སཱ་མུ་ཨེལ་དང་པོ་དང་གཉིས་པའི་གཞུང་འདི་གཉིས་ནི་ལུང་སྟོན་པ་སཱ་མུ་ཨེལ་གྱི་མིང་ནས་ཐོགས་པ་ཡིན། དཀོན་མཆོག་གིས་ཉིད་ཀྱི་ཐུགས་དགོངས་དང་མི་མཐུན་ནའང་ལུང་སྟོན་པ་སཱ་མུ་ཨེལ་བརྒྱུད་ནས་ཡེས་ར་ཨེལ་པ་རྣམས་ཀྱི་འདོད་པ་ལྟར་རྒྱལ་རྒྱུད་རིང་ལུགས་དར་བར་མཛད། ཐོག་མའི་དུས་སུ་སཱ་མུ་ཨེལ་དང་པོ་དང་གཉིས་པ་གཉིས་ཀ་གཞུང་གཅིག་ཡིན་མོད། འོན་ཀྱང་གྷི་རིག་གི་སྐད་དུ་བསྒྱུར་བའི་ཞལ་ཆད་རྙིང་པ་སྟེ་སིབ་ཐུ་ཨ་ཀྱན་ཏི་༼Septuagint༽ཞེས་པའི་ལོ་ཙཱ་པ་རྣམས་ཀྱིས་གཞུང་དེ་གཉིས་ཀ་གཞུང་གཉིས་སུ་བཀར་བ་རེད། སཱ་མུ་ཨེལ་དང་པོའི་གཞུང་དུ་སཱ་མུ་ཨེལ་དང་སོ་ལོ་གཉིས་ཀྱི་མི་ཚེའི་ལོ་རྒྱུས་བཀོད་ཡོད་པར་མ་ཟད། དཱ་བིད་ཀྱི་མི་ཚེའི་ལོ་རྒྱུས་མང་ཆེ་བ་ཡང་བཀོད་ཡོད།

སཱ་མུ་ཨེལ་དང་པོ་ཡི་གེར་འགོད་མཁན་སུ་ཡིན་པའི་ངོས་འཛིན་གསལ་པོ་ཞིག་མེད། གང་ལ་ཞེ་ན། གཞུང་གི་ནང་དུ་དེ་བཀོད་མི་འདུག ཡི་གེར་འགོད་མཁན་གྱིས་རྒྱལ་ཁམས་ཁག་བགོས་བྱས་པའི་གཞུག་ཙམ་དང་། ཕལ་ཆེར་སོ་ལོ་མོན་སྐུ་གཤེགས་པའི་རྗེས་ཏེ་སྤྱི་ལོ་སྔོན་གྱི་930ལོའི་ཡས་མས་སུ་ཡི་གེར་བཀོད་པ་ཡིན།

སཱ་མུ་ཨེལ་དང་པོའི་གཞུང་གི་ནང་དུ་ཡེས་ར་ཨེལ་ཡུལ་ནས་རྒྱལ་རྒྱུད་རིང་ལུགས་དར་བར་མཛད་པའི་གནས་ཚུལ་བཀོད་ཡོད། མང་ཚོགས་ཀྱིས་རྒྱལ་པོ་ཞིག་བསྐོ་དགོས་པའི་བསམ་ཚུལ་བཏོན་སྐབས། སཱ་མུ་ཨེལ་གྱིས་དཀོན་མཆོག་གི་ལམ་སྟོན་བརྒྱུད་ནས་སོ་ལོ་སྣུམ་གྱིས་བྱུགས་ནས་ཡེས་ར་ཨེལ་གྱི་ཆེས་ཐོག་མའི་རྒྱལ་པོར་བསྐོས། ཡིན་ནའང་སོ་ལོས་དཀོན་མཆོག་གི་བཀའ་མ་བརྩིས་པ་དང་དཀོན་མཆོག་གིས་ཁོ་རྒྱལ་པོའི་གོ་ས་ནས་ཕབ། དེ་ནས་སཱ་མུ་ཨེལ་གྱིས་གསང་བའི་སྒོ་ནས་སོ་ལོའི་ཚབ་ཏུ་དཱ་བིད་སྣུམ་གྱིས་བྱུགས་ནས་རྒྱལ་པོར་བསྐོས། དེ་ནས་བཟུང་སོ་ལོ་དང་དཱ་བིད་གཉིས་བར་གྱི་འཐབ་རྩོད་ཀྱི་བྱུང་རིམ་དེ་གཞུང་འདིའི་མཇུག་བར་དུ་བརྗོད་ཡོད། སོ་ལོ་དང་དཱ་བིད་གཉིས་ཀྱི་སྐྱོན་དང་སྡིག་པ་མངོན་པར་གྱུར་པ་དང་ཆབས་ཅིག ཁོང་གཉིས་ཀྱིས་བཟང་སྤྱོད་སྤེལ་བ་དང་དཀོན་མཆོག་གི་བཀའ་གསུང་ཡང་བརྩིས་ཡོད་པར་བསྟན་ཡོད།

1. ཡེས་ར་ཨེལ་ལ་རྒྱལ་རྒྱུད་ཚུགས་པའི་ལོ་རྒྱུས་རྒྱབ་ལྗོངས་སྐོར། ༼1:1-7:17༽

2. ཡེས་ར་ཨེལ་ལ་རྒྱལ་རྒྱུད་ཚུགས་པའི་སྐོར། ༼8:1-12:25༽

3. རྒྱལ་པོ་སོ་ལོས་སྲིད་ཡག་པོ་བསྐྱངས་མ་ཐུབ་པའི་སྐོར། ༼13:1-15:35༽

4. རྒྱལ་པོ་དཱ་བིད་དང་སོ་ལོ་གཉིས་ཀྱི་སྐོར། ༼16:1-30:31༽

5. སོ་ལོ་འདས་གྲོངས་སུ་གྱུར་པའི་སྐོར། ༼31:1-13༽