111
Iga Tamo Koba aqa ñam soqtqom
1 Niŋgi Tamo Koba Qotei aqa ñam soqtiy! E ijo are miligi kalil Tamo Koba Qotei yekritqai. Aqa segi tamo uŋgasari bole naŋgi koroesoqnibqa e naŋgo ambleq dia a biŋiyqai.
2 Tamo Koba Qotei a maŋwa kokba babteqnu. Aqa segi tamo uŋgasari naŋgi aqa maŋwa deqa arearetnjreqnaqa maŋwa di aqa utru geregere qalieqajqa deqa peleiyeqnub.
3 Wau kalil Qotei a yeqnu qaji di tulaŋ bolequja. A wau di yeqnu deqa aqa ñam tulaŋ goge oqeqnu. Aqa kumbra bole tiŋtiŋ bati gaigai sqas.
4 Tamo Koba Qotei a na gago are tigeltetgeqnaqa iga aqa maŋwa kokba qa are qaleqnum. Iga aqa maŋwa deqa are walgosaieqnu. Qotei a iga qa duloqnsiqa are boleiyeqnu.
5 A na tamo uŋgasari a qa ulaeqnub qaji naŋgi iŋgi uyo anainjreqnu. A aqa anjam a nami naŋgi ti qoseb qaji deqa are walyosaieqnu. A gaigai aqa anjam deqa are qaleqnu.
6 A na sawa bei bei qaji naŋgo mandam yainjroqnsiqa aqa segi tamo uŋgasari naŋgi enjreqnu. Aqa kumbra dena a na aqa siŋgila naŋgi osornjreqnu.
7 Qotei aqa wau tulaŋ bole tiŋtiŋ unu. Aqa dal anjam kalil bole gisaŋ sai. Deqa iga aqa dal anjam qa gago areqalo siŋgilatosim dauryqom.
8 Qotei a kumbra bole tiŋtiŋ na aqa dal anjam atej. A aqa dal anjam di uratqa keresai. Deqa aqa dal anjam di bati gaigai sqas.
9 A na aqa segi tamo uŋgasari naŋgi eleŋosiqa boletnjrej. A na aqa anjam a nami naŋgi ti qoseb qaji di siŋgilatej. Deqa anjam di bati gaigai sqas. Qotei aqa ñam tulaŋ bolequja getento unu. Iga aqa ñam deqa ulaqom.
10 Od, iga Tamo Koba Qotei qa ulaqom. Iga degyqom di iga powo bole ti sqom. Tamo uŋgasari kalil Qotei aqa anjam dauryeqnub qaji naŋgi powo bole ti sqab. Qotei aqa ñam bati gaigai goge oqoqnqas.