སྤྱི་ལོ་62ནས་63ལོའི་བར་དུ་རོ་མཱ་གྲོང་ཁྱེར་ནས་ཕོལ་ལོལ་བཙོན་གྲོལ་བཏང་རྗེས་ཁོང་ཉིད་ཐེངས་བཞི་པར་ཆོས་སྤེལ་དུ་ཕྱིན། སྐབས་དེར་ཐི་མོ་ཐེ་དང་པོ་དང་ཐེ་ཏུའི་འཕྲིན་ཡིག་གཉིས་ཡི་གེར་བཀོད་པ་དང་། དེ་ནས་སྤྱི་ལོ་66ནས་67ལོའི་ཡས་མས་སུ་རོ་མཱ་གོང་མའི་རྒྱལ་པོ་ནེ་རོལ་༼Nero༽ཞེས་བྱ་བས་ཕོལ་ལོལ་སླར་ཡང་རོ་མཱ་གྲོང་ཁྱེར་དུ་བཙོན་ལ་བཅུག ཁོང་ནི་མུན་གནག་ཅིང་གྲང་ངར་ཆེ་བའི་ས་འོག་གི་བཙོན་ཁང་ཞིག་ཏུ་བཅུག་པ་དང་། ཉམ་ཐག་ཅིང་ནག་ཉེས་བསགས་མཁན་དང་འདྲ་བར་ལྕགས་སྒྲོག་བརྒྱབ་པ་རེད། ཕོལ་ལོལ་གྱིས་རང་གི་ལས་དོན་བསྒྲུབས་ཚར་བ་དང་རང་ཉིད་ཀྱི་མི་ཚེའང་རྫོགས་ལ་ཉེ་བ་རྟོགས་ཡོད།

འཕྲིན་ཡིག་འདིའི་ཚིག་རྐང་དང་པོ་ལས་གཞུང་འདི་ཡི་གེར་འགོད་མཁན་ནི་ཕོལ་ལོལ་ཡིན་པ་ཁ་གསལ་ཞིང་། འཕྲིན་ཡིག་གི་དུམ་མཚམས་མང་པོའི་ནང་དུ་དོན་དེ་ལ་བདེན་དཔང་མཛད་ཡོད། འཕྲིན་ཡིག་འདི་ནི་སྤྱི་ལོ་66ལོའི་ཡས་མས་སུ་ཡི་གེར་བཀོད་པ་ཡིན།

ཕོལ་ལོལ་གྱིས་དུས་སྐབས་འདིར་ཐི་མོ་ཐེ་ལ་འཕྲིན་ཡིག་འབྲི་བར་དམིགས་ཡུལ་གསུམ་ཡོད་དེ།

༼1༽ ཕོལ་ལོལ་ནི་རང་གི་གྲོགས་པོ་ཚོས་དོར་ནས་གྲོགས་མེད་ཁེར་རྐྱང་དུ་ལུས་པ་དང་། ཕོལ་ལོལ་གྱིས་ཐི་མོ་ཐེ་རང་དང་མཉམ་དུ་སྡོད་པར་རེ་བ་ཆེན་པོ་བཅངས་པ།

༼2༽ རོ་མཱའི་གོང་མ་རྒྱལ་པོ་ནེ་རོལ་གྱི་མངའ་འོག་ཏུ་ཆོས་ཚོགས་ལ་བཙན་གནོན་ཐེབས་པར་བརྟེན། ཁོང་གིས་ཆོས་ཚོགས་ཀྱི་བདེ་དོན་ལ་ཐུགས་ཁུར་གནང་བ་དང་། ཐི་མོ་ཐེ་ལ་སྡུག་བསྔལ་མྱང་དགོས་ཀྱང་ཡེ་ཤུའི་ཆོས་ལུགས་ཀྱི་འཕྲིན་བཟང་ལ་སྲུང་སྐྱོབ་བྱེད་དགོས་པར་བསྐུལ་སློང་བྱས།

༼3༽ སྐབས་དེར་ཕོལ་ལོལ་གྱིས་ཐི་མོ་ཐེ་བརྒྱུད་ནས་འཕྲིན་ཡིག་འདི་ཨེ་ཕེ་སི་གྲོང་ཁྱེར་གྱི་ཆོས་ཚོགས་ལ་འབྲི་འདོད་པ་ཡིན།

1. ཕོལ་ལོལ་གྱིས་ཐི་མོ་ཐེ་ལ་ཐུགས་ཁུར་གནང་བའི་སྐོར། ༼1:1-14༽

2. ཕོལ་ལོལ་གྱི་གནས་བབ་སྐོར། ༼1:15-18༽

3. ཐི་མོ་ཐེ་ལ་སློབ་སྟོན་མཛད་པའི་སྐོར། ༼2:1-26༽

4. མཐའ་མའི་ཉིན་མོ་དག་གི་སྤྱོད་ལམ་སྐོར། ༼3:1-17༽

5. ཕོལ་ལོལ་གྱི་གདམས་པ་དང་རེ་ཞུ། ཁམས་འདྲི་བཅས། ༼4:1-22༽