132
Tamo naŋgi Qotei aqa atra tal qa areboleboleinjreqnu
1-2 O Israel naŋgo Tamo Koba Qotei, ni siŋgila koba ti unum deqa ni gulbe kalil Devit a qoboiyoqnej qaji di unime. Ni aqa gulbe deqa are walmaiq. Devit a na nami ni anjam bei mermsiqa anjam di siŋgilatej.
3 Devit a anjam endegsi marej, “E ijo tal miligiq gilqasai. E ŋeiqasai.
4 E qambumtqasai dego.
5 Mati e Israel naŋgo Tamo Koba Qotei siŋgila ti unu qaji aqa atra tal gereiyitqa a tal dia soqnim bati deqa e olo ŋeiqai.” Devit a anjam degsi marej.
6-7 Betlehem qureq dia iga anjam endi quem, “Niŋgi boiy. Iga Tamo Koba aqa atra talq gilsim aqa siŋga atqajqa sawaq dia louoqnqom.” Iga anjam di quem. Niŋgi qalie, Israel naŋgi Kiriat Jearim naŋgo mandamq di Qotei aqa dal anjam so qaji ŋam moŋgum iteb.
8 O Tamo Koba Qotei, ni tigelosim ino dal anjam so qaji ŋam moŋgum osim ino aqarato sawaq gilime. Aqarato sawa di ino atra tal. Ŋam moŋgum miligiq dia iga ino siŋgila kobaquja uneqnum.
9 O Abu Qotei, ijo areqalo agiende. Ino atra tamo naŋgi kumbra bole tiŋtiŋ gara bul jigesoqnebe. Ino segi tamo uŋgasari bole naŋgi areboleboleinjrim louoqnebe.
10 O Tamo Koba, ni ino wau tamo Devit a qa are qalime. Od, ni ino mandor ni segi na giltem qaji a aqaryaiyime. Ni na a qoreiyaim.
11-12 Tamo Koba Qotei na nami Devit endegsi minjej, “E ino aŋgro mel bei giltitqa ni mandor koba unum dego kere a kamba ino sawa osim mandor koba sqas. E na ijo dal anjam e nami Israel naŋgi enjrem qaji di plaltosiy ino aŋgro mel naŋgi minjroqnqai. Naŋgi ijo dal anjam dauryqab di naŋgo aŋgro mel naŋgi bati gaigai mandor kokba sqab. Ni mandor koba unum dego kere.” Qotei na Devit degsi minjsiqa anjam di siŋgilatej. Deqa a anjam di olo bubulyqa keresai.
13-14 Tamo Koba Qotei na Saion qure giltej. A qure dia sqajqa are unu. A marej, “E qure dia bati gaigai aqaratosiy Mandor Koba sqai.
15 E na tamo uŋgasari Saion qureq di unub qaji naŋgi iŋgi iŋgi qa tulaŋ keretnjrqai. E na tamo uŋgasari sougetejunub qaji naŋgi iŋgi uyo anainjritqa naŋgi uyib menetnjrqas.
16 E na atra tamo naŋgi wau enjritqa naŋgi anjam endegsib palontqab, ‘Qotei na tamo uŋgasari naŋgi eleŋeqnu deqa naŋgi padalosaieqnub.’ Atra tamo naŋgi anjam di gara bul jigibqa tamo uŋgasari kumbra bole yeqnub qaji naŋgi areboleboleinjrim louoqnqab.
17 E Devit aqa leŋq na tamo bei giltitqa a Saion qureq dia mandor koba sqas. Deqa a ti aqa leŋ naŋgi ti mandor kokba sqab.
18 E na mandor di aqa jeu tamo naŋgi jemai enjritqa naŋgi jemai di gara bul jigwab. Ariya mandor a ñam bole ti sqas. Aqa gate tatal a riaŋ ti suwaŋ ti sqas.”