ལེའུ་སོ་དྲུག་པ།
གུར་མཆོག་བཟོ་མཁན་ཕྱི་མའི་སྐོར།
1 ཡང་མོ་ཤེ་ཡིས་འདི་ལྟར། གནས་མཆོག་བཟོ་བའི་ལས་ཐམས་ཅད་ཇི་ལྟར་བསྒྲུབ་ཤེས་པའི་ཕྱིར། པི་ཟིད་ཨེལ་དང་ཨོ་ཧོ་ལི་ཨབ་དང་མི་ལག་རྩལ་ཅན་ཀུན་ལའང་དཀོན་མཆོག་ཡ་ཝཱེས་ཤེས་རབ་དང་བློ་རིག་གནང་བ་དེ་དག་གིས། དཀོན་མཆོག་ཡ་ཝཱེས་བཀའ་བསྩལ་པ་མཐའ་དག་བཞིན་དུ་བྱེད་དགོས་ཞེས་སྨྲས་སོ། །
2 དེ་ནས་མོ་ཤེ་ཡིས་པི་ཟིད་ཨེལ་དང་ཨོ་ཧོ་ལི་ཨབ་དང་། སེམས་སུ་ཤེས་རབ་ལྡན་པ་སྟེ་དཀོན་མཆོག་ཡ་ཝཱེས་ཤེས་རབ་སེམས་སུ་གནང་བའི་མི་དང་། སེམས་འགུལ་ཐེབས་ནས་ལས་བསྒྲུབ་པར་འོང་འདོད་པ་ཐམས་ཅད་ཚུར་བོས་ནས།
3 གནས་མཆོག་བཟོ་བར་བྱེད་པའི་ལས་རྣམས་ཀྱི་དོན་དུ་ཡེས་ར་ཨེལ་པ་རྣམས་ཀྱིས་ཕུལ་བའི་འབུལ་བ་ཐམས་ཅད་ཁོ་ཚོས་མོ་ཤེ་ནས་བླངས་ཤིང་། ཡེས་ར་ཨེལ་པ་རྣམས་ཀྱིས་ཞོགས་པ་རེར་ད་དུང་ཡིད་མོས་ཀྱི་འབུལ་བ་ཁྱེར་འོངས་པས།
4 གནས་མཆོག་གི་ལས་ཐམས་ཅད་བྱེད་པའི་མི་ལག་རྩལ་ཅན་རེ་རེས་རང་རང་གི་ལས་ཀ་བྱེད་མཚམས་བཞག་སྟེ་འོངས་ནས།
5 མོ་ཤེ་ལ་ན་རེ། དཀོན་མཆོག་ཡ་ཝཱེས་བསྒྲུབ་དགོས་གསུངས་པའི་ལས་ཀྱི་ཕྱིར་མི་རྣམས་ཀྱིས་ཁྱེར་འོངས་པའི་དངོས་པོ་ལྷག་མ་མང་པོ་ཡོད་ཅེས་སྨྲས།
6 དེའི་ཕྱིར་མོ་ཤེ་ཡིས་བཀའ་བསྒོས་ནས་སྒར་ཡོངས་སུ་འདི་ལྟར། ད་ལྟ་སྐྱེས་པ་དང་བུད་མེད་སུ་ཡིན་ཡང་གནས་མཆོག་གི་ཕྱིར་འབུལ་བ་གང་ཡང་འབུལ་བར་མི་བྱའོ་ཞེས་བསྒྲགས་པས། དེ་ལྟར་འབངས་མི་ལ་འབུལ་དུ་མ་བཅུག
7 ལས་ཐམས་ཅད་བསྒྲུབ་དགོས་པའི་རྫས་རྣམས་ཀྱིས་ལོངས་པ་དང་ད་དུང་ལྷག་མ་ཡང་ཡོད་པ་ཡིན་ནོ། །
གུར་མཆོག་བཟོས་པའི་སྐོར།
8 དེ་ནས་ལས་མཁན་གྱི་ཁྲོད་དུ་མི་ལག་རྩལ་ཅན་ཐམས་ཅད་ཀྱིས་ཡོལ་བ་བཅུ་ཡིས་གུར་མཆོག་བཟོས་ཤིང་། དེའི་རྒྱུ་ནི་སོ་རས་སྲབ་བུ་བསྒྲིམས་པ་ཅན་དང་། བལ་སྐུད་མཐིང་ག་དང་རྒྱ་སྨུག་དང་མཚལ་དམར་གྱི་མདོག་ཅན་བཅས་ལ་འཐག་མཁན་ལག་རྩལ་ཅན་གྱི་ལས་བཞིན་དུ་ཀེ་རུབ་ཀྱི་གཟུགས་བརྙན་དང་ལྡན་པ་དེ་དག་བཟོས་སོ། །
9 ཡོལ་བ་རེ་རེའི་རིང་ཚད་ནི་ཁྲུ་ཉི་ཤུ་ཉེར་བརྒྱད་དང་། ཞེང་ནི་ཁྲུ་བཞི་ཡོད་པར་བྱས། ཡོལ་བ་ཐམས་ཅད་ཀྱི་ཚད་ནི་གཅིག་མཚུངས་ཡིན།
10 ཁོས་ཡོལ་བ་ལྔ་ནི་ཕན་ཚུན་སྦྲེལ་བ་དང་། ཡོལ་བ་གཞན་ལྔ་པོ་དེ་ཡང་ཕན་ཚུན་སྦྲེལ་ཏོ། །
11 ཡང་མུ་གཅིག་ཏུ་འབྲེལ་བའི་ཡོལ་བ་སྔ་མ་དེའི་སྣེ་མོར་ཁོས་མཐིང་མདོག་གི་སྒྲོག་ལུང་རྣམས་བཟོས་ཤིང་། མུ་གཅིག་ཏུ་འབྲེལ་བའི་ཡོལ་བ་ཕྱི་མ་དེའི་སྣེ་མོ་ལའང་ཁོས་དེ་བཞིན་བྱས།
12 ཁོས་མུ་གཅིག་ཏུ་འབྲེལ་བའི་ཡོལ་བ་སྔ་མར་སྒྲོག་ལུང་ལྔ་བཅུ་བཟོས་པ་དང་། མུ་གཅིག་ཏུ་འབྲེལ་བའི་ཡོལ་བ་ཕྱི་མར་ཡང་སྒྲོག་ལུང་ལྔ་བཅུ་བཟོས་ཏེ། སྒྲོག་ལུང་རྣམས་ཆ་རེ་ཁ་སྤྲད་ནས་བཞག
13 ཡང་གུར་མཆོག་མུ་གཅིག་ཏུ་བསྒྲིལ་བའི་ཕྱིར་གསེར་ཀྱུ་ལྔ་བཅུ་བཟོས་ཤིང་། ཡོལ་བ་རྣམས་གསེར་ཀྱུས་སྦྲེལ་ཏོ། །
14 ཡང་གུར་མཆོག་གི་ཁེབས་རས་ཀྱི་ཕྱིར་ཁོས་ར་རྩིད་ཀྱི་ཡོལ་བ་བཅུ་གཅིག་བཟོས་ཤིང་།
15 ཡོལ་བ་རེ་རེའི་རིང་ཚད་ནི་ཁྲུ་སུམ་ཅུ་དང་། ཞེང་ཚད་ནི་ཁྲུ་བཞི་ཡོད་པ་དང་། ཡོལ་བ་བཅུ་གཅིག་པོའི་ཚད་གཅིག་མཚུངས་ཡིན།
16 ཁོས་ཡོལ་བ་ལྔ་ནི་གཅིག་ཏུ་སྦྲེལ་ཞིང་ཡོལ་བ་གཞན་དྲུག་ཀྱང་གཅིག་ཏུ་སྦྲེལ་བ་དང་།
17 ཡོལ་བ་སྦྲེལ་མ་ལྔ་ཅན་དེའི་སྣེ་མོར་སྒྲོག་ལུང་ལྔ་བཅུ་དང་། ཡོལ་བ་སྦྲེལ་མ་དྲུག་ཅན་དེའི་སྣེ་མོར་ཡང་སྒྲོག་ལུང་ལྔ་བཅུ་བཟོས།
18 ཡང་ཁེབས་རས་མུ་གཅིག་འཁྱུད་གཅིག་འོང་བའི་ཕྱིར་ཁོས་ལི་ཡི་ཀྱུ་ལྔ་བཅུ་བཟོས་པ་དང་།
19 རྒྱ་ཚོས་བརྒྱབ་པའི་ལུག་ཐུག་གི་པགས་པས་ཁེབས་རས་གཡོགས་པ་དང་། ཡང་དེའི་སྟེང་དུ་ཀོ་བ་སྤུས་ལེགས་རྣམས་ཀྱིས་ཁེབས་ཤིག་བཟོས་སོ། །
20 དེ་ནས་ཁོས་གུར་མཆོག་གི་ཕྱིར་སེང་ལྡེང་ཤིང་གིས་གྱེན་དུ་འགྲེང་བའི་པང་ལེབ་རྣམས་བཟོས་པ་དང་།
21 པང་ལེབ་རེའི་རིང་ཚད་ནི་ཁྲུ་བཅུ་དང་། ཞེང་ཚད་ནི་ཁྲུ་གཅིག་དང་ཕྱེད་ཀ་ཡིན།
22 པང་ལེབ་གཅིག་དང་གཅིག་འབྲེལ་བའི་ཕྱིར་ཁོས་རེ་རེ་ལ་ཁོང་གཟེར་གཉིས་བཟོས་པ་དང་། གུར་མཆོག་གི་པང་ལེབ་ཐམས་ཅད་དེ་ལྟར་བཟོས།
23 ཁོས་གུར་མཆོག་གི་པང་ལེབ་བཟོས་པ་སྟེ། ལྷོ་ཕྱོགས་སུ་པང་ལེབ་ཉི་ཤུ་བཟོས་པ་དང་།
24 པང་ལེབ་ཉི་ཤུ་དེའི་ཞབས་ལ་དངུལ་གྱི་ཞབས་ར་བཞི་བཅུ་བཟོས་པ་དང་། པང་ལེབ་རེ་ལ་ཁོང་གཟེར་གཉིས་ཀྱི་ཞབས་ར་ཟུང་རེ་བཟོས་སོ། །
25 གུར་མཆོག་གི་ལོགས་གཞན་ཏེ། བྱང་ཕྱོགས་སུ་ཡང་ཁོས་པང་ལེབ་ཉི་ཤུ་བཟོས་པ་དང་།
26 དེའི་དངུལ་གྱི་ཞབས་ར་བཞི་བཅུ་དང་། པང་ལེབ་རེའི་འོག་ལ་ཞབས་ར་ཟུང་རེ་བཟོས།
27 གུར་མཆོག་གི་རྒྱབ་ལོགས་ཏེ་ནུབ་ཕྱོགས་སུ་ཁོས་པང་ལེབ་དྲུག་བཟོས་པ་དང་།
28 གུར་མཆོག་རྒྱབ་ལོགས་ཀྱི་ཟུར་གཉིས་ལ་པང་ལེབ་གཉིས་བཟོས།
29 དེ་གཉིས་ཀྱི་འགབ་ལ་པང་ལེབ་ཉིས་གཤིབ་ཡོད་ཅིང་། དེའི་གོང་ལའང་པང་ལེབ་གཅིག་གི་སྣེ་ནས་པང་ལེབ་གཞན་ཞིག་གི་བར་དུ་ཨ་ལོང་གཅིག་གིས་སྦྲེལ་བ་དང་། དེ་བཞིན་དུ་ཁོས་པང་ལེབ་གཉིས་དེ་ལྟར་ཟུར་གཉིས་ལ་བཟོས།
30 དེ་ལྟར་པང་ལེབ་བརྒྱད་དང་དེ་དག་ལ་དངུལ་གྱི་ཞབས་ར་བཅུ་དྲུག་དང་། པང་ལེབ་རེ་རེ་ལ་ཞབས་ར་གཉིས་བཅས་ཡོད་དོ། །
31 དེ་ནས་ཁོས་སེང་ལྡེང་ཤིང་གིས་འཕྲེད་རྒྱུག་རྣམས་བཟོས་ཏེ། གུར་མཆོག་གི་ལོགས་གཅིག་གི་པང་ལེབ་རྣམས་ཀྱི་ཕྱིར་འཕྲེད་རྒྱུག་ལྔ་དང་།
32 གུར་མཆོག་གི་ལོགས་གཞན་ལ་ཡོད་པའི་པང་ལེབ་རྣམས་ཀྱི་ཕྱིར་འཕྲེད་རྒྱུག་ལྔ་དང་། རྒྱབ་ལོགས་ཏེ་ནུབ་ཕྱོགས་ཀྱི་པང་ལེབ་རྣམས་ཀྱི་ཕྱིར་ཡང་འཕྲེད་རྒྱུག་ལྔ་བཅས་བཟོས།
33 ཡང་ཁོས་པང་ལེབ་རྣམས་ཀྱི་དཀྱིལ་དུ་ཡོད་པའི་འཕྲེད་རྒྱུག་དག་སྣེ་གཅིག་ནས་སྣེ་གཞན་དུ་སླེབས་པར་བྱས་ཤིང་།
34 པང་ལེབ་དེ་དག་ཁོས་གསེར་གྱིས་གཡོགས་པ་དང་། དེ་དག་གི་འཕྲེད་རྒྱུག་འཛིན་པའི་ཨ་ལོང་རྣམས་གསེར་དུ་བྱས་ཤིང་། ཡང་འཕྲེད་རྒྱུག་དག་གསེར་གྱིས་གཡོགས་སོ། །
35 ཡང་ཁོས་ཡོལ་བ་ཞིག་བཟོས་ཤིང་། དེའི་རྒྱུ་ནི་བལ་སྐུད་མཐིང་ག་དང་། རྒྱ་སྨུག་དང་། མཚལ་དམར་དང་། སོ་རས་སྲབ་བུ་བསྒྲིམས་པ་ཅན་བཅས་ཡིན་ཞིང་། ཡང་དེ་ལ་འཐག་མཁན་ལག་རྩལ་ཅན་གྱི་ལས་བཞིན་དུ་ཀེ་རུབ་ཀྱི་གཟུགས་བརྙན་དང་ལྡན་པ་རྣམས་བཟོས་ཤིང་།
36 ཁོས་ཡོལ་བའི་ཕྱིར་སེང་ལྡེང་ཤིང་གི་ཀ་བ་བཞི་བཟོས་ཤིང་གསེར་གྱིས་གཡོགས་པ་དང་། དེ་དག་གི་ཀྱུ་རྣམས་གསེར་ཡིན་པ་དང་། དེ་དག་གི་ཕྱིར་དངུལ་གྱི་ཞབས་ར་བཞི་བླུགས་སོ། །
37 ཁོས་གུར་མཆོག་གི་སྒོ་ལ་སྒོ་ཡོལ་ཞིག་བཟོས་ཏེ། དེའི་རྒྱུ་ནི་བལ་སྐུད་མཐིང་ག་དང་རྒྱ་སྨུག་དང་མཚལ་དམར་དང་། སོ་རས་སྲབ་བུ་བསྒྲིམས་པ་ཅན་ཡིན་ཏེ། འཐག་མཁན་གྱི་ལས་བཞིན་དུ་བཟོས།
38 ཡང་ཁོས་ཀ་བ་ལྔ་དང་སོ་སོའི་ཀྱུ་དང་བཅས་བཟོས་ཤིང་། ཀ་མགོ་རྣམས་དང་། ཁ་ཐུར་དག་གསེར་གྱིས་གཡོགས་པ་དང་། དེའི་ཞབས་ར་ལྔ་ནི་ལི་ཡིས་བཟོས་པ་ཡིན་ནོ། །