116
Qotei na tamo aqaryaiyej
1 E na Tamo Koba Qotei a pailyem. Di kiyaqa? A e qa dulqajqa deqa. A ijo pailyo quej deqa e na a tulaŋ qalaqalaiyeqnum.
2 Od, a ijo pailyo quej. Deqa bati kalil e ŋambile sqai di e a metoqnqai.
3 E moiyo qure qa ulaugetosim are toŋtoŋbej. Moiyo a sil bulosiq e siŋgila na ojej.
4 Deqa e Tamo Koba Qotei aqa ñam metosim endegsi pailyem, “O Tamo Koba Qotei, ni na e aqaryaibime. Yim e bole sqai.” E degsi pailyem.
5 Tamo Koba Qotei a kumbra bole tiŋtiŋ yoqnsiqa iga qa are boleiyeqnu. Gago Qotei a iga qa duleqnu.
6 Tamo uŋgasari naŋgi na naŋgo segi jejamu aqaryaiyqa keresai deqa Tamo Koba Qotei na naŋgi taqatnjreqnu. Nami jeu tamo qudei naŋgi e ugetbqa laqnabqa Qotei na naŋgo baŋq na e taqal waibej.
7 Deqa bini e are lawo unum. Di kiyaqa? Tamo Koba Qotei a na e tulaŋ boletbej deqa.
8 O Tamo Koba Qotei, ni na e aqaryaibem deqa e moiyosai. Ni ijo ŋam ya kalil nuntetbosim e taqatbem deqa e uneq di uloŋosai.
9 Deqa bati kalil e mandamq endi sqai di e Tamo Koba Qotei a ombla walweloqnqai.
10 E marem, “Gulbe tulaŋ kobaquja na e kabutbejunu.” E degsi marsimqa bati deqa e Qotei qa ijo areqalo siŋgilatem.
11 E ijo gulbe deqa ulaosim endegsi marem, “Tamo kalil naŋgi gisaŋ tamo.” E degsi marem deqa Qotei na e aqaryaibej.
12 Od, Tamo Koba Qotei a na e tulaŋ boletbej. Deqa e kamba iŋgi bole kiye Qotei yqai?
13 Tamo Koba Qotei na e aqaryaibej deqa e padalosai. Deqa e wain gambaŋ osi bosiy Qotei atraiyosiy a biŋiyosiy aqa ñam metqai.
14 Aqa segi tamo uŋgasari kalil naŋgi koroesoqnibqa e naŋgo ambleq di wain gambaŋ atraiyitqa naŋgi unqab. E nami wain gambaŋ di Tamo Koba Qotei atraiyqajqa minjem.
15 Tamo Koba Qotei na aqa segi tamo uŋgasari bole naŋgi tulaŋ qalaqalainjreqnu. A naŋgi ŋambile sqajqa areareteqnu.
16 O Tamo Koba Qotei, e ino wau tamo unum. E ino wau ojeqnum. Ijo ai a nami ino wau ojoqnej dego kere. Sil kokba na e ojobulonabqa ni na sil di pambloŋyem deqa e bole unum.
17 O Tamo Koba Qotei, e ni biŋimqa marsiyqa iŋgi iŋgi osi bosiy ni atraimosiy biŋimqai. Bati deqa e ino ñam metqai.
18 Qotei aqa segi tamo uŋgasari kalil naŋgi koroesoqnibqa e naŋgo ambleq di iŋgi iŋgi atraiyitqa naŋgi unqab. E nami iŋgi iŋgi di Tamo Koba Qotei atraiyqajqa minjem.
19 O Jerusalem qure, e Tamo Koba Qotei aqa atra tal miligiq dia iŋgi iŋgi di atraiyqai. Tal di inoq di unu. O tamo uŋgasari, niŋgi Tamo Koba Qotei aqa ñam soqtoqniy!