གཞུང་འདིའི་ཁ་བྱང་ནི་ཡི་གེར་འགོད་མཁན་གྱི་མིང་ནས་ཐོགས་པ་ཡིན། དེ་ནི་ཨིབ་རི་པའི་སྐད་ཡིག་གཞི་བྱས་ནས་བྱུང་བ་སྟེ། དམ་པོར་འཆིང་བའམ་འཐམ་པ་ཞེས་པའི་དོན་ཡིན། ཧ་བཱ་ཁུག་གིས་གཉན་འཕྲང་ཆེ་བའི་དུས་སྐབས་དེ་ལྟ་བུའི་ཁྲོད་ནས་སྨོན་ལམ་བཏབ་པ་དང་ལུང་བསྟན་གནང་བ་རེད། དོན་དག་ཚབས་ཆེན་བྱུང་བའི་དོན་རྐྱེན་དེ་རྣམས་ལ་རྒྱལ་སྤྱིའི་མི་རྣམས་ཧ་ལས་པར་གྱུར། སྐབས་དེར་དཀོན་མཆོག་གི་མི་རྣམས་ཀྱིས་ཆོས་ལུགས་ཀྱི་འཆལ་སྤྱོད་སྤེལ་བ་རེད།

རང་ཅག་གིས་ཡི་གེར་འགོད་མཁན་གྱི་མིང་ཙམ་ཤེས་པ་དང་། ཁོང་དང་ཡེ་རེམ་ཡཱ་གཉིས་དུས་སྐབས་གཅིག་གི་མི་ཡིན་པ་མ་གཏོགས་ཁོང་གི་སྐོར་ཤེས་ཐུབ་མེད། ཁོང་ནི་དད་པ་ཤུགས་ཆེ་བའི་མི་ཞིག་ཡིན་པ་དང་། དད་པ་དེར་ཡེས་ར་ཨེལ་པའི་ཆོས་ཀྱི་སྲོལ་རྒྱུན་གྱི་རྩ་བ་གཏིང་ཟབ་ཚུགས་ཡོད། སྤྱིར་བཏང་ལུང་བསྟན་གྱི་ལོ་ཚིགས་ནི་ཀར་ཀེ་མི་སི་༼སྤྱི་ལོ་སྔོན་གྱི་605ལོ།༽གྲོང་ཁྱེར་ནས་བྱུང་བའི་དམག་འཁྲུག་གི་སྔ་ཕྱི་གང་རུང་ཞིག་ཡིན།

ཧ་བཱ་ཁུག་ཅེས་པའི་གཞུང་འདིའི་ནང་དུ་དཀོན་མཆོག་དང་ལུང་སྟོན་པ་གཉིས་ཀྱིས་ཕན་ཚུན་ལ་གསུང་མོལ་དང་ཁ་བརྡ་གནང་བའི་རྣམ་པ་ཡི་གེར་བཀོད་ཡོད། འགོ་དཔོན་ཚོས་དབུལ་པོ་རྣམས་ལ་གཉའ་གནོན་བྱེད་བཞིན་པ་ཧ་བཱ་ཁུག་གིས་མཐོང་བས། ཁོང་གི་སེམས་ལ། དཀོན་མཆོག་གིས་མི་ངན་ཚོ་དར་ཁྱབ་ཕྱིན་པ་ལ་ཐུགས་ཡངས་གནང་དོན་ཅི་ཡིན་ནམ་སྙམ། དེ་ནས་དཀོན་མཆོག་གིས་བཀའ་ལན་གནང་བ་དང་། ཧ་བཱ་ཁུག་གིས་དད་པ་གཙང་མའི་སྐོར་གྱི་གཏམ་སྨྲས། ཁོང་གིས་སྨྲས་པའི་གཏམ་དེ་ནི་མི་རྣམས་ཀྱི་ངག་རྒྱུན་ལྟ་བུར་གྱུར་ཡོད། དེ་དང་ཆ་འདྲ་བའི་བརྗོད་པ་ནི་གསུང་མགུར་གྱི་གཞུང་དུའང་བཀོད་ཡོད།

1. ཧ་བཱ་ཁུག་གི་དྲི་བ་དང་པོ་དང་དཀོན་མཆོག་གིས་བཀའ་ལན་གནང་བའི་སྐོར། ༼1:1-11༽

2. ཧ་བཱ་ཁུག་གི་དྲི་བ་གཉིས་པ་དང་དཀོན་མཆོག་གིས་བཀའ་ལན་གནང་བའི་སྐོར། ༼1:12-2:20༽

3. ཧ་བཱ་ཁུག་གི་གསོལ་འདེབས། ༼3:1-19༽