ཚུལ་ལྟར་ན། ཕོལ་ལོལ་གྱིས་འཕྲིན་ཡིག་འདི་ནི་སྤྱི་ལོ་60ལོའི་ཡས་མས་ཏེ། ཁོང་ཉིད་རོ་མཱ་གྲོང་ཁྱེར་དུ་བཙོན་ལ་སྦྱར་ནས་ལོ་གཉིས་རིང་བཞུགས་པའི་སྐབས་སུ་ཡི་གེར་བཀོད་པ་ཡིན་པར་དགོངས།

འཕྲིན་ཡིག་འདིའི་ནང་དུ་ཕོལ་ལོལ་གྱིས་འཕྲིན་ཡིག་གཞན་དག་ལྟར་སྐྱོན་དང་ལོག་ཆོས་ཀྱི་ལྟ་བ་གང་ཡང་བརྗོད་མེད། ཁོང་གིས་ཀློག་པ་པོ་རྣམས་ལ་དཀོན་མཆོག་གི་ཐོག་མཐའ་མེད་པའི་དགོངས་པ་དང་ཐུགས་རྗེ། དཀོན་མཆོག་གིས་ཆོས་ཚོགས་ཀྱི་ཆེད་དུ་བཅངས་པའི་བླ་ན་མེད་པའི་ཐུགས་འདུན་ལ་དུངས་ཤིང་མངོན་པར་བསྟོད་འོས་པའི་སྐོར་ཡི་གེར་བཀོད་པ་ཡིན། ཕོལ་ལོལ་གྱི་བརྗོད་བྱ་གལ་ཆེན་ཞིག་ནི་ཡེ་ཤུའི་ཆོས་ལུགས་པ་ཐམས་ཅད་ཀྱིས་འགྲིག་མཐུན་ངང་ནས་སྐྱབས་མགོན་ཡེ་ཤུའི་ནང་དུ་ཁྱིམ་ཚང་གཅིག་གི་མི་ནང་བཞིན་ཕན་ཚུན་བརྩེ་བར་བྱེད་དགོས་པ་དེ་ཡིན། ཁོང་གིས་ཆོས་ཚོགས་ཀྱི་སྐོར་བྲིས་ཡོད་པ་ལས་ཆོས་ཁང་གི་སྐོར་བྲིས་མེད་དེ། ཡེ་ཤུའི་ཆོས་ལུགས་པ་ཐམས་ཅད་ལ་མི་རབས་ནས་མི་རབས་བར་བཞེངས་པའི་ཆོས་ཚོགས་ཀྱི་སྐོར་ཡི་གེར་བཀོད་ཡོད།

1. ཁམས་འདྲི་གནང་བའི་སྐོར། ༼1:1-2༽

2. ཐུགས་ཉིད་ཀྱི་བྱིན་རླབས་སྐོར། ༼1:3-14༽

3. ཆོས་ཚོགས་ཀྱི་ཆེད་དུ་གསོལ་བ་འདེབས་དགོས་པའི་སྐོར། ༼1:15-23༽

4. དད་ལྡན་རྣམས་ཀྱི་སྡོད་གནས་སྐོར། ༼2:1-3:21༽

5. དད་ལྡན་རྣམས་ཀྱི་སྤྱོད་ལམ་སྐོར། ༼4:1-6:20༽

6. མཇུག་སྡོམ། ༼6:21-24༽