ལེའུ་གཉིས༌པ།
སྐྱབས་མགོན་ཡེ་ཤུས་མི་ཞ་བོ་ཞིག་གསོས༌པ།
1 ཉིན་འགའ་འགོར༌རྗེས། སྐྱབས་མགོན་ཡེ་ཤུ་ཕྱིར་ཀཱ་ཕར་ན་ཧུམ་དུ་ཕེབས་ཤིང་ཁོང་ཉིད་ཀྱི་བཞུགས་གནས་སུ་བཞུགས་པའི་གཏམ་དེ་མི་རྣམས་ཀྱིས་ཐོས༌ནས།
2 མི་མང་པོ་གནས་དེར་འཛོམས་ཤིང་ཐ་ན་སྒོ་ཁར་ཡང་སྡོད་ས་མེད་པ༌དང༌། ཁོང་གིས་མི་རྣམས་ལ་དཀོན་མཆོག་གི་བཀའ་གསུངས༌སོ།།
3 དུས༌དེར། མི་ཁ་ཤས་སྐྱབས་མགོན་ཡེ་ཤུའི་དྲུང་དུ་ཡོང་བ༌དང༌། དེའི་ནང་ནས་མི་བཞི་ཡིས་ཞ་བོ་ཞིག་ཁྱོགས་ཤིང་དུ་ཁུར་ཡོང་བ༌རེད།
4 ཡང་མི་མང་པོ་འདུས་པས་དེ་རྣམས་ཁོང་གི་སྐུ་དྲུང་དུ་འགྲོ་ཐབས་མ་བྱུང༌བར། ཁོང་ཉིད་བཞུགས་སའི་ཁང་པ་དེའི་ཁང་ཀླད་བཀོག་ནས་བརྟོལ་བ༌དང༌། མི་ཞ་བོ་དེ་ཁྱོགས་ཤིང་དང་བཅས་མར༌བཏང༌།
5 སྐྱབས་མགོན་ཡེ་ཤུས་དེ་རྣམས་ཀྱི་དད་སེམས་གཟིགས་ཏེ་ཞ་བོ་དེ་ལ་འདི་སྐད༌དུ། སྙིང་གི༌བུ། ཁྱོད་ཀྱི་སྡིག་པ་བསལ་བ་ཡིན་ཞེས་གསུངས༌སོ།།
6 འོན་ཀྱང་གནས་དེར་ཚོགས་པའི་མཁན་པོ་འགའ་ཞིག་གི་སེམས༌ལ།
7 མི་འདིས་ཅིའི་ཕྱིར་འདི་ལྟར༌སྨྲའམ། ཁོས་དཀོན་མཆོག་གི་དབུ་འཕང་སྨད་ཀྱིན༌འདུག དཀོན་མཆོག་ཁོ་ན་ལས་གཞན་སུ་ཞིག་གིས་སྡིག་པ་བསལ་ནུས་སམ་སྙམ་པ༌རེད།
8 སྐྱབས་མགོན་ཡེ་ཤུས་དེ་མ་ཐག་ཁོ་རྣམས་ཀྱི་བསམ་ཚུལ་མཁྱེན་ཏེ་འདི་སྐད༌དུ། ཅིའི་ཕྱིར་ཁྱོད་ཅག་གི་སེམས་སུ་དེ་ལྟར་བསམས་པ་ཡིན༌ནམ།
9 མི་ཞ་བོ་འདི་ལ་ཁྱོད་ཀྱི་སྡིག་པ་བསལ་བ་ཡིན་ཞེས་ཟེར་བ༌དང༌། ཡར་ལོངས་ལ་ཁྱོད་ཀྱི་ཁྱོགས་ཤིང་ཁུར་ནས་སྐྱོད་ཅིག་ཅེས་ཟེར་བ་གཉིས་ལས་གང་ཞིག༌སླའམ།
10 འོན༌ཀྱང༌། འདི་ནི་ས་སྟེང་དུ་མིའི་བུ་ལ་སྡིག་པ་བསལ་བའི་དབང་ཡོད་པ་ཁྱོད་རྣམས་ཀྱིས་ཤེས་པའི་ཕྱིར་ཡིན་ཞེས་གསུངས༌རྗེས། ཁོང་གིས་ཞ་བོ་དེ་ལ་འདི་སྐད༌དུ།
11 བདག་གིས་ཁྱོད་ལ་སྨྲ་བར་བྱ༌སྟེ། ཡར་ལོངས༌ལ་ཁྱོགས་ཤིང་ཁུར་ནས་ཕྱིར་རང་ཡུལ་དུ་སོང་ཞིག་ཅེས་བཀའ་གནང་མ༌ཐག
12 མི་དེ་ཡར་ལངས་ནས་ཁྱོགས་ཤིང་ཁུར་ཏེ་མི་ཚང་མའི་མིག་མདུན་ནས་སྒོའི་ཕྱི་རུ༌ཕྱིན། དོན་དེར་མི་ཐམས་ཅད་ངོ་མཚར་བར་གྱུར༌ཏེ། དཀོན་མཆོག་ལ་བསྟོད་བསྔགས་བརྗོད་ཅིང་བདག་ཅག་གིས་དོན་འདི་འདྲ་ཞིག་གཏན་ནས་མཐོང་མ་མྱོང་ཞེས་སྨྲས༌སོ།།
ལེ་ཝི་སྐྱབས་མགོན་ཡེ་ཤུའི་རྗེས་སུ་འབྲང༌བ།
13 ཡང་སྐྱབས་མགོན་ཡེ་ཤུ་མཚོ་འགྲམ་དུ་ཕེབས་པ༌དང༌། མི་ཚོགས་ཐམས་ཅད་ཁོང་གི་དྲུང་དུ་འཛོམས༌ཤིང༌། ཁོང་གིས་དེ་རྣམས་ལ་ཆོས༌གསུངས།
14 སྐྱབས་མགོན་ཡེ་ཤུ་ཕེབས་པའི་དུས༌སུ། ཁོང་གིས་ཨལ་ཕཱའི་བུ་ལེ་ཝི་ ཟེར་བ་དེ་ཁྲལ་སྡུད་སར་བསྡད་ཡོད་པ་གཟིགས་ནས་དེ་ལ་འདི་སྐད༌དུ། ཁྱོད་རང་ངའི་རྗེས་སུ་ཤོག་ཅེས་གསུངས་པ༌དང༌། ཁོ་རང་ཡར་ལངས་ཏེ་ཁོང་གི་རྗེས་སུ་འབྲངས༌སོ།།
15 སྐྱབས་མགོན་ཡེ་ཤུས་མི་དེའི་ཁྱིམ་དུ་ཞལ་ཟས་བཞེས་ནས་སྡོད་པའི་དུས༌སུ། ཁྲལ་ལེན་མཁན་དང་མི་སྡིག་ཅན་མང་པོས་ཀྱང་སྐྱབས་མགོན་ཡེ་ཤུ་དང་ཁོང་གི་ཐུགས་སྲས་དང་མཉམ་དུ་བཟའ་བཏུང་སྤྱད་ནས་བསྡད༌ཅིང༌། གནས་དེར་མི་མང་པོ་ཡོད་པ་དང་མི་དེ་རྣམས་ཀྱང་སྐྱབས་མགོན་ཡེ་ཤུའི་རྗེས་སུ་འབྲངས༌སོ།།
16 ཕ་རུ་ཤི་པའི་མཁན་པོ་རྣམས་ཀྱིས་སྐྱབས་མགོན་ཡེ་ཤུས་མི་སྡིག་ཅན་དང་ཁྲལ་ལེན་མཁན་རྣམས་དང་མཉམ་དུ་ཞལ་ཟས་བཞེས་བཞིན་པ་མཐོང༌ཚེ། ཁོང་གི་ཐུགས་སྲས་རྣམས༌ལ། ཁོང་གིས་ཅིའི་ཕྱིར་ཁྲལ་ལེན་མཁན་དང་མི་སྡིག་ཅན་རྣམས་དང་མཉམ་དུ་བཟའ་བཏུང་ལ་རོལ་བ་ཡིན་ནམ་ཞེས༌སྨྲས།
17 སྐྱབས་མགོན་ཡེ་ཤུས་གཏམ་དེ་ཐོས་ནས་འདི་སྐད༌དུ། ལུས་ཁམས་བདེ་བའི་མི་ཡིས་སྨན་པ་བསྟེན་མི་དགོས༌མོད། འོན་ཀྱང་ནད་པས་ད་གཟོད་སྨན་པ་བསྟེན་དགོས་པ༌ཡིན། བདག་ནི་མི་གཞུང་དྲང་རྣམས་འབོད་དུ་འོངས་པ་མ་ཡིན༌པར། མི་སྡིག་ཅན་རྣམས་འབོད་དུ་ཡོང་བ་ཡིན་ཞེས་གསུངས༌སོ།།
སྨྱུང་གནས་སྐོར་གྱི་ཆོས་གསུངས༌པ།
18 དེའི་དུས༌སུ། ཡོ་ཧ་ནན་གྱི་སློབ་མ་དང་ཕ་རུ་ཤི་པ་རྣམས་ཀྱིས་སྨྱུང་གནས་སྲུང་བཞིན་ཡོད༌ཅིང༌། མི་འགའ་ཞིག་ཡོང་ནས་སྐྱབས་མགོན་ཡེ་ཤུ༌ལ། ཡོ་ཧ་ནན་གྱི་སློབ་མ་དང་ཕ་རུ་ཤི་པའི་སློབ་མ་རྣམས་ཀྱིས་སྨྱུང་གནས་སྲུང་བཞིན་ཡོད༌ནའང༌། ཁྱེད་ཀྱི་ཐུགས་སྲས་རྣམས་ཀྱིས་སྨྱུང་གནས་མི་སྲུང་བ་ཅི་ཞེས་དྲིས་པ༌ན།
19 སྐྱབས་མགོན་ཡེ་ཤུས་འདི་སྐད༌དུ། སྐུ་མགྲོན་རྣམས་མག་པ་དང་མཉམ་དུ་ཡོད་དུས་སྨྱུང་གནས་སྲུང་ག་ལ༌རུང༌། མག་པ་ཁོ་རྣམས་དང་མཉམ་དུ་ཡོད་དུས་ཁོ་རྣམས་ཀྱིས་ཀྱང་སྨྱུང་གནས་སྲུང་མི༌ཐུབ།
20 འོན་ཀྱང་མག་པ་ཁོ་རྣམས་དང་ཁ་འབྲལ་བའི་དུས་ཤིག་སླེབ་ཡོང༌སྟེ། དུས་དེར་ཁོ་རྣམས་ཀྱིས་སྨྱུང་གནས་བསྲུང་ངེས༌སོ།།
21 སུ་ཞིག་གིས་ཀྱང་རས་གསར་པས་ལྭ་རྙིང་པར་ལྷན་པ་མི་རྒྱག༌སྟེ། ལྷན་པ་བརྒྱབ་ན་ལྭ་རྙིང་པ་དེ་ལས་རལ་ཞིང་སྲུབས་ཀ་ཇེ་ཆེར་འགྲོ་བ༌ཡིན།
22 ཡང་སུ་ཞིག་གིས་ཀྱང་རྒུན་ཆང་གསར་པ་སྐྱི་ཁུག་རྙིང་པའི་ནང་དུ་མི་བླུག༌སྟེ། གལ་ཏེ་བླུགས་ན་སྐྱི་ཁུག་རྙིང་པ་རལ་ཏུ་འཇུག་པ༌དང༌། ཆང་དང་སྐྱི་ཁུག་གཉིས་ཀ་བརླག་པར་འགྱུར་ངེས༌པས། རྒུན་ཆང་གསར་པ་དེ་སྐྱི་ཁུག་གསར་པའི་ནང་དུ་བླུག་དགོས་ཞེས་གསུངས༌སོ།།
ངལ་གསོ་བའི་ཉིན་གྱི་གཙོ་བོའི༌སྐོར།
23 ངལ་གསོ་བའི་ཉིན༌ལ། སྐྱབས་མགོན་ཡེ་ཤུ་ཞིང་བར་བརྒྱུད་ནས་ཕེབས་པ༌དང༌། ཁོང་གི་ཐུགས་སྲས་རྣམས་ཀྱིས་འབྲུ་ཡི་སྙེ་མ་འཐོག་བཞིན་སོང༌ཞིང༌།
24 ཕ་རུ་ཤི་པ་རྣམས་ན༌རེ། གཟིགས༌དང༌། ཁོ་རྣམས་ཀྱིས་ཅིའི་ཕྱིར་ངལ་གསོ་བའི་ཉིན་ལ་བཀའ་ཁྲིམས་དང་འགལ་བའི་ལས་བྱེད་དམ་ཞེས་སྨྲས་པ༌ལ།
25 ཁོང་གིས་འདི་སྐད༌དུ། དཱ་བིད་འཁོར་དང་བཅས་པའི་ལམ་བྲོ་ཚར་བ་དང་བཀྲེས་ལྟོགས་བྱུང༌སྐབས། ཅི་ཞིག་བྱས་པ་ཁྱོད་ཅག་གིས་བཀླགས་མ་མྱོང༌ངམ།
26 ཨབ་ཡ་ཐཱར་མཆོད་དཔོན་ཆེན་པོ་ཡིན་པའི་དུས༌སུ། ཁོང་ཉིད་དཀོན་མཆོག་གི་བཞུགས་གནས་སུ་སོང༌ནས། སྤྱན་བསྟར་བག་ལེབ་ཟོས་ཤིང་འཁོར་གཡོག་རྣམས་ལའང་བྱིན༌ཏོ། །བག་ལེབ་དེ་ནི་མཆོད་དཔོན་ལས་གཞན་སུས་ཀྱང་བཟའ་མི་རུང་ཞེས་གསུངས་པ༌དང༌།
27 ཡང་འདི་སྐད༌དུ། ངལ་གསོ་བའི་ཉིན་མོ་ནི་མིའི་དོན་དུ་མཛད་པ༌ལས། མི་ནི་ངལ་གསོ་བའི་ཉིན་གྱི་དོན་དུ་མཛད་པ་མ་ཡིན༌ནོ།།
28 དེའི༌ཕྱིར། མིའི་བུ་ནི་ངལ་གསོ་བའི་ཉིན་གྱི་གཙོ་བོའང་ཡིན་ཞེས་གསུངས༌སོ།།