ཨེས་ཡོབ་ཅེས་པའི་གཞུང་གི་ཁ་བྱང་ནི་མི་སྣ་གཙོ་བོ་ཨེས་ཡོབ་ཀྱི་མིང་ནས་ཐོགས་པ་ཡིན། ཁོང་ནི་གཞུང་རྒྱུད་དྲང་བའི་མི་ཞིག་ཡིན་པར་མ་ཟད་ཧ་ཅང་ཕྱུག་པོ་ཞིག་ཀྱང་ཡིན། ཐ་ན་རང་ལ་ཡོད་པ་ཐམས་ཅད་ཤོར་བ་དང་ན་བའི་སྡུག་བསྔལ་གྱིས་རབ་ཏུ་གཙེས་ནའང་། ཁོང་གིས་སྔར་བཞིན་དཀོན་མཆོག་ལ་དད་པ་ཡོད་ཅེས་བསྒྲགས་པ་རེད།

གཞུང་གི་ནང་དུ་བརྗོད་པའི་གཏམ་ཕལ་ཆེ་བ་ཨེས་ཡོབ་དང་ཁོང་གི་སློབ་སྟོན་པ་རྣམས་ཀྱིས་སྨྲས་པ་ཡིན་ནའང་། ཨེས་ཡོབ་ཀྱི་གཞུང་འདི་ཡི་གེར་འགོད་མཁན་ནི་མིན། གཞུང་འདི་ཡི་གེར་འགོད་མཁན་ཡེས་ར་ཨེལ་པ་ཞིག་ཡིན་པར་ཐེ་ཚོམ་མེད་དེ། ཡི་གེར་འགོད་མཁན་གྱིས་ཡེས་ར་ཨེལ་གྱི་ངག་རྒྱུན་དང་མ་ཕྱི་གཉིས་གཟིགས་མོར་ཕུལ་བར་མ་ཟད། ངག་རྒྱུན་དང་མ་ཕྱི་གཉིས་ལ་བརྟེན་ནས་གཞུང་འདི་ཡི་གེར་བཀོད་པ་རེད།

དེ་ལ་དུས་སྐབས་མི་གཅིག་པ་གཉིས་མཆིས། (1) ཨེས་ཡོབ་ཀྱི་དུས་དང་ཁོང་གི་ལོ་རྒྱུས་བྱུང་བའི་དུས་སྐབས། (2) དཀོན་མཆོག་གིས་སྐུལ་སློང་གནང་བ་ལ་བརྟེན་ནས་གཞུང་འདི་ཡི་གེར་བཀོད་པའི་དུས་གཉིས་ཡིན། དུས་སྐབས་གཉིས་པ་ནི་སོ་ལོ་མོན་གྱིས་སྲིད་བསྐྱངས་པའི་སྐབས་ནས་པཱ་པེལ་ལོན་གྱིས་ཡེས་ར་ཨེལ་པ་རྣམས་བཙན་ཁྲིད་བྱས་པའི་དུས་གང་རུང་ཞིག་ཏུ་བྱུང་། གཞུང་གི་ནང་དུ་བྱུང་བའི་དོན་རྣམས་དུས་ནམ་ཞིག་ལ་བྱུང་བ་ཡིན་ཞེ་ན། སྤྱི་ལོ་སྔོན་གྱི་1000ལོ་ནས་2000ལོའི་ཡས་མས་སུ་བྱུང་བ་སྟེ། སྤྱི་ལོ་སྔོན་གྱི་ཆིག་སྟོང་ལོ་དང་ཉིས་སྟོང་ལོའི་བར་གྱི་ལོ་ངོ་ཆིག་སྟོང་གི་སྨད་ཙམ་ལ་བྱུང་བ་ཡིན།

གཞུང་འདི་ལས་མི་རྣམས་ཀྱིས་སྡུག་བསྔལ་མྱོང་བཞིན་ཡོད་པ་དང་། གལ་ཏེ་དཀོན་མཆོག་ནི་བྱམས་བརྩེའི་བདག་ཉིད་ཡིན་ན། གཞུང་རྒྱུད་དྲང་བའི་མི་རྣམས་ཀྱིས་སྡུག་བསྔལ་ཆེན་པོ་མྱོང་བའི་རྒྱུ་མཚན་ཅི། དེ་ལས་ཀྱང་ཉེས་པ་མེད་པའི་མི་ལ་སྡུག་བསྔལ་འབྱུང་སྲིད་ན་བླ་ན་མེད་པའི་དཀོན་མཆོག་གི་བདེན་ལུགས་ཇི་ལྟར་སྲུང་སྐྱོབ་བྱེད་དགོས་སམ་ཞེས་དོགས་འདྲི་བྱས་ཡོད། དེའི་སྐོར་ལ་འདི་ལྟར་གསུངས་ཡོད་དེ། སྐབས་རེར་གཞུང་རྒྱུད་དྲང་བའི་མི་ལ་སྡུག་བསྔལ་འབྱུང་བ་ནི་བར་སྣང་ཁམས་སུ་ཡོད་པའི་དཀོན་མཆོག་དང་བདུད་སཱ་ཏན་གཉིས་བར་གྱི་འཐབ་རྩོད་དང་འབྲེལ་བ་ངེས་ཅན་ཡོད་པ་རེད།

1. ངོ་སྤྲོད། ༼1:1-2:13༽

2. ཨེས་ཡོབ་དང་ཁོང་གི་མཆེད་གྲོགས་བར་གྱི་གླེང་མོལ་དང་རྩོད་གཞིའི་སྐོར། ༼3:1-27:23༽

3. བར་གསེང་དུ་དཀོན་མཆོག་གི་ཤེས་རབ་སྐོར་གྱི་ཁ་བརྡ། ༼28:1-28༽

4. ཨེས་ཡོབ་དང་ཨེ་ལི་ཧུ། དཀོན་མཆོག་བཅས་ཀྱི་གསུང་། ༼29:1-42:6༽

5. མཇུག་གི་གཏམ། ༼42:7-17༽