11
Tamo a Qotei qa aqa areqalo siŋgilateqnu
E Tamo Koba Qotei aqa areq di uliejunum deqa a na e taqatbeqnu. Niŋgi nanari tamo unub deqa kiyo niŋgi na e endegsib merbeqnub, “Ni qebari naŋgi bulosim ulaŋosim manaq oqe. Ni unime. Tamo uge naŋgi naŋgo aŋ titoqnsib naŋgo qaja dego ojoqnsib tamo areqalo bole ti unub qaji naŋgi uli na qamqajqa laqnub. Tamo kalil naŋgi kumbra bole dauryqa torei urateqnub deqa tamo tiŋtiŋ naŋgi kiyersib geregere sqab? Keresai.” Niŋgi na e degsib merbeqnub.
Deqa niŋgi quiy. Tamo Koba Qotei a aqa segi getento talq di unu. A laŋ qureq dia aqa awo jaramq di awesosiqa ŋam atoqnsiq tamo kalil naŋgi unjroqnsiq naŋgo kumbra geregere tenemteqnu. A na tamo bole ti tamo uge ti naŋgo kumbra geregere tenemtoqnsiqa tamo qalo qaji naŋgi tulaŋ qoreinjreqnu.
Qotei a ŋamyuwo tulaŋ kaŋkaŋ qariŋyoqnim tamo uge naŋgoq aiyoqnqas. Ŋamyuwo ti jagwa tulaŋ kaŋkaŋ ti dena tamo uge naŋgo jejamu koitetnjrqas. Naŋgi awai uge di itqab. Di kiyaqa? Tamo Koba Qotei a tulaŋ tiŋtiŋ unu deqa. A kumbra tiŋtiŋ qa tulaŋ areareteqnu. Deqa tamo bole tiŋtiŋ naŋgi geregere sosib Qotei aqa ulatamu unoqnqab.