སྐབས་དེར་ཡ་ཧུ་དཱ་མི་རིགས་ལས་མི་མང་པོ་ཞིག་གིས་ཡེ་ཤུའི་ཆོས་ལུགས་ལ་དད་པ་བྱས་པ་དང་། དེ་རྣམས་ལས་མི་འགའ་ཞིག་གིས་ཞལ་ཆད་རྙིང་པའི་ཁྲིམས་སྲོལ་སྣ་ཚོགས་བསྲུང་དགོས་པའི་ལྟ་ཚུལ་བཏོན་ཏེ། ཞལ་ཆད་གསར་པའི་སྐབས་ཀྱི་ཆོས་ཚོགས་ཀྱིས་དེ་ལ་བསྟུན་དགོས་པར་བརྗོད་པ་རེད། ཕོལ་ལོལ་གྱིས་ག་ལད་ཡཱ་ཡུལ་དུ་འཕྲིན་བཟང་སྤེལ་བའི་རྗེས་སུ། ལྟ་ཚུལ་དེ་འདོན་མཁན་དག་གིས་ཡེ་ཤུའི་ཆོས་ལུགས་ལ་དད་པའི་ཕྱི་ཕྱོགས་པ་རྣམས་ཀྱིས་ཞལ་ཆད་རྙིང་པའི་ཁྲིམས་སྲོལ་ལ་ལ་བསྲུང་དགོས་པ་དང་། ལྷག་པར་དུ་མཚན་སྐྱི་གཅོད་པའི་ཁྲིམས་སྲོལ་བསྲུང་དགོས་པ་ནན་གྱིས་བརྗོད། ཡང་དེ་དག་གིས་ཕོལ་ལོལ་ནི་སྐུ་ཚབ་པ་ངོ་མ་ཞིག་མིན་པ་དང་། ཁོང་གིས་ཕྱི་ཕྱོགས་པ་རྣམས་འཕྲིན་བཟང་ལ་དགའ་བའི་ཆེད་དུ་འཕྲིན་བཟང་ལས་བསྲུང་དགོས་པའི་ཁྲིམས་སྲོལ་འགའ་མེད་པར་བཟོས་པ་རེད་ཅེས་རྫུན་བཤད་པ་རེད། དེ་བས་ཕོལ་ལོལ་གྱིས་འཕྲིན་ཡིག་འདི་བརྒྱུད་ནས་དེ་དག་ལ་དགག་ལན་བརྒྱབ།

གཞུང་འདིའི་ཚིག་རྐང་དང་པོ་ལས་འཕྲིན་ཡིག་འདི་ཡི་གེར་འགོད་མཁན་ཕོལ་ལོལ་ཡིན་པར་ངོས་འཛིན་བྱས་ཡོད། སྤྱིར་འཕྲིན་ཡིག་འདི་ཡེ་གེར་བཀོད་པའི་ལོ་ཚིགས་ཀྱི་ཐད་ལ་བཞེད་ཚུལ་མི་མཐུན་པ་འགའ་ཞིག་ཡོད་ནའང་། ཡོངས་གྲགས་སུ་སྤྱི་ལོ་50ལོའི་ཡས་མས་སུ་ཡི་གེར་བཀོད་པ་ཡིན་པར་དགོངས།

ཞལ་ཆད་གསར་པའི་བདེན་པའི་ལྟ་བ་སྟེ། སྐྱབས་མགོན་ཡེ་ཤུར་དད་པ་ཁོ་ན་བརྒྱུད་ནས་དཀོན་མཆོག་གིས་བདག་ཅག་མི་རྣམ་དག་ཏུ་བརྩིས་པ་ཞེས་པ་དེ་ག་ལད་ཡཱ་པའི་འཕྲིན་ཡིག་གི་བཀའ་གསུང་གིས་ངག་གི་མཐུ་ནུས་ལ་བརྟེན་ནས་ནན་གྱིས་སྲུང་སྐྱོབ་མཛད་པར་མ་ཟད། དམ་པའི་ཐུགས་ཉིད་དང་སྐྱབས་མགོན་ཡེ་ཤུའི་ཐུགས་རྗེ་བརྒྱུད་ནས་དཀོན་མཆོག་གིས་ཀྱང་བདག་ཅག་མི་དམ་པར་བཟོས་པ་བཅས་བརྗོད་ཡོད། ཡང་མི་འགའ་ཞིག་གིས་འཕྲིན་ཡིག་འདི་ལ་ཡེ་ཤུའི་ཆོས་ལུགས་པའི་རང་དབང་ལྡན་པའི་འཕྲིན་ཡིག་ཅེས་ཀྱང་བརྗོད་དོ།།

1. ངོ་སྤྲོད་བྱེད་པ་སྟེ། ཁམས་འདྲི་དང་སྐྱོན་བརྗོད་པ། ༼1:1-9༽

2. ཕོལ་ལོལ་ཇི་ལྟར་སྐུ་ཚབ་པར་གྱུར་པའི་སྐོར། ༼1:10-2:21༽

3. ཁྲིམས་སྲོལ་གྱི་རང་དབང་དང་ཆོས་ཀྱི་དད་པའི་གཞུང་ལུགས་འཆད་པའི་རྒྱུ་མཚན། ༼3:1-4:31༽

4. མི་ཚེའི་རང་དབང་དང་ཆོས་ཀྱི་དད་པའི་སྦྱོང་བརྡར་སྐོར། ༼5:1-6:10༽

5. མཇུག་སྡོམ། ༼6:11-18༽